ଆଉ ମାତ୍ର ମାସ କେଇଟା ପରେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ୬ ମାସିଆ କାର୍ଯ୍ୟକାଳ ପୂରଣ ହେବାକୁ ଯାଉଛି । ଏହାରି ମଧ୍ୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଉପ ନିର୍ବାଚନ କରାଇବାକୁ ନିର୍ବାଚନ ଆୟୋଗଙ୍କୁ କହିଛନ୍ତି । ମମତା କହିଛନ୍ତି, “ବିଧାନସଭା ନିର୍ବାଚନ ଶେଷ ହେବାକୁ ଇତି ମଧ୍ୟରେ ୪ ମାସ ବିତିଗଲାଣି। ଏଥିସହ ଏବେ ରାଜ୍ୟରେ କୋଭିଡ-୧୯ ସ୍ଥିତି ସଂପୂର୍ଣ୍ଣ ନିୟନ୍ତ୍ରଣରେ ରହିଛି। ତେଣୁ ଲୋକମାନଙ୍କୁ ସେମାନଙ୍କ ମତାଧିକାର ସାବ୍ୟସ୍ତ କରିବାକୁ ସୁଯୋଗ ମିଳିବା ଉଚିତ। ନିର୍ବାଚନ କମିଶନ ତୁରନ୍ତ ୭ ଆସନ ପାଇଁ ଉପ ନିର୍ବାଚିନ ତାରିଖ ଘୋଷଣା କରିବା ଦରକାର। କାରଣ ଆମେ କେବେ ହେଲେ ଲୋକଙ୍କ ଗଣତାନ୍ତ୍ରିକ ଅଧିକାରୀକୁ କ୍ଷୁଣ୍ଣ କରିପାରିବା ନାହିଁ। ଏହା ଯେମିତି ଅକ୍ଷୁଣ୍ଣ ରହିବ, ତା’ ଉପରେ ମଧ୍ୟ ନିର୍ବାଚନ କମିଶନ ଧ୍ୟାନ ଦିଅନ୍ତୁ।”

ଦିଦିଙ୍କ କାର୍ଯ୍ୟକାଳ ଆସନ୍ତା ନଭେମ୍ବର ମାସରେ ଶେଷ ହେବାକୁ ଯାଉଛି । ତେଣୁ ଏହାରି ମଧ୍ୟରେ ହିଁ ଉପ ନିର୍ବାଚନ କରାଯାଇ ମମତା ବାନାର୍ଜୀଙ୍କୁ ନିର୍ବାଚିତ ହୋଇ ବିଧାନସଭାକୁ ଯିବାକୁ ପଡିବ । ନଚେତ୍ ମୁଖ୍ୟମନ୍ତ୍ରୀ ଚୌକି ଯିବାର ସମ୍ଭାବନା ରହିଛି । ସମ୍ବିଧାନର ଧାରା ୧୬୪(୪) ଅନୁସାରେ, ଯଦି କୌଣସି ବ୍ୟକ୍ତି ବିଧାୟକ କିମ୍ବା ସାଂସଦ ନଥାଇ ମନ୍ତ୍ରୀ ପଦ ପାଇଥାନ୍ତି ତେବେ ତାଙ୍କୁ ୬ ମାସ ମଧ୍ୟରେ ବିଧାନସଭା କିମ୍ବା ବିଧାନ ପରିଷଦ ଯଦି ସାଂସଦ ହୋଇଥିବେ ତେବେ ସଂସଦର ଉଭୟ ଗୃହରେ କୌଣସି ଗୋଟିଏ ଗୃହକୁ ଲୋକମାନଙ୍କ ଦ୍ବାରା ନିର୍ବାଚିତ ହେବାକୁ ପଡିବ । ଯଦି ଏହା ନହୁଏ ତେବେ ୬ ମାସ ପରେ ତାଙ୍କ ପଦବୀ ଚାଲିଯାଇଥାଏ । ଏହାକୁ ଦୃଷ୍ଟିରେ ରଖି ଦିଦି ଯଥାଶୀଘ୍ର ନିର୍ବାଚନ କରାଇବାକୁ ଭାରତୀୟ ନିର୍ବାଚନ କମିସନରଙ୍କୁ ଅପିଲ କରିଛନ୍ତି ।

ସୂଚନାଯୋଗ୍ୟ ଯେ, ମମତା ବାନାର୍ଜୀ ନନ୍ଦିଗ୍ରାମ ଆସନରୁ ବିଜେପି ନେତା ଶୁଭେନ୍ଦୁ ଅଧିକାରୀଙ୍କ ବିରୁଦ୍ଧରେ ନିର୍ବାଚନ ଲଢିଥିଲେ । ଫଳାଫଳ ଆଶ୍ଚର୍ଯ୍ୟାନ୍ବିତ ଭାବେ ଶୁଭେନ୍ଧୁ ଅଧିକାରୀଙ୍କ ପଟକୁ ଯାଇଥିଲା । ଦିଦିଙ୍କୁ ପ୍ରଥମ ଥର ପାଇଁ ହରାଇଥିଲେ ବିଜେପି ନେତା ଶୁଭେନ୍ଦୁ ଅଧିକାରୀ । ପରାଜୟ ପରେ ମଧ୍ୟ ସେ ମୁଖ୍ୟମନ୍ତ୍ରୀ ହୋଇଥିଲେ। ଏଭଳି ପରିସ୍ଥିତିରେ ନିୟମ ଅନୁଯାୟୀ, ମୁଖ୍ୟମନ୍ତ୍ରୀ ହେବାର ୬ ମାସ ମଧ୍ୟରେ ଉପ ନିର୍ବାଚନ କରାଯାଇ ଲୋକମାନଙ୍କ ଦ୍ବାରା ପୁନଶ୍ଚ ନେତା ଚୟନ ହେବା କଥା ବୋଲି ମମତା କହିଛନ୍ତି।