କରୋନା ପୀଡିତଙ୍କୁ ସେବା ଯୋଗାଇବେ ସେନା ଡାକ୍ତର
![କରୋନା ପୀଡିତଙ୍କୁ ସେବା ଯୋଗାଇବେ ସେନା ଡାକ୍ତର](https://odishanewslens.com/news_gallery/930_1619456951.jpg)
ସେନାବାହିନୀରେ ନିୟୋଜିତ ଡାକ୍ତର, ନର୍ସିଂ ଷ୍ଟାଫ୍ ଏବଂ ଡାକ୍ତରଖାନା କର୍ମଚାରୀମାନେ ଏଣିକି ବିଭିନ୍ନ ସ୍ଥାନରେ କୋଭିଡ୍ ପୀଡ଼ିତଙ୍କ ଚିକିତ୍ସା ଲାଗି ନିୟୋଜିତ ହେବେ। ଦେଶରେ କୋଭିଡ୍ ସ୍ଥିତିର ମୁକାବିଲା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରତିରକ୍ଷା ବିଭାଗର ସହାୟତା ଲୋଡ଼ିଛନ୍ତି। ପ୍ରଧାନମନ୍ତ୍ରୀଙ୍କ ସହ ଆଲୋଚନା ବେଳେ ସିଡିଏସ ବିପିନ ରାଓ୍ଵତ ଏହି ସୂଚନା ଦେଇଛନ୍ତି।
ବିପିନ ରାଓ୍ଵତ କହିଛନ୍ତି ଯେ, କମାଣ୍ଡ, କୋର, ଡିଭିଜନ ଓ ନୌସେନା ତଥା ବାୟୁସେନାର ମୁଖ୍ୟାଳୟରେ ମୁତୟନ ସେନା ଡାକ୍ତରଙ୍କୁ ହସ୍ପିଟାଲରେ ନିୟୋଜିତ କରାଯିବ। ହସ୍ପିଟାଲଗୁଡିକରେ ଡାକ୍ତରଙ୍କ ସାହାଯ୍ୟ ପାଇଁ ବଡ ସଂଖ୍ୟାରେ ନର୍ସଙ୍କୁ ନିଯୁକ୍ତ ଦିଆଯିବ। ସଶସ୍ତ୍ରବଳର ବିଭିନ୍ନ ପ୍ରତିଷ୍ଠାନରେ ଥିବା ଅକ୍ସିଜେନ୍ ସିଲିଣ୍ଡରକୁ ହସ୍ପିଟାଲକୁ ଯୋଗାଇ ଦିଆଯିବ ବୋଲି ରାଓ୍ଵତ କହିଛନ୍ତି।
ଏପରିକି ଯେଉଁ ଡାକ୍ତର ଯେଉଁ ସ୍ଥାନରେ ଅଛନ୍ତି ସେମାନଙ୍କୁ ସେହି ସ୍ଥାନରେ ସିଭିଲ୍ ପ୍ରତିଷ୍ଠାନ ତଥା ଡାକ୍ତରଖାନାରେ ସେବା ପ୍ରଦାନ ପାଇଁ ନିୟୋଜିତ କରାଯିବାକୁ ସ୍ଥିର ହୋଇଛି।
ଏହା ବ୍ୟତୀତ ସଶସ୍ତ୍ରବଳ ବଡ ସଂଖ୍ୟାରେ କୋଭିଡ୍ ହସ୍ପିଟାଲ୍ ପ୍ରସ୍ତୁତ କରୁଛି। ଯେଉଁଠି ବି ସମ୍ଭବ ହେବ ସେନାର ମେଡିକାଲ ସୁବିଧା ସାଧାରଣ ଜନତାଙ୍କୁ ଉପଲବ୍ଧ କରାଯିବ। ରାଓ୍ଵତଙ୍କ ସହ ଆଲୋଚନା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତୀୟ ବାୟୁସେନା ଦ୍ଵାର ଦେଶ-ବିଦେଶରୁ ଅକ୍ସିଜେନ୍ ଓ ଅନ୍ୟ ଜରୁରୀ ସାମଗ୍ରୀର ପରିବହନ ନେଇ ପ୍ରସ୍ତୁତିର ମଧ୍ୟ ସମୀକ୍ଷା କରିଛନ୍ତି। ସୂଚନା ଯେ, ଏଯାଏ ପ୍ରାୟ ୧୯୨୩୧୧ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି।
Powered by Froala Editor