ଭାରତ ସରକାର ତୁର୍କୀ ବିରୁଦ୍ଧରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ଜାତୀୟ ସୁରକ୍ଷାକୁ କାରଣ ଦର୍ଶାଇ ସିଭିଲ ଏଭିଏସନ୍ ସିକ୍ୟୁରିଟି ବ୍ୟୁରୋ ତୁର୍କୀ ବିମାନବନ୍ଦରର ଗ୍ରାଉଣ୍ଡ ହ୍ୟାଣ୍ଡଲିଂ କମ୍ପାନୀ ସେଲେବି ବିମାନବନ୍ଦର ସେବାର ସୁରକ୍ଷା କ୍ଲିୟରାନ୍ସକୁ ବାତିଲ କରିଛି ।

ଭାରତର ୯ଟି ବିମାନବନ୍ଦରରେ ତୁର୍କୀର ସେଲେବି ଆଭିଏସନ ସେବା ପ୍ରଦାନ କରୁଛି। ଏସବୁ ବିମାନବନ୍ଦର ହେଉଛି ଦିଲ୍ଲୀ, ମୁମ୍ବଇ, ବେଙ୍ଗାଲୁରୁ, ହାଇଦ୍ରାବାଦ, ଚେନ୍ନାଇ, ଅହମଦାବାଦ, ଗୋଆ, କୋଚି ଏବଂ କନ୍ନୁର। ସିଭିଲ ଆଭିଏସନ ସିକ୍ୟୁରିଟି ବ୍ୟୁରୋ(ବିସିଏଏସ)ର ଯୁଗ୍ମ ନିର୍ଦେଶକ ସୁନିଲ ଯାଦବ ସୁରକ୍ଷା ମଞ୍ଜୁରୀ ପ୍ରତ୍ୟାହାର ନେଇ ନିର୍ଦେଶ ଜାରି କରିଛନ୍ତି। ସେ କହିଛନ୍ତି, ୨୦୨୨ ନଭେମ୍ବର ୨୧ରେ ବିସିଏଏସ ପକ୍ଷରୁ ସେଲେବି କମ୍ପାନୀକୁ ସୁରକ୍ଷା ମଞ୍ଜୁରୀ ପ୍ରଦାନ କରାଯାଇଥିଲା। ଏହାକୁ ପ୍ରତ୍ୟାହାର କରିନିଆଯାଇଛି।

ମୁମ୍ବାଇର ସିନ୍ଦେ ଗୋଷ୍ଠୀର ଏକ ପ୍ରତିନିଧିମଣ୍ଡଳୀ ମେ ୧୩ ତାରିଖରେ ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ପ୍ରତିବାଦ କରିଥିଲେ । ଦାବି କରିଥିଲେ ଯେ ମୁମ୍ବାଇ ବିମାନବନ୍ଦର ତୁର୍କୀ କମ୍ପାନୀ ସେଲେବି ବିମାନବନ୍ଦର ସେବା ସହିତ ତାର ସମ୍ପର୍କ ଶେଷ କରୁ । ସେଲେବି ମୁମ୍ବାଇ ବିମାନବନ୍ଦରରେ ପ୍ରାୟ 70 ପ୍ରତିଶତ ଭୂମି କାର୍ଯ୍ୟ ପରିଚାଳନା କରନ୍ତି । ଏଥିରେ ଯାତ୍ରୀ ସେବା, ଭାର ନିୟନ୍ତ୍ରଣ, ବିମାନ ପରିଚାଳନା, କାର୍ଗୋ ଏବଂ ଡାକ ସେବା, ଗୋଦାମ ଏବଂ ସେତୁ ପରିଚାଳନା ଅନ୍ତର୍ଭୁକ୍ତ ।

ଦିଲ୍ଲୀର JNU ଏବଂ ୟୁପିର କାନପୁର ବିଶ୍ୱବିଦ୍ୟାଳୟ ମଧ୍ୟ ତୁର୍କୀ ବିଶ୍ୱବିଦ୍ୟାଳୟ ସହିତ ଚୁକ୍ତି ଭାଙ୍ଗିଥିଲେ । ତୁର୍କୀ ସେଓକୁ ବର୍ଜନ କରାଯାଉଛି । କେବଳ ଏତିକି ନୁହେଁ, ତୁର୍କୀରେ ଫିଲ୍ମ ସୁଟିଂ ଉପରେ ରୋକ ଲଗାଇବାକୁ ଦାବି ହେଉଛି ।

Powered by Froala Editor