ଭୁବନେଶ୍ୱର : କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ(ସିବିଏସ୍‌ଇ) ପରିଚାଳିତ ନବମ ଓ ଦଶମ ଶ୍ରେଣୀ ବିଦ୍ୟାର୍ଥୀଙ୍କ ଲାଗି ଭାଷା ଅଧ୍ୟୟନ ଉପରେ ଏକ ବଡ଼ ପରିବର୍ତ୍ତନ କରିଛନ୍ତି। ଏଣିକି ୩ଟି ଭାଷାରେ ସେମାନେ ଅଧ୍ୟୟନ କରିବେ। ଏହାକୁ ବାଧ୍ୟତାମୂଳକ କରାଯାଇଛି। ଚଳିତ ଶିକ୍ଷାବର୍ଷ ୨୦୨୬-୨୭ରୁ ଅର୍ଥାତ୍ ଆସନ୍ତା ଜୁଲାଇ ପହିଲାରୁ ଏହି ନିୟମ ଲାଗୁ କରାଯିବ। ଏହାକୁ ଆର-୧, ଆର-୨ ଓ ଆର-୩ ନାମକରଣ କରାଯିବ। ତେବେ ତିନୋଟି ଭାଷା ମଧ୍ୟରୁ ଦୁଇଟି ନିଶ୍ଚିତ ରୂପେ ଭାରତୀୟ ଭାଷା ହୋଇଥିବ। ସେହିପରି ନବମ ଶ୍ରେଣୀ ଉତ୍ତୀର୍ଣ୍ଣ ହୋଇ ଦଶମ ଶ୍ରେଣୀରେ ବିଦ୍ୟାର୍ଥୀ ପଢ଼ିଲା ବେଳେ ବାଧ୍ୟତାମୂଳକ ତିନୋଟି ଭାଷାରେ ଅଧ୍ୟୟନ କରିବେ। କୌଣସି ସ୍ଥିତିରେ ଭାଷା ବଦଳାଇ ପାରି‌େ‌ବନାହିଁ। ମାତ୍ର ଦଶମଶ୍ରେଣୀ ବୋର୍ଡ ପରୀକ୍ଷାରେ ପ୍ରଥମ ଏବଂ ଦ୍ବିତୀୟ ଭାଷାରେ ପଢ଼ିଥିବା ବିଷୟ ଗୁଡ଼ିକ ଉପରେ ହିଁ ପରୀକ୍ଷା ହେବ। କିନ୍ତୁ ତୃତୀୟ ଭାଷାର ବିଷୟ ଉପରେ ଇଣ୍ଟରନାଲ ଆସେସ୍‌ମେଣ୍ଟ କରାଯିବ। ଏହାକୁ ବିଦ୍ୟାଳୟ କର୍ତ୍ତୃପକ୍ଷ ଆସେସ୍‌ମେଣ୍ଟ କରି ମାର୍କ ପ୍ରଦାନ କରିବେ। ବିଦ୍ୟାଳୟ ପକ୍ଷରୁ ଦିଆଯାଇଥିବା ତୃତୀୟ ଭାଷା ମାର୍କ ବିଦ୍ୟାର୍ଥୀର ସାର୍ଟିଫିକେଟ୍‌ରେ ଲିପିବଦ୍ଧ କରାଯିବ। ମୋଟ୍‌ ମାର୍କରେ ତୃତୀୟ ଭାଷା ମାର୍କକୁ ହିସାବକୁ ନିଆଯିବ। ଯଦି ତୃତୀୟ ଭାଷା ମାର୍କ ଦୁର୍ବଳ ରହିଲା, ତେବେ ଛାତ୍ରଛାତ୍ରୀ ସାର୍ଟିଫିକେଟ୍‌ରେ ପ୍ରଭାବ ପକାଇବ। ଏନେଇ ସିବିଏସ୍‌ଇ ପକ୍ଷରୁ ବିଦ୍ୟାଳୟ କର୍ତ୍ତୃପକ୍ଷଙ୍କୁ ନିର୍ଦେଶ ଦିଆଯାଇଛି।
ନବମ ଶ୍ରେଣୀର ଛାତ୍ରଛାତ୍ରୀ ୨୦୨୬ ଜୁଲାଇ ପହିଲାରୁ ତିନୋଟି ଭାଷାରେ ବାଧ୍ୟତାମୂଳକ ଶିକ୍ଷା ଗ୍ରହଣ କରିବେ। ଅର୍ଥାତ ଜଣେ ନବମ ଶ୍ରେଣୀ ବିଦ୍ୟାର୍ଥୀ ପ୍ରଥମ ଭାଷା ଇଂରାଜୀ, ଦ୍ବିତୀୟ ଭାଷା ଓଡ଼ିଆ ଓ ତୃତୀୟ ଭାଷା ହିନ୍ଦୀ ରଖିଲା। ତେବେ ଇଂରାଜୀ ଏବଂ ଓଡ଼ିଆ ଭାଷା ବିଷୟ ଗୁଡ଼ିକରେ ପରୀକ୍ଷା ଦେବ ବିଦ୍ୟାର୍ଥୀ। ତୃତୀୟ ଭାଷା ହିନ୍ଦୀ ଉପରେ ପରୀକ୍ଷା କରାଯିବ ନାହିଁ। ଭାରତୀୟ ଦୁଇଟି ଭାଷା ମଧ୍ୟରେ ଓଡ଼ିଆ, ହିନ୍ଦୀ, ସଂସ୍କୃତ, ବଙ୍ଗାଳୀ ଏବଂ ତେଲୁଗୁ ସହିତ ଭାରତ ବର୍ଗର ସମସ୍ତ ଆଞ୍ଚଳିକ ଭାଷା ଅପ୍‌ସନ୍‌ରେ ରହିଛି। କିନ୍ତୁ ବିଦ୍ୟାଳୟରେ ଅନୁଷ୍ଠିତ ହେଉଥିବା ନବମ ଶ୍ରେଣୀ ବାର୍ଷିକ ପରୀକ୍ଷାରେ ଛାତ୍ରଛାତ୍ରୀଙ୍କୁ ତିନୋଟି ଭାଷାରେ ପରୀକ୍ଷା ଦେବାକୁ ପଡ଼ିବ। ଜାତୀୟ ଶିକ୍ଷାନୀତି-୨୦୨୦ ଏବଂ ନ୍ୟାସନାଲ କରିକୁଲମ ଫ୍ରେମ୍‌ୱାର୍କ ଅଫ୍‌ ସ୍କୁଲ ଏଜୁକେସନ-୨୦୨୩ (ଏନ୍‌ସିଏଫ୍-ଏସ୍ଇ)୨୦୨୩ ନୀତି ଅନୁସାରେ ଏହି ନିୟମ ସିବିଏସ୍ଇ ପକ୍ଷରୁ ଲାଗୁ କରାଯାଇଛି।

Powered by Froala Editor