ଜମ୍ମୁ-କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରଠାରୁ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇବାରେ ଲାଗିଛି। ଏହି ସମୟରେ ଭାରତ ସରକାର ସ୍ପଷ୍ଟ କରିଛନ୍ତି ଯେ ପହଲଗାମ ଆକ୍ରମଣର ପ୍ରତିଶୋଧ ନିଶ୍ଚିତ ଭାବରେ ନିଆଯିବ। ଏହି ପରିପ୍ରେକ୍ଷୀରେ ମେ’ ୭ରେ ଦେଶର ୨୪୪ଟି ଜିଲାରେ ଏକ ମକ ଡ୍ରିଲ ହେବାକୁ ଯାଉଛି। 

୧୯୭୧ ପରେ ଏହା ପ୍ରଥମ ଥର ପାଇଁ କେନ୍ଦ୍ର ସରକାରଙ୍କ ଦ୍ୱାରା ଏପରି ନିର୍ଦ୍ଦେଶ ଜାରି କରାଯାଇଛି। ଆକ୍ରମଣ ହେଲେ, ବୁଧବାର (୭ ମଇ, ୨୦୨୫) ଦିନ ନାଗରିକ ପ୍ରତିରକ୍ଷା ତାଲିମ ଅନୁଷ୍ଠିତ ହେବ। ଭାରତ ସହିତ ଉତ୍ତେଜନା ବୃଦ୍ଧି ପାଇବା ମଧ୍ୟରେ ପାକିସ୍ତାନ ଦୁଇ ଦିନ ମଧ୍ୟରେ ଦ୍ୱିତୀୟ କ୍ଷେପଣାସ୍ତ୍ର ପରୀକ୍ଷଣ କରିବାର କିଛି ଘଣ୍ଟା ପରେ ଏହି ନିର୍ଦ୍ଦେଶ ଦିଆଯାଇଛି। ପାକିସ୍ତାନ ପ୍ରଧାନମନ୍ତ୍ରୀ ଶହବାଜ ସରିଫ କହିଛନ୍ତି ଯେ ସଫଳ ପରୀକ୍ଷଣ ସ୍ପଷ୍ଟ କରିଛି ଯେ ପାକିସ୍ତାନର ପ୍ରତିରକ୍ଷା ମଜଭୁତ ଅଛି।

ସମ୍ପ୍ରତି ପ୍ରଧାନମନ୍ତ୍ରୀ ମୋଦିଙ୍କଠାରୁ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ପର୍ଯ୍ୟନ୍ତ, ସମସ୍ତେ ତିନି ସେନା ମୁଖ୍ୟଙ୍କ ସହ ସାକ୍ଷାତ କରିଛନ୍ତି। ଏହି କାରଣରୁ ଜମ୍ମୁ-କାଶ୍ମୀରରେ ଅଧିକ ସଂଖ୍ୟକ ସେନାଙ୍କୁ ମୁତୟନ କରାଯାଇଛି। ମକ ଡ୍ରିଲ ସମ୍ପର୍କରେ ଏକ ତାଲିକା ପ୍ରକାଶ ପାଇଛି। ଯେଉଁଥିରେ ସାରା ଦେଶର ୨୪୪ ଜିଲାର ନାମ ଅନ୍ତର୍ଭୁକ୍ତ। 

ଏହି ମକ୍‌ ଡ୍ରିଲ୍‌ ସମୟରେ ବ୍ଲାକଆଉଟ ହେବ। ଏହାର ଅର୍ଥ ହେଉଛି ଆକ୍ରମଣ ସମୟରେ ସମସ୍ତ ଘର, କାର୍ଯ୍ୟାଳୟ ଏବଂ ସାର୍ବଜନୀନ ସ୍ଥାନର ଲାଇଟ ବନ୍ଦ ହୋଇଯିବ। ଏହା ସହିତ ଜୋରରେ ସାଇରନ ମଧ୍ୟ ବଜାଯିବ। ସାଇରନ ଶୁଣିବା ମାତ୍ରେ ଲୋକଙ୍କୁ ସତର୍କ ରହିବାକୁ ପଡିବ ଏବଂ ସୁରକ୍ଷିତ ସ୍ଥାନକୁ ଯିବାକୁ ପଡିବ। ଆକ୍ରମଣ ସମୟରେ ନାଗରିକମାନଙ୍କୁ ବଞ୍ଚିବା ପାଇଁ ତାଲିମ ଦିଆଯିବ।

Powered by Froala Editor