କାନ୍ସ ଫିଲ୍ମ ଫେଷ୍ଟିଭାଲରେ ଏଣ୍ଟ୍ରି କରିଛନ୍ତି ଐଶ୍ୱର୍ଯ୍ୟା ରାୟ ବଚ୍ଚନ । ନୀଳ ନୟନା ଐଶ୍ବର୍ଯ୍ୟା ରାୟ ତାଙ୍କ ସିନ୍ଥିରେ ସିନ୍ଥିଏ ସିନ୍ଦୂର ପିନ୍ଧି ସଭିଙ୍କ ଦୃଷ୍ଟି ଆକର୍ଷଣ କରିଛନ୍ତି।  ୭୮ତମ କାନ୍ସ ଫିଲ୍ମ ଫେଷ୍ଟିଭାଲ ପାଇଁ ଐଶ୍ୱର୍ଯ୍ୟା ଫ୍ୟାଶନ୍‍ ଡିଜାଇନର ମନୀଷ ମାଲହୋତ୍ରାଙ୍କ ଦ୍ୱାରା ଡିଜାଇନ୍‍ କରାଯାଇଥିବା ଏକ ସୁନ୍ଦର ଶାଢି ବାଛିଥିଲେ । ତାଙ୍କର ଏହି ଲୁକ୍‍ ପ୍ରଶଂସକଙ୍କୁ ବେଶ ପସନ୍ଦ ଆସିବା ସହ ଅନେକ ଉଠିଥିବା ପ୍ରଶ୍ନର ଜବାବ ମଧ୍ୟ ଦେଇଥିଲା ।

ହାତବୁଣା ପୋଷାକ ସହ ଧଳା ଟିସୁ ହାତବୁଣା ଦୁପଟ୍ଟା ପକାଇଥିଲେ ଐଶ୍ବର୍ଯ୍ୟା। ଐଶ୍ୱର୍ଯ୍ୟାଙ୍କ ଅଳଙ୍କାର ବହୁତ ସୁନ୍ଦର ହୋଇଥିବାରୁ ଏହା ତାଙ୍କୁ ରାଜକୀୟ ଲୁକ୍‍ ଦେଇଥିଲା । ସେ ଏପରି ଏକ ହାର ପିନ୍ଧିଥିଲେ ଯେଉଁଥିରେ ୫୦୦କ୍ୟାରେଟରୁ ଅଧିକ ମୋଜାମ୍ବିକ ମାଣିକ ଏବଂ ହୀରା ବ୍ୟବହାର ହୋଇଥିଲା । ସବୁକିଛି ୧୮କ୍ୟାରେଟ ସୁନାରେ ସଜ୍ଜିତ ଥିଲା । ତାଙ୍କ ମଥାର ସିନ୍ଦୂର ‘ଅପରେସନ୍‌ ସିନ୍ଦୂର’କୁ ସମର୍ଥନ ଜଣାଇବା ସହ ଦୀର୍ଘ ଦିନ ଧରି ଚାଲିଥିବା ତାଙ୍କ ଛାଡ଼ପତ୍ର ଚର୍ଚ୍ଚା ଉପରେ ପୂର୍ଣ୍ଣଚ୍ଛେଦ ପକାଇଛି।

ଭାରତ ଏବେ ୩୩ଟି ଦେଶକୁ ନିଜର ପ୍ରତିନିଧିମଣ୍ଡଳ ପଠାଉଛି । ସେମାନେ ୨୨ଏପ୍ରିଲରେ ପହଲଗାଓଁ ଆକ୍ରମଣ ପରେ ହୋଇଥିବା ଅପରେସନ ସିନ୍ଦୂର ସମ୍ପର୍କରେ ଆଲୋଚନା କରିବା ସହ ଆତଙ୍କବାଦୀଙ୍କୁ ପାଳୁଥିବା ଦେଶ ପାକିସ୍ତାନର ଅସଲ ମୁଖା ଖୋଲିବେ । ତେବେ ଏହାରି ଭିତରେ ଐଶ୍ୱର୍ଯ୍ୟା ରାୟ ବଚ୍ଚନଙ୍କ ମଥାରେ ସଜ୍ଜିତ ସିନ୍ଦୂର ଏକକାଳୀନ ଦୁଇଟି ବାର୍ତ୍ତା ଦେଇଛି । ପ୍ରଥମତଃ କାନ୍ସରେ ଭାରତର ସଂସ୍କୃତି ଉପସ୍ଥାପନା ଏବଂ ଅପରେସନ ସିନ୍ଦୂରର ଉପସ୍ଥାପନା । ଦ୍ୱିତୀୟରେ ଏହା ଐଶ୍ୱର୍ଯ୍ୟା ଏବଂ ତାଙ୍କ ସ୍ୱାମୀ ଅଭିଷେକ ବଚ୍ଚନଙ୍କ ମଧ୍ୟରେ ଗତ କିଛି ମାସ ଧରି ଚାଲିଥିବା ଛାଡପତ୍ର ଗୁଜବର ଅନ୍ତ ଘଟାଇଛି ।

Powered by Froala Editor