ଏନ୍ଏସ୍ଇର ପୂର୍ବତନ ସିଇଓ ଚିତ୍ରା ରାମକୃଷ୍ଣଙ୍କ ଘରେ ଆୟକର ରେଡ୍
ନ୍ୟାସନାଲ୍ ଷ୍ଟକ୍ ଏକ୍ସଚେଞ୍ଜ୍ ବା ଏନ୍ଏସ୍ଇର ପୂର୍ବତନ ମୁଖ୍ୟ ପରିଚାଳନା ଅଧିକାରୀ ଚିତ୍ରା ରାମକୃଷ୍ଣଙ୍କ ମୁମ୍ୱାଇ ସ୍ଥିତ ଆବାସରେ ଆୟକର ବିଭାଗ ରେଡ୍ କରିଛି । ସେ ଓ ତାଙ୍କ ଅନ୍ୟ ସହଯୋଗୀଙ୍କ ଦ୍ବାରା ଟିକସ ଫାଙ୍କିବା ଘଟଣାରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
ଆୟକର ବିଭାଗର ମୁମ୍ୱାଇ ବ୍ରାଞ୍ଚ ଶାଖା ଛାନ୍ଭିନ୍ କରୁଛି । ଏହାଛଡ଼ା ଚିତ୍ରାଙ୍କ ଉପରେ ଜଣେ ବରିଷ୍ଠ ଅଧିକାରୀ ଆନନ୍ଦ ସୁବ୍ରମଣିୟମ୍ଙ୍କ ନିଯୁକ୍ତିରେ ଅନିୟମିତତାର ଅଭିଯୋଗ ରହିଛି । ଏହା ପୂର୍ବରୁ ସିକ୍ୟରିଟି ଏକ୍ସଚେଞ୍ଜ୍ ଅଫ୍ ଇଣ୍ଡିଆ ଅର୍ଥାତ ସେବି ୧୧ ଫେବୃଆରୀକୁ ରାମକୃଷ୍ଣଙ୍କ ଉପରେ ୩ କୋଟିର ଜୋରିମାନା ଲଗାଇଥିଲା । ମାର୍କେଟ୍ ରେଗୁଲେଟର ସେବି ଏକ୍ସଚେଞ୍ଜର ଅତିଗୋପନୀୟ ତଥ୍ୟ ଅନ୍ୟ ଜଣେ ଅଜ୍ଞାତ ବ୍ୟକ୍ତିଙ୍କୁ ପ୍ରଦାନ କରିବା ଅଭିଯୋଗର ବିଚାର କରି ଚିତ୍ରାଙ୍କ ଉପରେ ଏହି କାର୍ଯ୍ୟାନୁଷ୍ଠାନ ନିଆଯାଇଥିଲା ।
ଅଜ୍ଞାତ ବ୍ୟକ୍ତିଜଣକ ହେଉଛନ୍ତି ହିମାଳୟର ବାସ କରୁଥିବା ଜଣେ ଯୋଗୀ। ଚିତ୍ରାଙ୍କ ଅଫିସ ଇମେଲ୍ରୁ ଉକ୍ତ ଯୋଗୀଙ୍କ ନିକଟକୁ ସୂଚନା ଶେୟାର୍ ହେଉଥିଲା ଏବଂ ଯୋଗୀ ମଧ୍ୟ ଅନୁରୂପ ଭାବେ ପ୍ରତ୍ୟୁତ୍ତର ଦେଉଥିଲେ। ଏକଥା ପୂର୍ବରୁ ଚିତ୍ରା ସ୍ବୀକାର କରିଥିଲେ। ଚିତ୍ରା ଏବଂ ସହଯୋଗୀଙ୍କ ଟିକସ ପରିମାଣ ଫାଙ୍କି ଏବଂ ଆର୍ଥିକ ଅନିୟମିତା ଜାଣିବା ଉଦ୍ଦେଶ୍ୟରେ ତଲାସ ଚାଲିଛି ବୋଲି ସରକାରୀ ଅଧିକାରୀମାନେ କହିଛନ୍ତି।
ସୂଚନାଯୋଗ୍ୟ, ୨୦୧୩ ଏପ୍ରିଲରୁ ୨୦୧୬ ଡିସେମ୍ବର ପର୍ଯ୍ୟନ୍ତ ଚିତ୍ରା ଏନ୍ଏସ୍ଇର ଏମ୍ଡି ଓ ସିଇଓ ଥିଲେ। ସେତେବେଳେ ସେ ଯୋଗୀଙ୍କୁ ଶିରୋମଣି କହୁଥିଲେ । ଯିଏକି ତାଙ୍କ ପାଇଁ ଜଣେ ଆଧ୍ୟାତ୍ମିକ ଶକ୍ତି କହୁଥିଲେ । ୨୦ ବର୍ଷ ଧରି ବ୍ୟକ୍ତିଗତ ଏବଂ ବ୍ୟବସାୟିକ ମାମଲା ଉପରେ ତାଙ୍କର ମାର୍ଗଦର୍ଶିକାକୁ ଅନୁସରଣ କରୁଥିଲେ ।
Powered by Froala Editor
