ଗତକାଲି ରାତି ପ୍ରାୟ ସାଢେ ୯ଟା ସମୟରେ ହଠାତ୍ ସୋସିଆଲ ମିଡିଆ ବନ୍ଦ ହୋଇଗଲା । ଫେସବୁକ୍, ହ୍ୱାଟସ୍ ଆପ ଓ ଇନଷ୍ଟାଗ୍ରାମ ସବୁ କିଛି ବନ୍ଦ । ଆଜିକାଲି ଯୁବ ପିଢିଙ୍କଠୁ ଆରମ୍ଭ କରି ବୟସ୍କ ପର୍ଯ୍ୟନ୍ତ, ସମସ୍ତେ ସୋସେିଆଲ ମିଡିଆ ଉପରେ ଅତ୍ୟନ୍ତ ନିର୍ଭରଶୀଳ । କିନ୍ତୁ ହଠାତ ସବୁ ବନ୍ଦ ହୋଇଯିବାରୁ ସମସ୍ତେ ବ୍ୟସ୍ତ ହୋଇପଡିଲେ । ଅନେକ ନେଟୱାର୍କ ସମସ୍ୟା ଭାବୁଥିବା ବେଳେ କେତେକ ନିଜର ସୋସିଆଲ ମିଡିଆ ଆପ ଗୁଡିକୁ ଅପଡେଟ୍ ମଧ୍ୟ କରିଥିଲେ । କଣ ହୋଇଛି କାହିଁକି କିଛି ବି ସୋସିଆଲ ମିଡିଆ କାମ କରୁନି, ସେହି ପ୍ରଶ୍ନ ସମସ୍ତଙ୍କ ମନରେ ଉଙ୍କି ମାରୁଥିଲା । ଶେଷରେ ଜଣାପଡିଲା ଯେ, ଫେସବୁକ୍, ଇନଷ୍ଟାଗ୍ରାମ ଓ ହ୍ୱାଟସଆପର ସର୍ଭର ହଠାତ୍ ଡାଉନ ହୋଇଯାଇଛି ।  ସାରା ବିଶ୍ୱରେ ହଇଚଇ ସୃଷ୍ଟି ହୋଇଥିଲା । ଏଥିପାଇଁ ବିଶ୍ୱର ୧୦୦ କୋଟିରୁ ଅଧିକ ଲୋକ ପ୍ରଭାବିତ ହେଇଛନ୍ତି ବୋଲି ସୂଚନା ମିଳିଛି । ଭାରତ ଓ ଆମେରିକା ସମେତ ଅନ୍ୟ ଦେଶ ଗୁଡିକ ମଧ୍ୟ ଏଥିରେ ଗଭୀର ଭାବେ ପ୍ରଭାବିତ ହୋଇଥିଲେ । 
ପ୍ରାୟ ଛଅ ଘଣ୍ଟା ଧରି ବ୍ୟାହତ ପରେ ପୁଣି ଆରମ୍ଭ ହୋଇଛି ଫେସବୁକ୍, ହ୍ୱାଟସ୍ଆପ୍ ଏବଂ ଇନଷ୍ଟାଗ୍ରାମ୍ । ତେବେ ଏହି ୬ ଘଣ୍ଟାର ଅଚଳାବସ୍ଥା ଯୋଗୁ ଫେସବୁକର ଶେୟାର ପ୍ରାୟ ୫%(୪.୯%) ହ୍ରାସ ପାଇଛି । ଏଥିପାଇଁ କମ୍ପାନୀକୁ ୭ ବିଲିୟନ ଡଲାର ବା ୫୨,୧୦୦ କୋଟି ଟଙ୍କାର ଝଟକା ଲାଗିଛି ।

Powered by Froala Editor