କେନ୍ଦୁଝର ଜିଲ୍ଲାରେ ବୁଧବାର ଝଡ଼ ତୋଫାନ ସହ ଅସରାଏ ବର୍ଷା ହୋଇଛି । ତେବେ ବର୍ଷା ଝଡ ତୋଫାନରେ ଏକ ହରିଣ ଛୁଆ ଜନବସତିକୁ ପଶି ଆସିଥିବା ଜଣାପଡିଛି । ଏମିତି ଚିତ୍ର ଦେଖିବାକୁ ମିଳିଛି ଘସିପୁରା ବ୍ଲକ୍ ପୁରୁଣାବାନ୍ଧଗୋଡାରେ । ହରିଣ ଛୁଆଟି ସ୍ଥାନୀୟ ସ୍ୱାସ୍ଥ୍ୟ କେନ୍ଦ୍ର ପରିସରରେ ବୁଲୁଥିବାବେଳେ କିଛି ଯୁବକ ତାକୁ ଉଦ୍ଧାର କରି ନିକଟ ଜଙ୍ଗଲରେ ଛାଡି ଦେଇଛନ୍ତି ।

ତେବେ ଜଙ୍ଗଲରୁ ହରିଣ କୁଟୁରା ଗାଁ ଭିତରକୁ ପଶି ଆସିବା ନୂଆ କଥା ନୁହେଁ । ଖରାଦିନେ ହରିଣ ଦଳ ହୋଇ ଖାଦ୍ୟ ଅନ୍ୱେଷଣରେ ଗାଁ ଭିତରକୁ ପଶି ଆସି ବୁଲା କୁକୁରଙ୍କ ହାବୁଡରେ ପଡି କ୍ଷତାକ୍ତ ହେବା ସହ ମୃତ୍ୟୁ ମୁଖରେ ପଡୁଛନ୍ତି । ବର୍ତ୍ତମାନ ହାତ ଗଣତି ମାତ୍ର ୪ ଜଣ ଅସ୍ଥାୟୀ ବନ କର୍ମଚାରୀଙ୍କ ଦ୍ୱାରା ବରାଙ୍ଗ ଜଙ୍ଗଲ ସୁରକ୍ଷା ଦାୟିତ୍ୱରେ ରହିଛନ୍ତି । ତେଣୁ ପ୍ରାୟ ସମୟରେ ହରିଣ ଜନବସତି ମୁହାଁ ହେଉଛନ୍ତି ।

ବୁଧବାର ଘଷିପୁରା ବ୍ଲକ୍ ପୁରୁଣାବାନ୍ଧଗୋଡା ଗାଁ ସନ୍ନିକଟ ବରାଙ୍ଗ ଜଙ୍ଗଲ ଭିତରୁ ଏକ ହରିଣ ଛୁଆ ପଥ ହୁଡି ସ୍ଥାନୀୟ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ପରିସରକୁ ପଶି ଆସିଥିଲା । ଗାଁ ଛକରେ ଉପସ୍ଥିତ ଥିବା ଯୁବକ ଭିକି ମାଝୀ, ମଳୟ ଜେନା, ଗୁଡୁ ମାଝୀ, ଦିପ ସା, ରାଜା ମହାନ୍ତି, କୁନା ମାଝୀ ହରିଣ ଛୁଆକୁ ଡାକ୍ତରଖାନା ପରିସରରୁ ଉଦ୍ଧାର କରି ପୁନର୍ବାର ବରାଙ୍ଗ ଜଙ୍ଗଲରେ ଛାଡି ଦେଇଥିଲେ ।

Powered by Froala Editor