ବିଶିଷ୍ଟ ଆଇନଜୀବୀ ତଥା ପୂର୍ବତନ ଆଟର୍ଣ୍ଣି ଜେନେରାଲ ସୋଲି ସୋରାବଜୀଙ୍କର ଶୁକ୍ରବାର ସକାଳେ ଦେହାନ୍ତ ଘଟିଛି। ନିକଟରେ ସେ କରୋନା ସଂକ୍ରମିତ ଚିହ୍ନଟ ହେବା ପରେ ତାଙ୍କୁ ଦିଲ୍ଲୀର ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା।  ମୃତ୍ୟୁ ବେଳକୁ ସୋଲି ସୋରାବଜୀଙ୍କୁ ୯୧ ବର୍ଷ ହୋଇଥିଲା ।

୧୯୩୦ ମସିହାରେ ସୋଲି ସୋରାବଜୀ ବମ୍ବେରେ ଜନ୍ମ ଗ୍ରହଣ କରିଥିଲେ । ସୋରାବଜୀ ୧୯୫୩ ମସିହାରେ ବମ୍ବେ ହାଇକୋର୍ଟରେ ଓକିଲାତି କ୍ୟାରିୟର ଆରମ୍ଭ କରିଥିଲେ। ପରେ ୧୯୭୧ ମସିହାରେ ସୁପ୍ରିମକୋର୍ଟର ବରିଷ୍ଠ ପରାମର୍ଶଦାତା ଭାବରେ ନିଯୁକ୍ତ ହୋଇଥିଲେ। ସୋରାବଜୀ ପ୍ରଥମେ ୧୯୮୯-୯୦ ରୁ ଭାରତର ଆଟର୍ଣ୍ଣି ଜେନେରାଲ୍ ହୋଇଥିଲେ ଏବଂ ପରେ ପୁଣି ୧୯୯୮-୨୦୦୪ ରୁ ମଧ୍ୟରେ ଏହି ଭାର ତୁଲାଇଥିଲେ। 

ଏହା ବାଦ୍‌, ୧୯୯୭ରେ ସେ ନାଇଜେରିଆ ପାଇଁ ଜାତିସଂଘର ସ୍ବତନ୍ତ୍ର 'ରାପୋ‌ର୍ଟର୍‌' ଭାବେ ନିଯୁକ୍ତି ପାଇଥିଲେ। ୨୦୦୦ରୁ ୨୦୦୬ ପର୍ଯ୍ୟନ୍ତ ସେ ହଗ୍‌ସ୍ଥିତ ଜାତିସଂଘ ବିଶ୍ବ ଅଦାଲତର ସଦସ୍ୟ ଭାବେ କାର୍ଯ୍ୟ କରିଥିଲେ । ବାକ୍‌ ସ୍ବାଧୀନତା ଓ ମାନବିକ ଅଧିକାର ପ୍ରତିରକ୍ଷା ପାଇଁ କାର୍ଯ୍ୟ କରିଥିବା ସୋଲି ସୋରାବଜୀଙ୍କୁ ୨୦୦୨ ମାର୍ଚ ମାସରେ ପଦ୍ମବିଭୂଷଣ ସମ୍ମାନ ପ୍ରଦାନ କରାଯାଇଥିଲା ।

ସୋରବଜୀଙ୍କ ଦେହାନ୍ତରେ ରାଷ୍ଟ୍ରପତି, ପ୍ରଧାନମନ୍ତ୍ରୀ ପ୍ରମୁଖ ଶୋକବ୍ୟକ୍ତ କରିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକବ୍ୟକ୍ତ କରିବା ସହ ତାଙ୍କ ପରିବର ଓ ବନ୍ଧୁବର୍ଗଙ୍କୁ ସମବେଦନା ଜଣାଇଛନ୍ତି । 

ବିୟୋଗ ଖବର ପାଇ ଭାରତର ପ୍ରଧାନ ବିଚାରପତି ଏନ୍‌ଭି ରମଣା କହିଛନ୍ତି, ଶ୍ରୀ ସୋଲି ସୋରାବଜୀ ଅତ୍ୟନ୍ତ ମର୍ଯ୍ୟାଦାବନ୍ତ ଭାବେ ଦୁଇ ଥର ଭାରତର ଆଟର୍ଣ୍ଣି ଜେନେରାଲ୍‌ ଭାବେ ଦାୟିତ୍ବ ନିର୍ବାହ କରିଥିଲେ । ତାଙ୍କର ମାନବୀୟ ଏବଂ ସମବେଦନାଶୀଳ ଆଭିମୁଖ୍ୟ ତାଙ୍କ ଆଇନଗତ କାର୍ଯ୍ୟର ସଂଜ୍ଞା ବହନ କରେ । 

Powered by Froala Editor