ଗର୍ଭବତୀ ସ୍ତ୍ରୀ କରୋନା ଆକ୍ରାନ୍ତ ହୋଇପଡିଥିଲେ । ଯନ୍ତ୍ରଣା ବଢିଚାଲିଲା । ସ୍ୱାମୀ ନେହୁରା ହୋଇ ଅନେକ ଆମ୍ବୁଲାନ୍ସ ଫୋନ୍ କଲେ । ହେଲେ କେହି ଶୁଣିଲେନି । ବହୁ ବିଳମ୍ବରେ ଏକ ଆମ୍ବୁଲାନ୍ସ ପହଞ୍ଚିଥିଲା । ସେତିକିବେଳକୁ ସ୍ୱାମୀଙ୍କ ମୁଣ୍ଡକୁ ପିତ୍ତ ଚଢିଯାଇଥିଲା । ରାଗରେ ସେ ଆମ୍ବୁଲାନ୍ସ ସହ କର୍ମଚାରୀଙ୍କୁ ବନ୍ଧକ ରଖିଦେଲେ । ଏଭଳି ଘଟଣା ଘଟିଛି ମଧ୍ୟପ୍ରଦେଶ ବିଦିଶା ଜିଲ୍ଲାରେ । 

ପୁତଲୀଘାଟର ମୁଖାର୍ଜିନଗରରେ ରହୁଥିବା ସୁନୀଲ କୁଶୱାହଙ୍କ ସ୍ତ୍ରୀ ଗର୍ଭବତୀ ଥିବା ବେଳେ ୪ ଦିନ ପୂର୍ବରୁ ସେ କରୋନା ପଜିଟିଭ୍ ଚିହ୍ନଟ ହୋଇଥିଲେ । ଦୁଇ ଦିନ ପୂର୍ବରୁ ସ୍ତ୍ରୀର ଦେହ ଅଚାନକ ଖରାପ ହୋଇଥିଲା । ପେଟରେ ପିଲାଥିବା ବେଳେ କରୋନା କୋପ ତାଙ୍କ ପାଇଁ ଅସହ୍ୟ ହେଉଥିଲା । ସେପଟେ ସ୍ତ୍ରୀର ଏପରି ଅବସ୍ଥା ଦେଖି ସ୍ୱାମୀଙ୍କ ଆଖିରେ ବି ଲୁହ ଆସି ଯାଇଥିଲା । ଫଳରେ ବିଳମ୍ବିତ ରାତ୍ରି ୧୧ଟାରେ ଆମ୍ବୁଲାନ୍ସ ଡକାଇ ମେଡ଼ିକାଲ ନେବାକୁ ଚାହୁଁଥିଲେ । ସ୍ତ୍ରୀର ଅବସ୍ଥା ଖରାପ ହେବାରୁ ଲଗାତାର ଆମ୍ବୁଲାନ୍ସକୁ ପଠାଇବା ପାଇଁ ମେଡିକାଲ କଲେଜକୁ ଲଗାତାର ଫୋନ୍ କରୁଥିଲେ । ହେଲ ମହାମାରୀର ଭୟାବହତା ସମ୍ପର୍କରେ ଜାଣି ସୁଦ୍ଧା ଗୋଟିଏ ଦିନ ପରେ ସଂକ୍ରମିତଙ୍କ ଘରେ ପହଞ୍ଚିଲା ଆମ୍ବୁଲାନ୍ସ । ଆଟେଣ୍ଡର ବାରମ୍ବାର ଆସୁଛି ଆସୁଛି କହି ବିଳମ୍ବରେ ପହଞ୍ଚିଲା । ଆଉ ଏଥିରେ ଉତକ୍ଷିପ୍ତ ହୋଇ ୧୦୮ ଆମ୍ବୁଲାନ୍ସ ଘରେ ପହଞ୍ଚିବା ପରେ, ଆମ୍ବୁଲାନ୍ସ ଓ ଆମ୍ବୁଲାନ୍ସ ଚାଳକକୁ ବନ୍ଧକ ରଖିଥିଲେ ସୁନୀଲ ।

ପାଖାପାଖି ୨ ଘଣ୍ଟା ବନ୍ଧକ ରଖିବା ପରେ ଘଟଣାସ୍ଥଳରେ ପହଞ୍ଚିଥିଲା ପୋଲିସ୍ ଏବଂ ସୁନୀଲଙ୍କୁ ବୁଝାସୁଝା କରି ଆମ୍ବୁଲାନ୍ସ ଚାଳକଙ୍କୁ ସେଠାରୁ ଉଦ୍ଧାର କରିଥିଲା। ଶେଷରେ ବନ୍ଧକ ରଖିଥିବା ଆମ୍ବୁଲାନ୍ସରେ କରୋନା ସଂକ୍ରମିତ ସ୍ତ୍ରୀଙ୍କୁ ନେଇ ହସ୍ପିଟାଲରେ ଆଡମିଟ୍ କରାଯାଇଛି । ସଠିକ ସମୟରେ ଚିକିତ୍ସା ମିଳିବା ଦ୍ୱାରା ଗର୍ଭବତୀ ମହିଳା ଏବେ ସୁସ୍ଥ ଅଛନ୍ତି। ଅନ୍ୟପଟେ ଆମ୍ବୁଲାନ୍ସ କର୍ମଚାରୀ ଅଭିଯୋଗ କରିଛନ୍ତି, ରାଗରେ ସୁନୀଲ ଆମ୍ବୁଲାନ୍ସର କାଚ ଭାଙ୍ଗିବାକୁ ଚେଷ୍ଟା କରୁଥିଲା ।

Powered by Froala Editor