ବିବାଦରେ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’
ପୂର୍ବତନ ସେନାମୁଖ୍ୟ ଜେନେରାଲ ଏମ୍ଏମ୍ ନରବଣେଙ୍କର ଏକ ଅପ୍ରକାଶିତ ପୁସ୍ତକ ପ୍ରସାର ହେବା ଘଟଣାରେ ଦିଲ୍ଲୀ ପୁଲିସ ଏକ ଏତଲା ରୁଜୁ କରିଛି। ଉପଯୁକ୍ତ କର୍ତ୍ତୃପକ୍ଷଙ୍କ ସ୍ବୀକୃତି ବିନା ପୁସ୍ତକ ‘ଫୋର୍ ଷ୍ଟାର୍ସ ଅଫ୍ ଡେଷ୍ଟିନି’ ପ୍ରସାର କରାଯାଇଛି ବୋଲି କର୍ତ୍ତୃପକ୍ଷମାନେ ଜାଣିବା ପରେ ଉକ୍ତ ଘଟଣାକୁ ଗମ୍ଭୀରତାର ସହ ଗ୍ରହଣ କରିଛନ୍ତି।
ବିବାଦ ଜୋର ଧରିବା ପରେ ମୁହଁ ଖୋଲିଛନ୍ତି ପୂର୍ବତନ ସ୍ଥଳସେନା ମୁଖ୍ୟ ଜେନେରାଲ ଏମ୍.ଏମ୍. ନରଭାଣେ। ଏହି ପ୍ରସଙ୍ଗରେ ପବ୍ଲିଶର ସଂସ୍ଥା ‘ପେଙ୍ଗୁଇନ୍ ରାଣ୍ଡମ ହାଉସ୍ ଇଣ୍ଡିଆ’ ପକ୍ଷରୁ ସ୍ପଷ୍ଟୀକରଣ ଜାରି ହେବା ପରେ ଏବେ ଜେନେରାଲ ନରଭାଣେ ନିଜେ ନୀରବତା ଭାଙ୍ଗିଛନ୍ତି।
ପେଙ୍ଗୁଇନ୍ ପକ୍ଷରୁ କୁହାଯାଇଛି ଯେ, ଏହି ପୁସ୍ତକର ସମସ୍ତ ପ୍ରକାଶନ ଅଧିକାର ସେମାନଙ୍କ ପାଖରେ ସଂରକ୍ଷିତ ଅଛି। କିନ୍ତୁ ବର୍ତ୍ତମାନ ସୁଦ୍ଧା ବହିଟି କୌଣସି ବି ଆକାରରେ (ମୁଦ୍ରିତ କିମ୍ବା ଡିଜିଟାଲ୍) ପ୍ରକାଶିତ ହୋଇନାହିଁ। ପ୍ରକାଶକଙ୍କ ଏହି ବୟାନକୁ ସୋସିଆଲ ମିଡିଆରେ ସେୟାର କରି ଜେନେରାଲ ନରଭାଣେ ଲେଖିଛନ୍ତି, “ଏହା ହିଁ ପୁସ୍ତକର ସ୍ଥିତି”। ଏହା ଜରିଆରେ ସେ ପରୋକ୍ଷରେ ସ୍ୱୀକାର କରିଛନ୍ତି ଯେ ବହିଟି ଏପର୍ଯ୍ୟନ୍ତ ବଜାରକୁ ଆସିନାହିଁ।
ପୁଲିସ ସୂତ୍ରରୁ ଜଣାପଡ଼ିଛି ଯେ, ଏହି ସମାନ ଟାଇଟଲ ଥିବା ଏକ ‘ପ୍ରି-ପ୍ରିଣ୍ଟ୍’ ପିଡିଏଫ୍ କପି କିଛି ୱେବସାଇଟ୍ରେ ଉପଲବ୍ଧ ଅଛି। ପେଙ୍ଗୁଇନ ରୢାଣ୍ଡମ ହାଉସ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଦ୍ବାରା ଏହା ପ୍ରସ୍ତୁତ ହୋଇଥିବା କୁହାଯାଉଛି। ତଦନ୍ତକାରୀ ଦଳ ଜାଣିଛନ୍ତି ଯେ, କିଛି ଅନଲାଇନ ମାର୍କେଟିଂ ଓ ରିଟେଲ ପ୍ଲାଟଫର୍ମ ପୁସ୍ତକର କଭର୍କୁ ଏଭଳି ଭାବେ ଦେଖାଇଛନ୍ତି ଯେ, ଯେମିତି ଏହା ବିକ୍ରି ପାଇଁ ଉପଲବ୍ଧ ହୋଇଛି।
Powered by Froala Editor
