ନୂଆଦିଲ୍ଲୀ: ଓଡ଼ିଶାରେ କେବଳ ପୁରୀରେ ମହାପ୍ରଭୁ ଶ୍ରୀଜଗନ୍ନାଥଙ୍କର ରଥଯାତ୍ରା ଅନୁଷ୍ଠିତ ହେବ । ରାଜ୍ୟର ଅନ୍ୟ କୌଣସି ସ୍ଥାନରେ ରଥଯାତ୍ରା ଆୟୋଜନ କରାଯାଇପାରିବ ନାହିଁ ବୋଲି ରାୟ ଶୁଣାଇଛନ୍ତି ମାନ୍ୟବର ସୁପ୍ରିମକୋର୍ଟ । ଏଥିସହିତ ଏ ସଂପର୍କରେ ମାନ୍ୟବର ସର୍ବୋଚ୍ଚ ଅଦାଲତରେ ଦାଏର କରାଯାଇଥିବା ଏକାଧିକ ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି । କୋଭିଡ-୧୯ ପରିସ୍ଥିତିକୁ ଦୃଷ୍ଟିରେ ରଖି ପୁରୀ ବ୍ୟତୀତ ଅନ୍ୟ କୌଣସି ସ୍ଥାନରେ ଅନୁମତି ନଦେବାକୁ ଓଡ଼ିଶା ସରକାର ନେଇଥିବା ନିଷ୍ପତ୍ତିକୁ ଚାଲେଞ୍ଜ କରି ସର୍ବୋଚ୍ଚ ଅଦାଲତରେ ଏକାଧିକ ଯାଚିକା ଦାଏର କରାଯାଇଥିଲା ।
ସୁପ୍ରିମକୋର୍ଟର ପ୍ରଧାନ ବିଚାରପତି ଜଷ୍ଟିସ ଏନ ଭି ରମନାଙ୍କୁ ନେଇ ଗଠିତ ଏକ ପୀଠ ତାଙ୍କ ରାୟରେ କହିଛନ୍ତି ଯେ ସରକାର ଦେଇଥିବା ଆଦେଶ ଖରାପ ମନେହେଉଥିଲେ ମଧ୍ୟ ଏହା ରାଜ୍ୟର ନୀତିଗତ ନିଷ୍ପତ୍ତି ଏବଂ ଅଦାଲତଙ୍କର ଏ କ୍ଷେତ୍ରରେ ଅଭିଜ୍ଞତା ନଥିବାରୁ ସେଥିରେ ହସ୍ତକ୍ଷେପ କରିପାରିବେ ନାହିଁ । ମାନ୍ୟବର ପ୍ରଧାନ ବିଚାରପତି କହିଥିଲେ, କୋଭିଡ-୧୯ ପରିସ୍ଥିତିକୁ ନେଇ କେହି ପୂର୍ବାନୁମାନ କରିପାରିବେ ନାହିଁ । ଏହି ପ୍ରସଙ୍ଗରେ ମୁଣ୍ଡ ନଖେଳାଇବା ଉଚିତ ହେବ । ଏହି ନିଷ୍ପତ୍ତି ନେବା ଦାୟିତ୍ୱ ସରକାରଙ୍କ ଉପରେ ଛାଡି ଦିଆଯାଉ । ଏଥିସହିତ ମାନ୍ୟବର ପ୍ରଧାନ ବିଚାରପତି ଆଶା ପ୍ରକାଶ କରିଥିଲେ ଯେ, ଆସନ୍ତା ବର୍ଷ ମହାପ୍ରଭୁଙ୍କର ରଥଯାତ୍ରା ଅନୁଷ୍ଠିତ ହେବ । ଅନ୍ୟୂନ ଆସନ୍ତା ବର୍ଷ ଭଗବାନ ଏଥିପାଇଁ ଅନୁମତି ଦେବେ ବୋଲି ବିଶ୍ୱାସ ରହିଥିବା ସେ କହିଥିଲେ ।

Powered by Froala Editor