ନୂଆଦିଲ୍ଲୀ: ଓମେନ୍‌ ୨୦ (ଡବ୍ଲ୍ୟୁ୨୦) ଇଣ୍ଡିଆ ନାରୀ ଶକ୍ତି ବନ୍ଦନ ଅଧିନିୟମ ଭାବରେ ଅଣାଯାଇଥିବା ମହିଳା ସଂରକ୍ଷଣ ଏବଂ ସୀମା ପୁନଃନିର୍ଦ୍ଧାରଣ ବିଧିବ୍ୟବସ୍ଥାର କାର୍ଯ୍ୟକାରିତାରେ ବିଳମ୍ବକୁ ନେଇ ଗଭୀର ହତାଶାଭାବ ବ୍ୟକ୍ତ କରିଛି । ଏହି ଯୁଗାନ୍ତକାରୀ ଆଇନ ଭାରତୀୟ ସଂସଦରେ ୨୦୨୩ରେ ଗୃହୀତ ହୋଇଥିବାବେଳେ ଏହାର କାର୍ଯ୍ୟକାରିତା ବାକି ରହିଛି, ଏବଂ ଏହାଦ୍ୱାରା ମହିଳାଙ୍କର ରାଜନୀତି କ୍ଷେତ୍ରରେ ପ୍ରତିନିଧିତ୍ୱ ଏବଂ ମଜଭୁତ ଫଳାଫଳ ଦିଗରେ ଦୀର୍ଘକାଳର ପ୍ରତିବଦ୍ଧତାକୁ ସାକାର କରିବାରେ ଏକ ସୁଯୋଗ ହାତଛଡା ହୋଇଛି ।

ଜି୨୦ର ଏକ ଆନୁଷ୍ଠାନିକ ନିୟୋଜନକାରୀ ଗୋଷ୍ଠ ୀ ଭାବରେ ଡବ୍ଲ୍ୟୁ୨୦ ଇଣ୍ଡିଆ ନିରନ୍ତର ଭାବରେ ମହିଳାଙ୍କ ନେତୃତ୍ୱରେ ବିକାଶ ଏବଂ ସମାବେଶୀ ନିଷ୍ପତ୍ତି ଗ୍ରହଣ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଆସିଛି । ୨୦୨୩ରେ ଭାରତର ଜି୨୦ ଅଧ୍ୟକ୍ଷତା କାଳରେ ଜି୨୦ ନୂଆଦିଲ୍ଲୀ ନେତୃବୃନ୍ଦଙ୍କ ଘୋଷଣାନାମା ଲିଙ୍ଗଗତ ସମାନତା ଏବଂ ନେତୃତ୍ୱର ସମସ୍ତ ସ୍ତରରେ ମହିଳାମାନଙ୍କର ପୂର୍ଣ୍ଣାଙ୍ଗ, ସମାନ ଓ ଅର୍ଥପୂର୍ଣ୍ଣ ଅଂଶଗ୍ରହଣର ଗୁରୁତ୍ୱକୁ ପୁନଃସୁଦୃଢୀକରଣ କରିଥିଲା । ଏହି ଯୁଗାନ୍ତକାରୀ ଆଇନର କାର୍ଯ୍ୟକାରିତାରେ ବିଳମ୍ବ ସେହି ସମସ୍ତ ପ୍ରତିବଦ୍ଧତାର ପରିପନ୍ଥୀ ହୋଇଛି ।

ଡବ୍ଲ୍ୟୁ୨୦ ମଞ୍ଚ ସମେତ ବିଶ୍ୱସ୍ତରରେ ମହିଳାଙ୍କର ନେତୃତ୍ୱ ସପକ୍ଷରେ ଭାରତ ସର୍ବଦା ଏକ ଅଗ୍ରଣୀ ସ୍ୱର ହୋଇ ରହିଆସିଛି । ତେବେ ନାରୀ ଶକ୍ତି ବନ୍ଦନ ଅଧିନିୟମର କାର୍ଯ୍ୟକାରିତାରେ ବିଳମ୍ବ ଆନ୍ତର୍ଜାତିକ ସପକ୍ଷବାଦୀ ଏବଂ ଘରୋଇ ଅଗ୍ରଗତି ମଧ୍ୟରେ ଏକ ଖାଲି ସ୍ଥାନ ସମ୍ପର୍କରେ ଆଲୋକପାତ କରୁଛି । ଡବ୍ଲ୍ୟୁ୨୦ ଇଣ୍ଡିଆ ଏହି ବିଷୟକୁ ଗୁରୁତ୍ୱ ଦେଇ କହୁଛି ଯେ, ଜାତୀୟ ପଦକ୍ଷେପଗୁଡିକରେ ଯେତେବେଳେ ଉଲ୍ଲେଖ କରାଯାଉଥିବା ଅଗ୍ରାଧିକାରତାଗୁଡିକ ପ୍ରତିଫଳିତ ହେବ ସେତେବେଳେ ବୈଶ୍ୱିକ ନେତୃତ୍ୱ ଉପରେ ଭରସା ସୁଦୃଢ ହୋଇପାରିବ । ଏହି ଆଇନ ଜାତିସଂଘ ଦୀର୍ଘସ୍ଥାୟୀ ବିକାଶ ଲକ୍ଷ୍ୟ ୫ ଅଧୀନରେ ଲକ୍ଷ୍ୟଗୁଡିକ ହାସଲ ପ୍ରୟାସକୁ ଆଗେଇନେବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ବିଶେଷକରି ନେତୃତ୍ୱ କ୍ଷେତ୍ରରେ ମହିଳାମାନଙ୍କର ପୂର୍ଣ୍ଣାଙ୍ଗ ଅଂଶଗ୍ରହଣ ଏବଂ ସେମାନଙ୍କୁ ସମାନ ସୁଯୋଗ ପ୍ରଦାନ କ୍ଷେତ୍ରରେ ଏହା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଅଟେ । କିନ୍ତୁ ଏ କ୍ଷେତ୍ରରେ ବାରମ୍ବାର ବିଳମ୍ବ ଏହି ସହଭାଗୀ ଲକ୍ଷ୍ୟଗୁଡିକ ହାସଲ ଅଗ୍ରଗତିକୁ ମନ୍ଥର କରିଦେଉଛି । 

ଆଇନ ପ୍ରଣୟନକାରୀ ସଂସ୍ଥାଗୁଡିକରେ ମହିଳାମାନଙ୍କର ସମାନ ପ୍ରତିନିଧିତ୍ୱ କେବଳ ସମୁଚିତ ବିଷୟ ନୁହେଁ, ବରଂ ଏହା ସମାବେଶୀ ଶାସନ ଏବଂ ଦୀର୍ଘସ୍ଥାୟୀ ବିକାଶର ଏକ ମାଇଲଖୁଣ୍ଟ ବିବେଚିତ ହେଉଛି । ସମୟବଦ୍ଧ କାର୍ଯ୍ୟାନ୍ୱୟନର ଅନୁପସ୍ଥିତି ଏକ ଅଧିକ ପ୍ରତିନିଧିମୂଳକ ଏବଂ ମଜଭୁତ ଗଣତାନ୍ତ୍ରିକ ନେଟୱର୍କ ଦିଗରେ ଗତିଶୀଳତାକୁ ମନ୍ଥର କରିଦେବାର ଆପଦ ସୃଷ୍ଟି କରୁଛି ।

ନିକଟରେ ଅନୁଷ୍ଠିତ ଏକ ବୈଠକରେ ଡବ୍ଲ୍ୟୁ୨୦ ଇଣ୍ଡିଆର ସମସ୍ତ ପ୍ରତିନିଧିଗଣ- ଡ.ସନ୍ଧ୍ୟା ପୁରେଚା, ଡ.ଜ୍ୟୋତି କିରନ୍‌ ଶୁକ୍ଳା, ଶ୍ରୀମତୀ ଭାରତୀ ଘୋଷ, ଡ. ଶମିକା ରବି, ଶ୍ରୀମତୀ ବାଂସୁରୀ ସ୍ୱରାଜ ଏବଂ ଶ୍ରୀମତୀ ଧରିତ୍ରୀ ପଟ୍ଟନାୟକ ପ୍ରମୁଖ ନାରୀ ଶକ୍ତି ବନ୍ଦନ ଅଧିନିୟମକୁ ସମୟବଦ୍ଧ ଭାବରେ କାର୍ଯ୍ୟାନ୍ୱୟନ ସୁନିଶ୍ଚିତ କରିବା ନିମନ୍ତେ ଆଲୋଚନା ଏବଂ ପ୍ରୟାସ ପୁନଃ ଆରମ୍ଭ କରିବା ତଥା ସଂସଦ ଓ ରାଜ୍ୟ ବିଧାନସଭାଗୁଡିକରେ ମହିଳାମାନଙ୍କର ଅର୍ଥପୂର୍ଣ୍ଣ ପ୍ରତିନିଧିତ୍ୱକୁ ଗ୍ୟାରେଣ୍ଟି ଦେଉଥିବା କୋଶଳ ଆଗେଇନେବାକୁ ସମସ୍ତ ସହଭାଗୀଙ୍କୁ ଆହ୍ୱାନ ଦେଇଥିଲେ । ଏହି ଜଟିଳ କାର୍ଯ୍ୟସୂଚୀକୁ ଆଗେଇନେବା ନିମନ୍ତେ ଗଠନମୂଳକ ସହମତି ସୃଷ୍ଟିକାରୀ ଏବଂ ରାଜନୈତିକ ଇଛାଶକ୍ତିର ନିତାନ୍ତ ଆବଶ୍ୟକତା ରହିଛି ।

ଲିଙ୍ଗଗତ ସମାନତା ପ୍ରତି ପ୍ରତିବଦ୍ଧତା ନିମନ୍ତେ ନିର୍ଣ୍ଣାୟକ ନିଷ୍ପତ୍ତିର ସମର୍ଥନ ଜରୁରୀ ବୋଲି ଡବ୍ଲ୍ୟୁ୨୦ ଇଣ୍ଡିଆ ନିଜର ମତକୁ ପୁନଃ ଦୋହରାଇଛି । ନାରୀ ଶକ୍ତି ବନ୍ଦନ ଅଧିନିୟମର ପ୍ରତିଶ୍ରୁତି ସାକାର କରିବାରେ ହେଉଥିବା ବିଳମ୍ବକୁ ସମାନତା, ସମାବେଶୀ ଏବଂ ମହିଳାଙ୍କ ନେତୃତ୍ୱରେ ବିକାଶର ନୀତିଗୁଡିକୁ ବଜାୟ ରଖିବା ଦିଗରେ ଏକ ପ୍ରତିଫଳନକାରୀ ମୁହୂର୍ତ୍ତ ଏବଂ ନବୀକୃତ ଏକନିଷ୍ଠତା ଭାବରେ ବିବେଚନା କରାଯିବା ଉଚିତ । 

ଡବ୍ଲ୍ୟୁ୨୦ ଇଣ୍ଡିଆ ମହିଳାମାନଙ୍କର ରାଜନୈତିକ ଏବଂ ଅର୍ଥନୈତିକ ଅଂଶଗ୍ରହଣ ଉପରେ ଖୁବ୍‌ଶୀଘ୍ର ରାଷ୍ଟ୍ରବ୍ୟାପୀ ସଚେତନତାମୂଳକ ପ୍ରୟାସ, ଆଲୋଚନା କାର୍ଯ୍ୟକ୍ରମ ଏବଂ ସମ୍ମିଳନୀମାନ ଆୟୋଜନ କରିବ ।

Powered by Froala Editor