ଇଣ୍ଡିଗୋ ବର୍ତ୍ତମାନ ଗମ୍ଭୀର ସମସ୍ୟା ଦେଇ ଗତି କରୁଛି। ଗତ ଚାରି ଦିନ ଧରି ବିମାନ ଚଳାଚଳରେ ବିଳମ୍ବ ଏବଂ ବାତିଲ ହେବା ଯାତ୍ରୀମାନଙ୍କୁ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଛନ୍ତି। କେବଳ ଗୁରୁବାର ଦିନ, ୫୫୦ରୁ ଅଧିକ ବିମାନ ବାତିଲ କରାଯାଇଥିଲା, ଯାହା ଫଳରେ ଦିଲ୍ଲୀ, ହାଇଦ୍ରାବାଦ, ଗୋଆ ଏବଂ ମୁମ୍ବାଇ ଭଳି ପ୍ରମୁଖ ବିମାନବନ୍ଦରରେ ବିଶୃଙ୍ଖଳା ସୃଷ୍ଟି ହୋଇଥିଲା। 

ଦିଲ୍ଲୀ ବିମାନବନ୍ଦରରେ ଯାତ୍ରୀମାନେ ବିମାନ କମ୍ପାନୀ ଉପରେ ସେମାନଙ୍କର କ୍ରୋଧ ପ୍ରକାଶ କରିଥିଲେ। ଜଣେ ଯାତ୍ରୀ କହିଥିଲେ, "ଆମେ ଏକ ବିବାହ ଉତ୍ସବକୁ ଯାଉଥିଲୁ, ଏବଂ ଆମର ଲଗେଜ୍ ହଜିଯାଇଛି। ୧୨ ଘଣ୍ଟା ପରେ ମଧ୍ୟ, ଇଣ୍ଡିଗୋ ତରଫରୁ କୌଣସି ପ୍ରତିକ୍ରିୟା ମିଳିନାହିଁ। ଅନ୍ୟ ଜଣେ ମହିଳା ଯାତ୍ରୀ କହିଥିଲେ, "୧୪ ଘଣ୍ଟା ହେଲାଣି ଆମେ କୌଣସି ଖାଦ୍ୟ କିମ୍ବା ପାଣି ପାଇନାହୁଁ। ଆମେ ବିମାନର କର୍ମଚାରୀଙ୍କ ସହ କଥା ହେବାକୁ ଚେଷ୍ଟା କରୁଛୁ, କିନ୍ତୁ ସେମାନଙ୍କ ତରଫରୁ କୌଣସି ଉତ୍ତର ଆସୁନାହିଁ।

ଶୁକ୍ରବାର ଇଣ୍ଡିଗୋର ୭୦୦ରୁ ଅଧିକ ବିମାନ ବାତିଲ ହେବା ଏବଂ ବିମାନ ବନ୍ଦରଗୁଡ଼ିକରେ ଉତ୍ତମ ଅବ୍ୟବସ୍ଥା ଦେଖାଯିବା ପରେ, ବିମାନ ଚଳାଚଳ ମହାନିର୍ଦ୍ଦେଶାଳୟ (DGCA) ନୂତନ କ୍ରୁ ରୋଷ୍ଟରିଂ ନିୟମ ପ୍ରତ୍ୟାହାର କରିଛି, ଯାହା ଅନୁଯାୟୀ ବିମାନ କମ୍ପାନୀଗୁଡ଼ିକ କ୍ରୁ ଏବଂ ପାଇଲଟଙ୍କ ଛୁଟିକୁ ସାପ୍ତାହିକ ବିଶ୍ରାମ ଭାବରେ ଗଣି ପାରିବେ ନାହିଁ।

କ୍ରୁ ଏବଂ ପାଇଲଟଙ୍କ ଥକ୍କାପଣକୁ ହ୍ରାସ କରିବା ଉଦ୍ଦେଶ୍ୟରେ ସଂଶୋଧିତ ‘ଫ୍ଲାଇଟ୍ ଡ୍ୟୁଟି ଟାଇମ୍ ଲିମିଟେସନ୍ସ’ (FDTL) ନିୟମ ନଭେମ୍ବର ୧ରୁ କାର୍ଯ୍ୟକାରୀ ହୋଇଥିଲା।  ସଂଶୋଧିତ FDTL ଅନୁଯାୟୀ ‘ସାପ୍ତାହିକ ବିଶ୍ରାମ ପାଇଁ କୌଣସି ଛୁଟି ବଦଳରେ ରଖାଯିବ ନାହିଁ’ ବୋଲି ଥିବା ନିର୍ଦ୍ଦେଶକୁ DGCA ତୁରନ୍ତ ପ୍ରତ୍ୟାହାର କରିନେଇଛି। ନୂତନ FDTL ନିୟମ ଲାଗୁ ହେବା ପରେ କ୍ରୁ ସଙ୍କଟ ଯୋଗୁଁ ଇଣ୍ଡିଗୋରେ ଏହି ବାଧା ସୃଷ୍ଟି ହୋଇଛି। ଏହି ଆଂଶିକ କୋହଳ ଇଣ୍ଡିଗୋ ଭଳି ବିମାନ କମ୍ପାନୀଗୁଡ଼ିକୁ ରୋଷ୍ଟର ଫ୍ଲେକ୍ସିବିଲିଟି ପ୍ରଦାନ କରିବ।

ଇଣ୍ଡିଗୋର ସିଇଓ ପିଟର ଏଲବର୍ସ କର୍ମଚାରୀମାନଙ୍କୁ ଜଣାଇ ଦେଇଛନ୍ତି ଯେ ସମୟସୀମାରେ ବିମାନ ଚଳାଚଳ ଆରମ୍ଭ କରିବା ସହଜ ହେବ ନାହିଁ। ପରିସ୍ଥିତିକୁ ସୁଧାରିବା ପାଇଁ ଆମେ ଚେଷ୍ଟା କରୁଛୁ ବୋଲି ସେ କହିଛନ୍ତି।

Powered by Froala Editor