ପରଲୋକରେ ମିନୁ ମୁମତାଜ
ମୁମ୍ବାଇ: ବଲିଉଡ୍ ଅଭିନେତ୍ରୀ ମିନୁ ମୁମତାଜଙ୍କ ପରଲୋକ ଘଟିଛି । ୭୯ ବୟସରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ଏନେଇ ତାଙ୍କ ଭାଇ ଅନୱର ଅଲ୍ଲୀ ସୂଚନା ଦେଇଛନ୍ତି । ଏହି ଖବର ପାଇବା ପରେ ଅନେକ କଳାକାର ଶୋକ ପ୍ରକାଶ କରିଛନ୍ତି । କିଛି ଜଣ ସୋସିଆଲ୍ ମିଡିଆରେ ଫଟୋ ସେୟାର କରିବା ସହିତ ଆତ୍ମାର ସଦ୍ଗତି କାମନା କରିଥିବା ଦେଖିବାକୁ ମିଳିଛି । ଆଉ କିଛି କଳାକାର ମିନୁଙ୍କ ସହିତ ଥିବା ପୁରୁଣା ସ୍ମୃତି ବଖାଣି ଆର୍ପିଆଇ ବୋଲି ଲେଖିଛନ୍ତି ।
ମିନୁ ୨୬ ଏପ୍ରିଲ ୧୯୪୨ରେ ଜନ୍ମଗ୍ରହଣ କରିଥିଲେ । ଭେଟେରାନ ହାସ୍ୟ ଅଭିନେତା ମେହମୁଦ ଅଲ୍ଲୀଙ୍କ ଭଉଣୀ ଥିଲେ ମିନୁ । ସେ ୧୯୫୦ ଏବଂ ୧୯୬୦ ଦଶକରେ ଅନେକ ଫିଲ୍ମରେ ଅଭିନୟ କରିଥିଲେ । ମୁମତାଜ ଫିଲ୍ମ ‘ଘର ଘର ମେଁ ଦିୱାଲୀ’ରେ ଡେବ୍ୟୁ କରିଥିଲେ। ଏହି ଫିଲ୍ମଟି ୧୯୫୫ ମସିହାରେ ମୁକ୍ତିଲାଭ କରିଥିଲା । ଏଥିସହ କାଗଜ କା ଫୁଲ, ଚନ୍ଦୱି କା ଚାନ୍ଦ, ସାହେବ ବିବି ଔର ଗୁଲାମ, ତାଜମହଲ, ଘୁଙ୍ଗଟ, ଇନସାନ ଜାଗ ଉଠା, ଘର ବାସାକେ ଦେଖୋ, ଗଜଲ ଭଳି ଅନକେ ହିଟ୍ ଫିଲ୍ମରେ ସେ ଅଭିନୟ କରିଛନ୍ତି । ୧୯୬୩ରେ ନିର୍ଦ୍ଦେଶକ ଏସ୍ ଅଲ୍ଲୀ ଅକବରଙ୍କୁ ବିବାହ କରିଥିଲେ । ଏହାପରଠାରୁ ସେ ବଲିଉଡ ଠାରୁ ଦୂରେଇ ଯାଇଥିଲେ । ଦୀର୍ଘ ଦିନ ଧରି ସେ କାନାଡାରେ ରହୁଥିଲେ । ତାଙ୍କର ତିନି ଜଣ ଝିଅ ଥିବା ବେଳେ ଜଣେ ପୁଅ ଅଛନ୍ତି ।
Powered by Froala Editor