ସହଯୋଗର ହାତ ବଢ଼ାଇଲା ଆମେରିକା: କୋଭିଶିଲ୍ଡ କଞ୍ଚାମାଲ ରପ୍ତାନୀ ଉପରୁ ହଟାଇଲା ପ୍ରତିବନ୍ଧକ ଓ ପଠାଇଲା ୩୧୮ଟି ‘ଅକ୍ସିଜେନ୍ କନ୍ସେନ୍ଟ୍ରେଟର୍’
କୋଭିଡର ପ୍ରଥମ ଲହରରେ ଆମେରିକା ସର୍ବାଧିକ କ୍ଷତିଗ୍ରସ୍ତ ହୋଇଥିବା ବେଳେ ସେତେବେଳେ ପ୍ରକୃତ ବନ୍ଧୁର ପରିଚୟ ଦେଇଥିଲା ଭାରତ। ଆମେରିକା ଆବଶ୍ୟକ କରୁଥିବା ପାରାସିଟାମଲ ସମେତ ଅନେକ ଔଷଧ ପର୍ଯ୍ୟାପ୍ତ ପରିମାଣର ପଠାଇଥିଲା। ଏବେ ଭାରତର ବିପଦ ବେଳେ ସାହାଯ୍ୟର ହାତ ବଢ଼ାଇବାକୁ ଆଗେଇ ଆସିଛି ଆମେରିକା ।
କୋଭିଶିଲ୍ଟ ଟିକା ପାଇଁ ଆବଶ୍ୟକ କଞ୍ଚା ମାଲ ଭାରତକୁ ରପ୍ତାନୀ ଉପରେ ଆମେରିକା ପ୍ରଥମେ ଳଗାଇଥିବା ପ୍ରତିବନ୍ଧକକୁ ଏବେ ଉଠାଇ ଦେଇଛି। ଆମେରିକାର ସୁରକ୍ଷା ପରାମର୍ଶଦାତା ଜାକେ ସୁଲିଭାନ ଟ୍ୱିଟ୍ କରି ଏହି ସୂଚନା ଦେଇଛନ୍ତି। ଆମେରିକାର ଏହି ସହଯୋଗ ପରେ ଭାରତରେ ଏବେ କୋଭିଶିଲ୍ଡ ଟିକା ଅଧିକରୁ ଅଧିକ ଉତ୍ପାଦନ ହେବା ନେଇ ବାଟ ଫିଟିଛି। ତେବେ ଜାକେ ସୁଲିଭାନଙ୍କ ଟ୍ୱିଟ୍ ଉପରେ ପ୍ରତିକ୍ରିୟା ରଖିଛନ୍ତି ଆମେରିକାର ରାଷ୍ଟ୍ରପତି ଜୋ ବାଇଡନ୍ ଏବଂ ଉପରାଷ୍ଟ୍ରପତି କମଲା ହାରିସ।
ଆମେରିକାର ବିପଦ ସମୟରେ ଭାରତ ସମସ୍ତ ପ୍ରକାର ସହଯୋଗ ଯୋଗାଇ ଦେଇଥିଲା। ଏବେ ଭାରତର ସ୍ଥିତି ଖରାପ ରହିଥିବାରୁ ଆମେରିକା ସମସ୍ତ ପ୍ରକାର ସହଯୋଗ କରିବା ପ୍ରସ୍ତୁତ ବୋଲି ଜୋ ବାଇଡେନ୍ ଟ୍ୱିଟ୍ କରି କହିଛନ୍ତି।
କେବଳ ସେତିକି ନୁହେଁ, ଭାରତରେ ପହଞ୍ଚିଛି ଆମେରିକା ପଠାଇଥିବା ୩୧୮ଟି ‘ଅକ୍ସିଜେନ୍ କନ୍ସେନ୍ଟ୍ରେଟର୍’। ନ୍ୟୁୟର୍କରୁ ଏୟାର ଇଣ୍ଡିଆ ବିମାନ ଯୋଗେ ଏହି ‘ଅକ୍ସିଜେନ୍ କନ୍ସେନ୍ଟ୍ରେଟର୍’ ଆସି ଦିଲ୍ଲୀରେ ପହଞ୍ଚିଛି। ଏନେଇ ସୂଚନା ଦେଇଛନ୍ତି ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂହ ପୁରୀ।
ଅମ୍ଲଜାନ ଯୋଗାଣ କରାଯାଉଥିଲେ ମଧ୍ୟ ଦେଶର ବିଭିନ୍ନ କୋଣରେ କରୋନା ଆକ୍ରାନ୍ତ ଅମ୍ଲଜାନ ଅଭାବରୁ ମୃତ୍ୟୁବରଣ କରୁଥିବା ଦେଖାଯାଇଛି। ଶନିବାର ଦିଲ୍ଲୀର ଜୟପୁରରେ ଥିବା ଗୋଲଡେନ ହସ୍ପିଟାଲରେ ୨୦ଜଣ କରୋନା ରୋଗୀଙ୍କୁ ଅମ୍ଲଜାନ ନମଳିବାରୁ ସେମାନଙ୍କ ମୃତ୍ୟୁ ହୋଇଥିବା ନେଇ ଖବର ମିଳିଥିଲା। ଦେଶର ଏଭଳି ସ୍ଥିତିରେ ଏବେ ଭାରତରୁ ସାହାଯ୍ୟର ହାତ ବଢ଼ାଇଛି ଆମେରିକା।
Powered by Froala Editor
