ମୁମ୍ବାଇର ପାଇଧୋନି ଅଞ୍ଚଳରେ ଏକାସାଙ୍ଗରେ ଗୋଟିଏ ପରିବାରର ୪ ଜଣଙ୍କ ମୃତ୍ୟୁ ଘଟଣାରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି । ଏହି ମାମଲାରେ ଦାଖଲ ହୋଇଥିବା ଫୋରେନ୍ସିକ ରିପୋର୍ଟ ମୃତ ବ୍ୟକ୍ତିଙ୍କ ଶରୀରରେ ବିଷ ଥିବା ନିଶ୍ଚିତ କରିଛି। ରିପୋର୍ଟ ଆଧାରରେ, ସନ୍ଦେହ କରାଯାଉଛି ଯେ ତରଭୁଜରେ କୌଣସି ବିଷାକ୍ତ ପଦାର୍ଥ ମିଶାଯାଇ ଥାଇପାରେ, ଯାହା ମୃତ୍ୟୁର କାରଣ ହୋଇଥିଲା। ବର୍ତ୍ତମାନ ତଦନ୍ତକାରୀ ଏଜେନ୍ସିଗୁଡ଼ିକ ରିପୋର୍ଟର ସମସ୍ତ ଦିଗ ଯାଞ୍ଚ କରୁଛନ୍ତି, ଏବଂ ସମଗ୍ର ମାମଲାର ପୁଙ୍ଖାନୁପୁଙ୍ଖ ତଦନ୍ତ ଚାଲିଛି।

ଫରେନସିକ୍ ରିପୋର୍ଟ ଅନୁଯାୟୀ, ମୃତକଙ୍କ ଶରୀରରେ ବିଷ ଥିବା ନିଶ୍ଚିତ ହୋଇଛି । ଏହି ରିପୋର୍ଟ ଆସିବା ପରେ ଏହା କେବଳ ସାଧାରଣ 'ଫୁଡ୍ ପଏଜନିଂ' ନା ଏହା ପଛରେ କୌଣସି ବଡ଼ ଷଡ଼ଯନ୍ତ୍ର ରହିଛି, ସେ ନେଇ ପୋଲିସ ତଦନ୍ତ ତେଜିଛି । ଫରେନସିକ୍ ରିପୋର୍ଟରୁ ଜଣାପଡ଼ିଛି ଯେ, ବିଷର ପ୍ରଭାବ ଏତେ ଭୟଙ୍କର ଥିଲା ଯେ ମୃତକଙ୍କ ଶରୀରର ଭିତର ଅଂଶ ସବୁଜ ପଡ଼ିଯାଇଛି । ମୃତ ବ୍ୟକ୍ତିଙ୍କ ମସ୍ତିଷ୍କ, ହୃଦୟ ଏବଂ ଅନ୍ତନଳୀରେ ସବୁଜ ରଙ୍ଗ ଦେଖିବାକୁ ମିଳିଛି । ଏଥିସହିତ ମୃତ ଅବଦୁଲ୍ଲାଙ୍କ ଶରୀରରେ 'ମର୍ଫିନ୍' ନାମକ ଏକ ଶକ୍ତିଶାଳୀ ଯନ୍ତ୍ରଣା ନାଶକ ଔଷଧର ଅଂଶ ମଧ୍ୟ ମିଳିଛି । ଏହା ଶରୀରରେ କିପରି ପହଞ୍ଚିଲା, ସେ ନେଇ ଡାକ୍ତରୀ ଦଳ ଆଶ୍ଚର୍ଯ୍ୟ ପ୍ରକଟ କରିଛନ୍ତି ।

ଗତ ଏପ୍ରିଲ ୨୬ ତାରିଖରେ ମୁମ୍ବାଇର ପାଇଧୋନି ଅଞ୍ଚଳରେ ଗୋଟିଏ ପରିବାରର ଚାରିଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୪୦ ବର୍ଷୀୟ ସ୍ୱାମୀ ଅବଦୁଲ୍ଲା ଅବଦୁଲ୍ କଦର୍, ୩୫ ବର୍ଷୀୟ ସ୍ତ୍ରୀ ନସରୀନ ଏବଂ ସେମାନଙ୍କର ଦୁଇ ଝିଅ ଆୟେଶା, ଜୈନବ ଥିଲେ।  ପାଇଧୋନି ଅଞ୍ଚଳରେ ରହୁଥିବା ଏହି ପରିବାରର ମୋଟ ୭ ଜଣ ସଦସ୍ୟ ରାତିରେ ଏକାଠି ବିରିୟାନୀ ଖାଇଥିଲେ । ଖାଇବା ପରେ କିଛି ସମ୍ପର୍କୀୟ ନିଜ ଘରକୁ ଫେରିଯାଇଥିଲେ । ରାତି ପ୍ରାୟ ୧ଟାରୁ ୧ଟା ୩୦ ମିନିଟ୍ ମଧ୍ୟରେ ପରିବାରର ୪ ଜଣ ସଦସ୍ୟ ତରଭୁଜ ଖାଇଥିଲେ । ତରଭୁଜ ଖାଇବାର କିଛି ଘଣ୍ଟା ପରେ ହଠାତ୍ ୪ ଜଣଙ୍କ ସ୍ୱାସ୍ଥ୍ୟାବସ୍ଥା ବିଗିଡ଼ି ଯାଇଥିଲା । 

ତରଭୁଜକୁ ଶୀଘ୍ର ପଚାଇବା ପାଇଁ କିମ୍ବା ଲାଲ୍ ଦେଖାଯିବା ପାଇଁ କୌଣସି ମାରାତ୍ମକ ରାସାୟନିକ ପଦାର୍ଥର ଇଞ୍ଜେକ୍ସନ ଦିଆଯାଇଥିଲା କି ? କେହି ଜାଣିଶୁଣି ତରଭୁଜ କିମ୍ବା ଖାଦ୍ୟରେ ବିଷ ମିଶାଇଛି କି? ପୁଲିସ ସେହି ଫଳ ବିକ୍ରେତାଙ୍କୁ ଠାବ କରିବାକୁ ଚେଷ୍ଟା କରୁଛି ।

Powered by Froala Editor