ପାକିସ୍ତାନୀ ଗୋଇନ୍ଦା ସଂସ୍ଥା ଆଇଏସ୍‌ଆଇର ଜଣେ ଏଜେଣ୍ଟଙ୍କୁ ଟଙ୍କା ବଦଳରେ ଅପରେଶନ ସିନ୍ଦୂର ସମେତ ପ୍ରତିରକ୍ଷା ସମ୍ପର୍କିତ ସମ୍ବେଦନଶୀଳ ବିବରଣୀ ଦେଇଥିବା ଭାରତୀୟ ନୌସେନାର ଜଣେ କିରାଣିଙ୍କୁ ଜୟପୁରରୁ ଗିରଫ କରାଯାଇଛି। ଅଭିଯୁକ୍ତ ହେଲେ ହରିୟାଣାର ରେଓ୍ବାଡ଼ି ଅନ୍ତର୍ଗତ ପୁଂଶିକା ଗ୍ରାମର ବିଶାଲ ଯାଦବ। ସେ ଦିଲ୍ଲୀସ୍ଥିତ ନୌସେନା ମୁଖ୍ୟାଳୟରେ କିରାଣି ରୂପେ କାର୍ଯ୍ୟ କରୁଥିଲେ।

ଗୁଇନ୍ଦା ଅଧିକାରୀଙ୍କ ସୂଚନା ଅନୁସାରେ, ବିଶାଲ ପାକିସ୍ତାନର ଜଣେ ମହିଳାଙ୍କ ସହିତ ଲଗାତର ଯୋଗାଯୋଗରେ ରହିଥିଲେ। ହରିୟାଣା ଆଇଜିପି ବିଷ୍ଣକାନ୍ତ ଗୁପ୍ତା କହିଛନ୍ତି, ବିଶାଲଙ୍କ ସମେତ କିଛି ଲୋକଙ୍କ ଉପରେ ଗୁପ୍ତଚରି ସନ୍ଦେହ ହେବାରୁ ଗୁଇନ୍ଦା ବିଭାଗ ପକ୍ଷରୁ ସେମାନଙ୍କ କାର୍ଯ୍ୟକଳାପ ଉପରେ ନଜର ରଖାଯିବା ସହିତ ଯାଞ୍ଚ କରାଯାଉଥିଲା। ସେଥିରୁ ଜଣାପଡ଼ିଥିଲା ଯେ, ବିଶାଲ ପାକିସ୍ତାନୀ ଗୁଇନ୍ଦା ସଂସ୍ଥା ପାଇଁ କାର୍ଯ୍ୟ କରୁଛନ୍ତି। ସେ ପ୍ରତିରକ୍ଷା ବିଭାଗର କିଛି ଗୁରୁତ୍ଵପୂର୍ଣ୍ଣ ତଥ୍ୟ ପାକିସ୍ତାନର ଜଣେ ମହିଳାଙ୍କୁ ଦେଇଥିବା ଜଣାପଡ଼ିଥିଲା।

ଭାରତୀୟ ମହିଳା ପରିଚୟ ଦେଉଥିବା ପାକିସ୍ତାନୀ ମହିଳା ହ୍ୟାଣ୍ଡଲରଙ୍କୁ ସେ ପ୍ରତିରକ୍ଷା ସମ୍ପର୍କିତ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଥିଲେ। ଏଥିପାଇଁ ସେ ମୋଟ ୨ ଲକ୍ଷ ଟଙ୍କା ଗ୍ରହଣ କରିଥିବା ସ୍ବୀକାର କରିଛନ୍ତି। ଅପରେଶନ ସିନ୍ଦୂର ତଥ୍ୟ ଦେବା ପାଇଁ ସେ ୫୦,୦୦୦ ଟଙ୍କା ପାଇଥିଲେ ବୋଲି କହିଛନ୍ତି।

ତାଙ୍କ ବିରୋଧରେ ବିଭିନ୍ନ ତଦନ୍ତକାରୀ ସଂସ୍ଥା ମିଳିତ ତଦନ୍ତ କରିବେ ବୋଲି ଜଣାପଡ଼ିଛି। ଗୋଇନ୍ଦା ସୂତ୍ର ଅନୁଯାୟୀ, ପ୍ରିୟା ଶର୍ମା ନାମରେ ଫେସ୍‌ବୁକ୍‌ରେ ମିଛ ପରିଚୟ ଦେଇଥିବା ପାକିସ୍ତାନୀ ହ୍ୟାଣ୍ଡଲରଙ୍କୁ ବନ୍ଧୁତା ଅନୁରୋଧକୁ ଯାଦବ ଗ୍ରହଣ କରିବା ପରେ ସେମାନଙ୍କ ମଧ୍ୟରେ ଯୋଗାଯୋଗ ହୋଇଥିଲା। ପରେ ସେମାନେ ହ୍ବାଟ୍ସଆପ୍‌ ଏବଂ ଟେଲିଗ୍ରାମ ଜରିଆରେ ନିୟମିତ ଯୋଗାଯୋଗରେ ରହିଥିଲେ।

Powered by Froala Editor