ଶ୍ରୀହୀନ ପଡିଛି ଡାଲ୍ ହ୍ରଦ
ଶ୍ରୀନଗର : ପହଲଗାଓଁ ଆତଙ୍କବାଦୀ ଆକ୍ରମଣ ଘଟଣା ପରେ ସମଗ୍ର କାଶ୍ମୀର ଉପତ୍ୟକା ବର୍ତ୍ତମାନ ଏକପ୍ରକାର ନିସ୍ତବ୍ଧ ହୋଇପଡିଛି। ଏହି ଆକ୍ରମଣର କାଶ୍ମୀରର ପର୍ଯ୍ୟଟନ ଶିଳ୍ପ ଉପରେ ପ୍ରତିକୂଳ ପ୍ରଭାବ ପକାଇଥିବାବେଳେ ଏହା ଉପରେ ନିର୍ଭର କରୁଥିବା ଲୋକଙ୍କ ମେରୁଦଣ୍ଡ ଭାଙ୍ଗିଦେଇଛି କହିଲେ ଅତ୍ୟୁକ୍ତି ହେବ ନାହିଁ। ଏହାର ଜ୍ବଳନ୍ତ ଉଦାହରଣ ଶ୍ରୀନଗର ସହରରେ ଥିବା ଡାଲ୍ ହ୍ରଦର ସ୍ଥିତିରୁ ଉପଲବ୍ଧି କରିହେବ। କିଛି ଦିନ ପୂର୍ବେ ଯେଉଁ ଡାଲ୍ ହ୍ରଦ ପର୍ୟ୍ୟଟକଙ୍କ କୋଳାହଳରେ ଉଛୁଳି ପଡୁଥିଲା, ସେଠାରେ ବର୍ତ୍ତମାନ ଶ୍ମଶାନର ନିରବତା ବିରାଜମାନ କରୁଛି। ଆତଙ୍କବାଦୀ ଆକ୍ରମଣ ପରେ ପର୍ଯ୍ୟଟକମାନେ କାଶ୍ମୀର ଛାଡୁଥିବାବେଳେ ଶ୍ରୀନଗର ସମେତ ପର୍ୟ୍ୟଟନ ସ୍ଥଳଗୁଡିକ ଏକପ୍ରକାର ଶ୍ରୀହୀନ ହୋଇପଡିଛି। ପର୍ଯ୍ୟଟକମାନେ ସାଧାରଣତଃ ଡାଲ ହ୍ରଦରେ ଥିବା ନୌକା ଘର (ଶିକାରା)ରେ ରହିବାକୁ ଅଧିକ ପସନ୍ଦ କରିଥାନ୍ତି। ସେମାନେ ଡାଲ୍ ହ୍ରଦରେ ନିର୍ମିତ ବୋଟ୍ ହାଉସରେ ରହିବା ସହ ନୌକାବିହାରର ମଜା ଉଠାଇଥାନ୍ତି। ବୋଟ୍ ହାଉସ ବୁକିଂ ପାଇଁ ପର୍ଯ୍ୟଟକଙ୍କୁ ଲାଇନ ଲଗାଇବାକୁ ପଡୁଥିବାବେଳେ ବର୍ତ୍ତମାନ ସେଗୁଡିକ ଖାଲି ପଡିଛି। ଆତଙ୍କବାଦୀ ଆକ୍ରମଣ ଘଟଣା କାଶ୍ମୀରବାସୀଙ୍କ ଦାନାପାଣି ବନ୍ଦ କରିଦେଇଛି। ପର୍ଯ୍ୟଟନ ଉପରେ ସମ୍ପୂର୍ଣ୍ଣ ନିର୍ଭରଶୀଳ ସ୍ଥାନୀୟ ବାସିନ୍ଦାମାନେ ଏହି ଆକ୍ରମଣକୁ ତୀବ୍ର ନିନ୍ଦା କରିଥିବାବେଳେ ରାଜରାସ୍ତାକୁ ଓହ୍ଲାଇ ଆସି ବିକ୍ଷୋଭ ପ୍ରଦର୍ଶନ କରୁଛନ୍ତି। ତେଣୁ ଆକ୍ରମଣକାରୀ ଏବଂ ସେମାନଙ୍କୁ ଏଭଳି ଅମାନବୀୟ କାର୍ଯ୍ୟରେ ନିୟୋଜିତ କରିଥିବା ବ୍ୟକ୍ତି ଏବଂ ସଂଗଠନ ବିରୋଧରେ ଭାରତ ସରକାର ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି। ବିକ୍ଷୋଭକାରୀମାନେ ‘ହିନ୍ଦୁସ୍ତାନ ଜିନ୍ଦାବାଦ’, ‘ମୁଁ ଜଣେ ଭାରତୀୟ’ ସ୍ଲୋଗାନ ଦେଇଥିଲେ। କେତେକ ହୋଟେଲ ମାଲିକ ଅଟକି ଯାଇଥିବା ପର୍ୟ୍ୟଟକଙ୍କୁ ସେମାନଙ୍କ ହୋଟେଲରେ ୧୫ ଦିନ ମାଗଣା ରହିବାକୁ ପ୍ରସ୍ତାବ ଦେଇଥିବା ଜଣାପଡିଛି। ଆତଙ୍କବାଦୀଙ୍କୁ ଧରିବାରେ ସେନା ଓ ଜାମ୍ମୁ-କାଶ୍ମୀର ପୁଲିସକୁ ସମସ୍ତ ପ୍ରକାର ସହଯୋଗ କରିବାକୁ କାଶ୍ମୀରବାସୀ ନିର୍ଭର ପ୍ରତିଶ୍ରୁତି ଦେଇଛନ୍ତି।
Powered by Froala Editor
