ଉତ୍ତର, କେନ୍ଦ୍ରୀୟ ଓ ପୂର୍ବ ଭାରତର କିଛି ଅଂଶରେ ତାପମାତ୍ରା ୪୩-୪୪ ଡିଗ୍ରି ସେଲସିୟସ ପର୍ଯ୍ୟନ୍ତ ବୃଦ୍ଧି ପାଇଛି। ଭାରତୀୟ ପାଣିପାଗ ବିଭାଗ (ଆଇଏମ୍‌ଡି) ଆଗାମୀ ଦିନରେ ଅଧିକ ଉତ୍ତାପ ବଢ଼ିବାର ଚେତାବନୀ ଦେଇଛି।  ଏପ୍ରିଲ୍ ମାସ ଶେଷ ହେବାକୁ ଯାଉଥିବା ବେଳେ ଭାରତର ଅଧିକାଂଶ ଅଂଶ ପ୍ରବଳ ଗରମରେ ଡହଳବିକଳ ହେଉଛି।

କିନ୍ତୁ ତା’ ଭିତରେ ଆଶାବାଦୀ ଖବର ମଧ୍ୟ ଅଛି। ନୂତନ ପୂର୍ବାନୁମାନ ଅନୁଯାୟୀ, ଦକ୍ଷିଣ-ପଶ୍ଚିମ ମୌସୁମୀ ଶୀଘ୍ର ଆରମ୍ଭ ହୋଇପାରେ, ଯାହା ମେ ଶେଷ ସୁଦ୍ଧା ଦକ୍ଷିଣ ଭାରତରେ ବର୍ଷା ଆଣିପାରେ। ମୌସୁମୀ ମେ ୧୮ରୁ ୨୫ ମଧ୍ୟରେ ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜରେ ପହଞ୍ଚିବାର ସମ୍ଭାବନା ରହିଛି। ବର୍ତ୍ତମାନ ପାଣିପାଗ ମଡେଲଗୁଡିକ ଦକ୍ଷିଣ ବଙ୍ଗୋପସାଗର ଓ ଆଣ୍ଡାମାନ ସାଗର ଉପରେ ଦକ୍ଷିଣ-ପଶ୍ଚିମ ଦିଗରୁ ପ୍ରବଳ ପବନ ପ୍ରବାହିତ ହେଉଥିବା ଦର୍ଶାଉଛି। ଏହି ପବନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ସେହି ସପ୍ତାହରେ ଦ୍ୱୀପପୁଞ୍ଜରେ ସ୍ୱାଭାବିକଠାରୁ ୩୦ରୁ ୬୦ ମିଲିମିଟର ଅଧିକ ବର୍ଷା ହେବ।

୨୦୨୫ରେ କେରଳରେ ବର୍ଷା ଶୀଘ୍ର ଆରମ୍ଭ ହେବ ବୋଲି ପୂର୍ବାନୁମାନ କରାଯାଇଥିଲା, ମେ ୨୭ରୁ ୨୯ ମଧ୍ୟରେ ଏହାର ଆଗମନ ହେବାର ଆକଳନ କରାଯାଇଥିଲା। ତଥାପି, ମୌସୁମୀ ଆଶା କରାଯାଉଥିବାଠାରୁ ଆହୁରି ଶୀଘ୍ର ଆଗକୁ ବଢିଛି ବୋଲି ମୌସମ ଟାକ୍‌ର ପ୍ରତିଷ୍ଠାତା ଦେବେନ୍ଦ୍ର ତ୍ରିପାଠୀ ଉଲ୍ଲେଖ କରିଛନ୍ତି। 

Powered by Froala Editor