ଭୁବନେଶ୍ବର: କିଛିଦିନ ହେଲା ରାଜ୍ୟର ବିଭିନ୍ନ ଅଞ୍ଚଳରେ ଘନ କୁହୁଡ଼ି ଦୃଶ୍ୟମାନ ହେଉଛି। ଆଗକୁ ଦୃଶ୍ୟମାନ ଦୂରତା କମ ରହିବା ହେତୁ ଗାଡ଼ିମୋଟର ଚଳାଚଳରେ ସମସ୍ୟା ଉପୁଜୁଛି। ଅନେକ ସ୍ଥଳେ ଦୁର୍ଘଟଣାମାନ ଘଟୁଛି। ଶନିବାର ସକାଳେ ଢେଙ୍କାନାଳ, ଫୁଲବାଣୀ, ରାଉରକେଲା, କୋରାପୁଟ ଏବଂ ଭୁବନେଶ୍ବରରେ କୁହୁଡ଼ି ଦୃଶ୍ୟମାନ ହୋଇଛି। ଆସନ୍ତା ୩୧ ପର୍ଯ୍ୟନ୍ତ ବିଭିନ୍ନ ଜିଲାରେ ସକାଳ ସମୟରେ ଘନ କୁହୁଡ଼ି ହେବାର ସମ୍ଭାବନା ଥିବାରୁ ପାଣିପାଗ ବିଭାଗ ପକ୍ଷରୁ ୟେଲୋ ୱାର୍ଣ୍ଣିଂ ଜାରି କରାଯାଇଛି।

ସେହିପରି ଆସନ୍ତା ୩ଦିନ ପରେ ରାଜ୍ୟର ସର୍ବନିମ୍ନ ତାପମାତ୍ରା ୨ରୁ ୩ଡିଗ୍ରୀ ପର୍ଯ୍ୟନ୍ତ ବୃଦ୍ଧି ସହ ଶୀତ ପ୍ରକୋପ ହ୍ରାସ ସମ୍ଭାବନା ରହିଛି। ଗତ ୨୪ଘଣ୍ଟା ମଧ୍ୟରେ ରାଜ୍ୟର ସର୍ବନିମ୍ନ ତାପମାତ୍ରା ସବୁଠୁ କମ କନ୍ଧମାଳ ଜିଲାର ଘୁ.ଉଦୟଗିରିରେ ୪.୪ଡିଗ୍ରୀ ରହିଛି। ଦାରିଙ୍ଗବାଡ଼ିରେ ୬ ଏବଂ ଫୁଲବାଣୀରେ ୬.୪ ଡିଗ୍ରୀ ରହିଛି। କୋରାପୁଟ ଜିଲାର ସେମିଳିଗୁଡ଼ାରେ ପାରଦ ୬.୭ ଡିଗ୍ରୀ ଥିବାବେଳେ କୋରାପୁଟରେ ୬.୬ ଡିଗ୍ରୀ ରେକର୍ଡ ହୋଇଛି। କୋରାପୁଟ ଏବଂ କନ୍ଧମାଳରେ ହାଡ଼ଭଙ୍ଗା ଜାଡ଼ ଲାଗି ରହିଛି। 

ରବିବାର ସକାଳେ ଗଜପତି, ମୟୂରଭଞ୍ଜ, କେନ୍ଦୁଝର, ଜଗତସିଂହପୁର, ନୟାଗଡ଼, ଖୋର୍ଦ୍ଧା, କଟକ, ଅନୁଗୋଳ, ଢେଙ୍କାନାଳ, କଳାହାଣ୍ଡି, କନ୍ଧମାଳ, ସୁବର୍ଣ୍ଣପୁର, ପୁରୀ, କୋରାପୁଟ, କେନ୍ଦ୍ରାପଡ଼ା ଏବଂ ଗଞ୍ଜାମ ଜିଲାର କିଛି ଅଞ୍ଚଳରେ କୁହୁଡ଼ି ହେବା ସମ୍ଭାବନା ରହିଛି। ସୁନ୍ଦରଗଡ଼, କନ୍ଧମାଳ, ଢେଙ୍କାନାଳ, ନୟାଗଡ଼ ଏବଂ କୋରାପୁଟ ଜିଲାକୁ ଘନ କୁହୁଡ଼ି ପାଇଁ ୟେଲୋ ୱାର୍ଣ୍ଣିଂ ଜାରି ହୋଇଛି।

Powered by Froala Editor