ମଣିଷର ମୃତ୍ୟୁ ପରେ କାର୍କୁ ବି କବର
ଚୀନ୍ ରେ ଜଣେ ବ୍ୟକ୍ତିଙ୍କ ମୃତ୍ୟୁ ପରେ ପରିଜନ ତାଙ୍କ ଶବ ସହ ସେ ବ୍ୟବହାର କରୁଥିବା ଏକ ମର୍ସିଡିଜ୍ କାର୍କୁ ବି କବର ଦେଇଛନ୍ତି । ସାଉଥ୍ ଚାଇନା ମର୍ନିଂ ପୋଷ୍ଟର ରିପୋର୍ଟ ମୁତାବକ, ମାମଲାଟି ଚୀନ୍ର ଲିୟାଓନିଙ୍ଗ ପ୍ରଦେଶର । ସେଠାରେ ଜିନ୍ ପରିବାରର ଜଣେ ବ୍ୟକ୍ତିଙ୍କର ନିକଟରେ ପରଲୋକ ହୋଇଥିଲା । ଏହାପରେ ପରିବାର ସଦସ୍ୟ ସେ ବ୍ୟବହାର କରୁଥିବା ମର୍ସିଡିଜ୍ ବେଞ୍ଜ ଏସ୪୫ଓଏଲ୍ କାର୍କୁ ତାଙ୍କ କବରସ୍ଥଳୀ ନିକଟରେ କବର ଦେବାକୁ ନିଷ୍ପତ୍ତି ନେଇଥିଲେ । ସେହି କାର୍ର ମୂଲ୍ୟ ଭାରତୀୟ ମୁଦ୍ରାରେ ପ୍ରାୟ ୧.୪୯ କୋଟି ହେବ । କେବଳ ସେତିକି ନୁହେଁ, ତାର ନମ୍ବର ପ୍ଲେଟ୍ ‘୮୮୮୮’ ଥିଲା ଯାହାକୁ ଚୀନ୍ରେ ଅତ୍ୟନ୍ତ ଶୁଭ ବୋଲି ମନେ କରାଯାଇଥାଏ । ସେଥିପାଇଁ ଜେସିବି ସହାୟତାରେ ବ୍ୟକ୍ତିଙ୍କ କବର ନିକଟରେ ଏକ ଗାତ ଖୋଳାଯାଇଥିଲା । ପରେ କାର୍କୁ ତାହାମଧ୍ୟରେ ରଖାଯାଇ ମାଟି ଢଙ୍କାଯାଇଥିଲା।
ପରମ୍ପରା ଅନୁସାରେ ଜଣେ ବ୍ୟକ୍ତିଙ୍କ ମୃତ୍ୟୁ ପରେ ତାଙ୍କ ସହ କିଛି ବସ୍ତୁକୁ କବର ଦିଆଯାଇଥାଏ । ପରଲୋକରେ ତାହା ତାଙ୍କର କାମରେ ଆସିବ ବୋଲି ବିଶ୍ୱାସ ରହିଛି । ସେଥିଯୋଗୁ ସେମାନେ ଏହି ପଦକ୍ଷେପ ନେଇଥିଲେ । ତେବେ ସୋସିଆଲ୍ ମିଡିଆରେ ଏହି ଘଟଣାର ଭିଡିଓ ଭାଇରାଲ୍ ହୋଇଛି । ଅନେକ ୟୁଜର ଏହାକୁ ବଦ୍ଖର୍ଚ୍ଚ ଏବଂ ପରିବେଶ ଲାଗି କ୍ଷତିକାରକ ଭାବେ ଦର୍ଶାଇଛନ୍ତି ।
Powered by Froala Editor
