କରୋନା ସଂକ୍ରମଣକୁ ଦେଖି ICSE ବୋର୍ଡ ଦଶମ ଓ ଦ୍ୱାଦଶ ପରୀକ୍ଷା ସ୍ଥଗିତ ରଖିବାକୁ ନିଷ୍ପତ୍ତି ନେଇଛି । ନୂତନ ପରୀକ୍ଷା ତାରିଖ ସଂକ୍ରମଣ ସ୍ଥିତିକୁ ଦେଖି ଜୁନ୍ ପ୍ରଥମ ସପ୍ତାହରେ ସ୍ଥିର କରାଯିବ । ସିଆଇଏସ୍‌ସିଇ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ, ଆଇଏସ୍‌ଇ ବା ଦ୍ୱାଦଶ ଶ୍ରେଣୀର ଶିକ୍ଷାର୍ଥୀମାନେ ପରବର୍ତ୍ତୀ ସମୟରେ ଧାର୍ଯ୍ୟ ହେବାକୁ ଥିବା ତାରିଖରେ ପରୀକ୍ଷା ଦେବାକୁ ଆସିବେ। ୧୦ମ ଶ୍ରେଣୀର ପିଲାମାନେ ଦ୍ୱାଦଶ ଶ୍ରେଣୀର ପିଲାଙ୍କ ସହ ମିଶି ଅଫଲାଇନ ପରୀକ୍ଷା ଦେବାକୁ ଆସିପାରିବେ ନଚେତ ସେମାନେ ଚାହିଁଲେ ଅଫଲାଇନ ପରୀକ୍ଷାକୁ ବାରଣ ମଧ୍ୟ କରିପାରିବେ। ଯେଉଁ ୧୦ମ ଶ୍ରେଣୀ ପିଲା ଅଫଲାଇନରେ ପରୀକ୍ଷା ଦେବେନାହିଁ, ସେମାନଙ୍କ ପାଇଁ ସିଆଇଏସ୍‌ସିଇ ନିଶ୍ଚିତ ସ୍ୱଚ୍ଛ ଓ ନିରପେକ୍ଷ ବ୍ୟବସ୍ଥା ଆପଣାଇବ। ସେହି ଅନୁସାରେ ପରୀକ୍ଷାର୍ଥୀଙ୍କ ରିପୋର୍ଟ କାର୍ଡ ତିଆରି କରାଯିବ ବୋଲି ବିଜ୍ଞପ୍ତିରେ କୁହାଯାଇଛି। ଗତ ୨୪ ଘଣ୍ଟା ମଧ୍ୟରେ କରୋନା ସଂକ୍ରମଣର ୨ ଲକ୍ଷରୁ ଅଧିକ ନୂତନ ମାମଲା ଚିହ୍ନଟ ହୋଇଛି । ଅଧିକାଂଶ ରାଜ୍ୟରେ କରୋନା ସ୍ଥିତି ବିଗୁଡ଼ିଥିବା ଦେଖି କଡ଼ା ପ୍ରତିବନ୍ଧକ ଲାଗୁ ମଧ୍ୟ କରାଯାଉଛି । କରୋନା ସଂକ୍ରମଣକୁ ଦୃଷ୍ଟିରେ ରଖି ସିବିଏସ୍‌ଇ ପ୍ରଥମେ ୧୦ମ ପରୀକ୍ଷାକୁ ବାତିଲ କରିଥିଲା ଓ ଦ୍ୱାଦଶ ଶ୍ରେଣୀର ପରୀକ୍ଷାକୁ ସ୍ଥଗିତ ରଖିଥିଲା। ଏହାପରେ ଏକାଧିକ ରାଜ୍ୟ ନିଜ ନିଜର ବୋର୍ଡ ପରୀକ୍ଷାକୁ ବାତିଲ କିମ୍ବା ସ୍ଥଗିତ ରଖିବା ଆରମ୍ଭ କରିଛନ୍ତି। ଏହି ତାଲିକାରେ ଓଡ଼ିଶା, ଉତ୍ତର ପ୍ରଦେଶ, ଗୁଜରାଟ, ପଞ୍ଜାବ, ହରିଆଣା ଭଳି ରାଜ୍ୟ ରହିଛନ୍ତି। ଗୁରୁବାର କେନ୍ଦ୍ର ସରକାର NEET PG ପରୀକ୍ଷାକୁ ମଧ୍ୟ ସ୍ଥଗିତ ରଖିବା ପାଇଁ ନିଷ୍ପତ୍ତି ନେଇଥିଲେ ।