ଦାରିଦ୍ର୍ୟ କଷଣ : ୨୦୦ ଟଙ୍କାରେ ନାତିକୁ ଦେଇଦେଲା ଜେଜେମା’
ପୋଷି ପାରିବନି ବୋଲି ଜଣେ ଜେଜେମା’ ତାର ୭ ବର୍ଷର ନାତିକୁ ୨୦୦ ଟଙ୍କାରେ ବିକ୍ରି କରିଦେଇଛି । ଏଥିରେ ତାର କୌଣସି ଲୋଭ ନାହିଁ । ସେ ଟଙ୍କା ପାଇଁ ନୁହେଁ ବରଂ ଦାରିଦ୍ର୍ୟର ତାଡ଼ନାରେ ଛାତିର କୋହକୁ ଚାପି ଜେଜେମା ଏଭଳି ନିଷ୍ପତ୍ତି ନେଇଛି । ଏ ଘଟଣା ମୟୂରଭଞ୍ଜ ଜିଲ୍ଲା ମୋରଡା ବ୍ଲକ୍ ବଳଦିଆ ଗାଁର ।
ଗାଁର ଜଣେ ୬୫ ବର୍ଷୀୟ ବିଧବା ମନ୍ଦ ସୋରେନଙ୍କ ପାଖରେ କିଛି ନାହିଁ । ତାଙ୍କ ପାଖରେ ଘର, ଜମି, ନା କୌଣସି ସରକାରୀ ସହାୟତା ବୋଲି କିଛି ନାହିଁ । ବୃଦ୍ଧାଙ୍କର ସ୍ୱାମୀଙ୍କର ମୃତ୍ୟୁ ହୋଇସାରିଛି । ବୋହୂଙ୍କର ମଧ୍ୟ ମୃତ୍ୟୁ ଘଟିଛି । ତାଙ୍କ ପୁଅ ମଧ୍ୟ କୁଆଡେ ପଳାଇଯାଇଛି । ଏହି ପରିସ୍ଥିତିରେ ବୃଦ୍ଧାଜଣକ ୭ ବର୍ଷର ନାତିକୁ ଧରି ରାସଗୋବିନ୍ଦପୁର ବ୍ଲକର ରାୟପାଳ ଗାଁରେ ନିଜ ଭଉଣୀ ଘରେ ରହୁଥିଲେ ।
ନାତିର ପାଳନ-ପୋଷଣ କରୁଥିଲେ, ହେଲେ ବୟସ ବୃଦ୍ଧି ଏବଂ ଦୁର୍ବଳ କାରଣରୁ ନାତିର ସଠିକ ଭାବେ ଦେଖାରଖା କରିପାରିଲେନି । ଏହାପରେ ସେ ବାଧ୍ୟ ହୋଇ ଜଣେ ଅଜଣା ବ୍ୟକ୍ତିଙ୍କୁ ୨୦୦ ଟଙ୍କାରେ ବିକ୍ରି କରିଦେଇଥିଲେ । ଯାହା ଦ୍ୱାରା ତାଙ୍କ ନାତି ଭଲରେ ରହିବ ।
ସ୍ଥାନୀୟ ପଞ୍ଚାୟତ ସମିତିର ସଦସ୍ୟଙ୍କୁ ଏହି ମାମଲାର ସୂଚନା ମିଳିବା ପରେ ସେମାନେ ପ୍ରଶାସନକୁ ସୂଚନା ଦେଇଥିଲେ । ଏହାପରେ ରାସଗୋବିନ୍ଦପୁର ପୋଲିସ ସକ୍ରିୟ ହୋଇ ଶିଶୁ ଥାନାକୁ ଆଣିଥିଲେ । ସଂରକ୍ଷଣ ବିଭାଗ ଏବଂ ରାସଗୋବିନ୍ଦପୁରର CDPO ଅଧିକାରୀ ଥାନା ପହଞ୍ଚିଥିଲେ । ଜେଜେମାଆ-ନାତିଙ୍କୁ ସରକାରୀ ସରକ୍ଷଣରେ ନିଆଯାଇଛି । ସେମାନଙ୍କ ଥଇଥାନ ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା କରାଯାଉଛି ବୋଲି ସୂଚନା ମିଳିଛି ।
Powered by Froala Editor
