କଟକ : ଏସସିବି ମେଡ଼ିକାଲ କଲେଜ ଓ ହସ୍ପିଟାଲର କାଜୁଆଲିଟିରୁ ନିଖୋଜ ହୋଇଯାଉଛନ୍ତି ବହୁ ମାନସିକ ରୋଗୀ। ସେମାନେ ଚିକିତ୍ସା ପାଇଁ ଆସୁଛନ୍ତି ହେଲେ ଚିକିତ୍ସା ସମ୍ପୂର୍ଣ୍ଣ ହେବା ପୂର୍ବରୁ କେଉଁ ଆଡ଼େ ଚାଲି ଯାଉଛନ୍ତି। ଗତ ଅଢ଼େଇ ବର୍ଷ ମଧ୍ୟରେ ପ୍ରାୟ ୪୬ରୁ ଅଧିକ ମାନସିକ ରୋଗୀ ନିଖୋଜ ହୋଇଥିବା ଜଣାପଡ଼ିଛି। ତନ୍ମଧ୍ୟରେ ପ୍ରାୟ ସମସ୍ତେ ଅପରିଚିତ ରୋଗୀ ରହିଛନ୍ତି। ପରେ ଅଧିକାଂଶଙ୍କୁ ‘ଲାମା’ (ଡାକ୍ତରୀ ପରାମର୍ଶ ବିନା ଛୁଟି) ଭାବରେ ଚିହ୍ନିତ କରାଯାଇଥିବା ଜଣାପଡ଼ିଛି। ମେଡ଼ିକାଲରୁ ରୋଗୀ ନିଖୋଜ ହେବା ପରେ ସେମାନଙ୍କ ସଂକ୍ରାନ୍ତରେ ଆଉ କୌଣସି ସୂଚନା ରହୁନଥିବା ଅଭିଯୋଗ ହୋଇଛି।
ସହର ତଥା ବିଭିନ୍ନ ସ୍ଥାନରୁ ବହୁ ମାନସିକ ରୋଗୀ ଦୁର୍ଘଟଣା କିମ୍ବା ଅନ୍ୟ କୌଣସି ରୋଗରେ ଆକ୍ରାନ୍ତ ହୋଇ ଏସସିବି କାଜୁଆଲିଟିରେ ଭର୍ତ୍ତି ହୋଇଥାନ୍ତି। ସେମାନଙ୍କୁ ବିଭିନ୍ନ ସାମାଜିକ ଅନୁଷ୍ଠାନ କିମ୍ବା କେହି ବ୍ୟକ୍ତି ଆଣି ଏସସିବିରେ ଭର୍ତ୍ତି କରିଥାନ୍ତି। କାଜୁଆଲିଟିରେ ଟିକଟ କାଟି ଉକ୍ତ ମାନସିକ ରୋଗୀଙ୍କୁ ଭର୍ତ୍ତି କରାଯାଇଥାଏ। ତନ୍ମଧ୍ୟରୁ ଅଧିକାଂଶ ରୋଗୀଙ୍କ ସଂକ୍ରାନ୍ତରେ କୌଣସି ସୂଚନା ନଥିବାରୁ ଅପରିଚିତ ରୋଗୀ ଭାବେ ସେମାନଙ୍କୁ ପରିଗଣିତ କରାଯାଏ। କାଜୁଆଲିଟିରେ ଚିକିତ୍ସା ହେବା ପରେ ଡାକ୍ତରଙ୍କ ପରାମର୍ଶ ଅନୁଯାୟୀ ସେମାନଙ୍କୁ ଏସସିବି ପରିସରରେ ଥିବା ମାନସିକ ସ୍ବାସ୍ଥ୍ୟ ପ୍ରତିଷ୍ଠାନରେ ଭର୍ତ୍ତି କରାଯିବାର ବ୍ୟବସ୍ଥା ରହିଛି। ହେଲେ କିଛି ମାନସିକ ରୋଗୀ ଏସସିବି କାଜୁଆଲିଟିରେ ଚିକିତ୍ସା ହେବାର କିଛି ସମୟ ମଧ୍ୟରେ କାହାକୁ କିଛି ନ ଜଣାଇ କେଉଁ ଆଡ଼େ ଚାଲିଯାଇଥାନ୍ତି। ଏପରି ବହୁ ରୋଗୀ ନିଖୋଜ ହେଉଥିବା ବେଳେ ସେମାନଙ୍କ ସଂକ୍ରାନ୍ତରେ କୌଣସି ସୂଚନା ରହିପାରୁ ନାହିଁ। ଶେଷରେ ମେଡ଼ିକାଲ କର୍ତ୍ତୃପକ୍ଷ ଉକ୍ତ ରୋଗୀ ନିଖୋଜ ନେଇ ପୁଲିସକୁ ଅବଗତ କରିବା ସହ ‘ଲାମା’ ଲେଖୁଥିବା ଜଣାପଡ଼ିଛି।
ଗୁରୁତ୍ବପୂର୍ଣ୍ଣ କଥା ହେଉଛି ମାନସିକ ରୋଗ ପ୍ରତିଷ୍ଠାନରେ ଜରୁରୀକାଳୀନ ବିଭାଗର ବ୍ୟବସ୍ଥା ନାହିଁ। ତେଣୁ କୌଣସି ମାନସିକ ରୋଗୀ ଦୁର୍ଘଟଣା କିମ୍ବା ଅନ୍ୟ କୌଣସି ସମସ୍ୟାରେ ପଡ଼ିଲେ ସେମାନଙ୍କୁ କାଜୁଆଲିଟିରେ ଭର୍ତ୍ତି କରାଯାଇ ପ୍ରାଥମିକ ଚିକିତ୍ସା କରାଯାଇଥାଏ। ସେମାନଙ୍କୁ ୱାର୍ଡ଼ କିମ୍ବା ବିଭାଗକୁ ସ୍ଥାନାନ୍ତର କରିବା ପୂର୍ବରୁ ଖଣ୍ଡିଆ ଖାବରା ଅବସ୍ଥାରେ ସେମାନେ ଜାଣି ନପାରି ମେଡ଼ିକାଲରୁ ବାହାରକୁ ଚାଲିଯାଇଥାନ୍ତି। କିଛି ସ୍ଥାନରେ ସିସି ଟିଭି ଫୁଟେଜ୍‌ ଆଧାରରେ ସେମାନଙ୍କୁ ଉଦ୍ଧାର କରାଯାଇଥାଏ। ହେଲେ ଅଧିକାଂଶ କ୍ଷେତ୍ରରେ ସେମାନଙ୍କୁ ଠାବ କରାଯାଇ ପାରେନି। ସହରର ଗଳି କନ୍ଦି ବା ରାସ୍ତାକଡ଼ରେ କିଛି ରୋଗୀ କ୍ଷତବିକ୍ଷତ ଅବସ୍ଥାରେ ପଡ଼ିରହିଥାନ୍ତି। ପରବର୍ତ୍ତୀ ସମୟରେ ଉକ୍ତ ଖଣ୍ଡିଆ ସଂକ୍ରମଣ ହୋଇ ସ୍ବାସ୍ଥ୍ୟାବସ୍ଥାକୁ ଜଟିଳ କରିଥିବା ଦେଖିବାକୁ ମିଳିଥାଏ।
୨୦୨୩ ରୁ ୨୦୨୫ ମଧ୍ୟରେ ଏସସିବି ମେଡ଼ିକାଲ କଲେଜ ଏବଂ ହସ୍ପିଟାଲରୁ ପ୍ରାୟ ୪୬ ଜଣ ମାନସିକ ରୋଗୀ ନିଖୋଜ ହୋଇଯାଇଥିବା ରିପୋର୍ଟ ହୋଇଛି। ଦୁର୍ବଳ ବାସହୀନ ବ୍ୟକ୍ତିମାନଙ୍କ ପାଇଁ ମାନସିକ ସ୍ବାସ୍ଥ୍ୟସେବା, ରୋଗୀ ନିରୀକ୍ଷଣ ଏବଂ ପୁନର୍ବାସ ବ୍ୟବସ୍ଥାରେ କେଉଁଠି ନା କେଉଁଠି ଅବହେଳା କରାଯାଉଥିବା ମନେ ହେଉଛି। ଗତବର୍ଷ ଏଭଳି ଏକ ଅଭାବନୀୟ ଘଟଣା ଏସସିବି ମେଡ଼ିକାଲରେ ଦେଖିବାକୁ ମିଳିଥିଲା। ଜଗତପୁର ନିକଟରେ ଜଣେ ୨୨ ବର୍ଷୀୟ ମାନସିକ ଅସ୍ଥିର ମହିଳା ଗଣବଳାତ୍କାରର ଶିକାର ହୋଇଥିବା ଅଭିଯୋଗ ହୋଇଥିଲା। କିଛି ସାମାଜିକ କର୍ମୀ ମହିଳାଙ୍କୁ ଉଦ୍ଧାର କରି ଏସସିବି କାଜୁଆଲିଟିରେ ଭର୍ତ୍ତି କରିଥିଲେ। ମହିଳା ଜଣକ ସୁସ୍ଥ ହେବା ପୂର୍ବରୁ କାଜୁଆଲିଟିରୁ ନିଖୋଜ ହୋଇଯାଇଥିଲେ। ପୁଲିସ ଏହି ଘଟଣାକୁ ନେଇ ଖୋଳତାଡ଼ କରିଥିଲା। ହେଲେ ଉକ୍ତ ମହିଳା ଜଣକ ଟ୍ରେନ୍‌ରେ ବିହାର ପର୍ଯ୍ୟନ୍ତ ଯାଇଥିବା ନେଇ ପୁଲିସ ଜାଣିବାକୁ ପାଇଥିଲା। ହେଲେ ତାଙ୍କର ଏପର୍ଯ୍ୟନ୍ତ ପତ୍ତା ମିଳିପାରିଲା ନାହିଁ। । ଏପରିକି ରାଜ୍ୟରେ ମାନସିକ ସ୍ବାସ୍ଥ୍ୟସେବା ଭିତ୍ତିଭୂମି ଏବଂ ସୁରକ୍ଷା ବ୍ୟବସ୍ଥା ଉପରେ ସ୍ବାସ୍ଥ୍ୟ ବିଭାଗ ଅଧିକ ଗୁରୁତ୍ବ ଦେବାକୁ ଦାବି ହୋଇଛି।

Powered by Froala Editor