ନୂଆଦିଲ୍ଲୀ : ପ୍ରତି ମାସ ଭଳି ଜୁନ୍‌ ମାସ ପହିଲାରେ ମଧ୍ୟ ଅନେକ ପରିବର୍ତ୍ତନ ହେବାକୁ ଯାଉଛି । ଯାହାର ପ୍ରଭାବ ସିଧାସଳଖ ସର୍ବ ସାଧାରଣଙ୍କ ପକେଟ୍‌ ଉପରେ ପଡିବାବୁ ଯାଉଛି । ୟୁପିଆଇ ଏବଂ ପିଏଫ୍ ଠାରୁ ଆରମ୍ଭ କରି ଏଲପିଜି ସିଲିଣ୍ଡର ମୂଲ୍ୟ ପର୍ଯ୍ୟନ୍ତ ଜୁନ୍ ୧ରୁ ଅନେକ ନିୟମ ପରିବର୍ତ୍ତନ ହେବାକୁ ଯାଉଛି। ଏହି ପରିବର୍ତ୍ତନ ଗୁଡ଼ିକ କିଛି ସୁବିଧା ବୃଦ୍ଧି କରିବ, କିଛି କ୍ଷେତ୍ରରେ ଅତିରିକ୍ତ ଶୁଳ୍କ ମଧ୍ୟ ଦେବାକୁ ପଡ଼ିପାରେ। ଜାଣନ୍ତୁ ଜୁନ୍ ଠାରୁ ଲାଗୁ ହେବାକୁ ଥିବା ଏହି ପରିବର୍ତ୍ତନଗୁଡ଼ିକ କ’ଣ।

ସରକାର କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ (ଇପିଏଫଓ)ର ଏକ ନୂତନ ଏବଂ ଉନ୍ନତ ସଂସ୍କରଣ, ଇପିଏଫଓ ୩.୦ ଲଞ୍ଚ କରିବାକୁ ପ୍ରସ୍ତୁତ ହେଉଛନ୍ତି। ଏହାକୁ ଜୁନ୍ ମାସରେ ଲଞ୍ଚ କରାଯାଇପାରେ । ଏହା ଆରମ୍ଭ ହେବା ପରେ ପିଏଫ ଦାବି କରିବା ବହୁତ ସହଜ ହୋଇଯିବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଭବିଷ୍ୟତରେ ଏଟିଏମ୍‌ ଏବଂ ୟୁପିଆଇ ମାଧ୍ୟମରେ ମଧ୍ୟ ଆପଣଙ୍କର ପିଏଫ ଆକାଉଣ୍ଟରୁ ଟଙ୍କା ଉଠାଇପାରିବେ। ଏହି ପରିବର୍ତ୍ତନ ଦେଶର ୯ କୋଟିରୁ ଅଧିକ ପିଏଫ ଆକାଉଣ୍ଟଧାରୀଙ୍କୁ ସିଧାସଳଖ ଲାଭ ଦେବ।

ଏନପିସିଆଇ ୟୁପିଆଇ ସମ୍ପର୍କରେ ଏକ ନୂତନ ନିୟମ ଲାଗୁ କରିଛି, ଯାହା ଅନୁଯାୟୀ ୟୁପିଆଇ ପେମେଣ୍ଟ କରିବା ସମୟରେ ବ୍ୟବହାରକାରୀମାନେ ଏବେ କେବଳ ପ୍ରକୃତ ପ୍ରାପ୍ତକର୍ତ୍ତାଙ୍କ ବ୍ୟାଙ୍କିଂ ନାମ ଦେଖିପାରିବେ। କ୍ୟୁଆର୍‌ କୋଡ୍ କିମ୍ବା ସମ୍ପାଦିତ ନାମ ଆଉ ଦୃଶ୍ୟମାନ ହେବ ନାହିଁ। ଏହି ନିୟମ ୩୦ ଜୁନ୍ ସୁଦ୍ଧା ସମସ୍ତ ୟୁପିଆଇ ଆପ୍ ଦ୍ୱାରା ଲାଗୁ କରିବାକୁ ପଡିବ।

Powered by Froala Editor