ଶ୍ରୀନଗର : କାଶ୍ମୀରରେ ପୁଣି ପୁଲିସ ବାହିନୀ ଉପରେ ଜୋର୍‌ଦାର ଆତଙ୍କବାଦୀ ଆକ୍ରମଣ ହୋଇଛି । ସୋମବାର ସନ୍ଧ୍ୟାରେ କର୍ତ୍ତବ୍ୟ ଶେଷ କରି ଶିବିରକୁ ବସ୍‌ ଯୋଗେ ଫେରୁଥିବା ପୁଲିସ କର୍ମଚାରୀଙ୍କ ଉପରେ ଏହି ଆକ୍ରମଣ ହୋଇଛି। ଶ୍ରୀନଗର ପାଟନା ଚୌକ୍‌ର ଜିୱାନ୍‌ ପୁଲିସ ଶିବିର ନିକଟରେ ପୁଲିସବାହିନୀ ପହଞ୍ଚିବା ସମୟରେ ଆତଙ୍କବାଦୀମାନେ ଆକ୍ରମଣ କରିଛନ୍ତି । ଏଥିରେ ଦୁଇ ପୁଲିସ କର୍ମଚାରୀଙ୍କ ମୃତ୍ୟୁ ଘଟିଛି ଓ ୧୨ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରୁ କେତେଜଣଙ୍କ ଅବସ୍ଥା ସଙ୍କଟାପନ୍ନ ଥିବାରୁ ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା ରହିଛି । ଆହତଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯିବା ସହ ସମ୍ପୃକ୍ତ ଅଞ୍ଚଳକୁ ସୁରକ୍ଷାକର୍ମୀ ଘେରାଉ କରି ଆତଙ୍କବାଦୀଙ୍କ ସନ୍ଧାନ ଚଳାଇଛନ୍ତି । ମୃତ ଦୁଇ ଜଣ ହେଉଛନ୍ତି ଜଣେ ଏଏସ୍‌ଆଇ ଓ ଜଣେ କନ୍‌ଷ୍ଟେବଳ। ଅପରପକ୍ଷରେ ଆକ୍ରମଣରେ ଦୁଇ ଆତଙ୍କବାଦୀ ସାମିଲ ଥିବା ପ୍ରକାଶ। ଜୱାନଠାରେ ଅଧିକାଂଶ ସୁରକ୍ଷାକର୍ମୀଙ୍କ ଶିବିର ରହିଥିବାବେଳେ ଏହି ଅଞ୍ଚଳ ସର୍ବଦା ସୁରକ୍ଷା ବଳୟ ମଧ୍ୟରେ ରହିଛି। ଏହା ସତ୍ତ୍ବେ ସେଠାରେ ଆତଙ୍କବାଦୀଙ୍କ ସଂହାର ଲୀଳା ସୁରକ୍ଷା ବ୍ୟବସ୍ଥା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି । ଗତ ଶୁକ୍ରବାର ବନ୍ଦିପଡ଼ାର ଗୁଲଶନ ଚୌକ୍‌ଠାରେ ଆତଙ୍କବାଦୀଙ୍କ ଆକ୍ରମଣରେ ଦୁଇ ପୁଲିସ କର୍ମଚାରୀ ମହମ୍ମଦ ସୁଲତାନ ଓ ଫୟଜ ଅହମ୍ମଦ ଲୋନ୍‌ ନିହତ ହୋଇଥିଲେ। ଏତଦ୍‌ ବ୍ୟତୀତ ରବିବାର ଶ୍ରୀନଗର ନିକଟରେ ଆତଙ୍କବାଦୀଙ୍କ ଗୁଳିରେ ଜଣେ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା ।

Powered by Froala Editor