କେନ୍ଦୁଝର ଜିଲ୍ଲା ଘଷିପୁରା ବ୍ଲକ୍ ଅନ୍ତର୍ଗତ ଦରଡିପାଳ ପଞ୍ଚାୟତ ମଙ୍ଗଳପୁର ଏବଂ ବାଲିପାଳରେ ଏଥର ଭଲ ବିଲାତି ଫସଲ ଭଲ ହୋଇଥିଲେ ବି ଅଭାବି ବିକ୍ରି ସବୁ ସାରିଦେଇଛି । ଏବେ ଚାଷୀ ଋଣ ସୁଝିବା ଚିନ୍ତାରେ ପଡିଛନ୍ତି । ଚାଷ ପାଇଁ ଯେତିକି ବ୍ୟାଙ୍କରୁ ଋଣ ଏବଂ ଧାର ଉଦ୍ଧାର ହୋଇଛି ତାହା କେମିତି ଭରଣା ହେବ । ଏ ପର୍ଯ୍ୟନ୍ତ ବିଲାତିର ଅଭାବି ବିକ୍ରି ଲାଗି ରହିଛି । ବିଲରୁ ବେପାରୀଙ୍କୁ ବିକ୍ରି କରି ଯେତିକି ଆୟ ହେଉଛି ତା\'ର ଦ୍ୱିଗୁଣା ଖର୍ଚ୍ଚ ବିଲାତି ତୋଳିବାରେ ଯାଉଥିବା ଚାଷୀ ଜନାର୍ଦ୍ଦନ ବେହେରା, ଅପର୍ତ୍ତି ଓଝା, ଭାସ୍କର ଓଝା, ଲକ୍ଷ୍ମୀଧର ବେହେରା, ରମାକାନ୍ତ ବେହେରା ପ୍ରମୁଖ ପ୍ରକାଶ କରିଛନ୍ତି ।

ଗଦା ଗଦା ବିଲାତି ଏବେ ଚାଷ ଜମିରେ ପଡି ରହି ପଚି ସଢି ଯାଉଥିବା ଦେଖିବାକୁ ମିଳିଛି । ଟ୍ରେ ମାତ୍ର ୩୦ଟଙ୍କା ଥିବାରୁ କୁଇଣ୍ଟାଲ କୁଇଣ୍ଟାଲ ବିଲାତି ବିଲରେ ଛାଡି ଚାଷୀ ପଳାଇ ଆସୁଛନ୍ତି । ବୁଲା ଗୋରୁ ଗାଈ ଖାଉଛନ୍ତି ଗଦା ଗଦା ବିଲାତି । ବିଲାତି ଚାଷ କରିଥିବା ଚାଷୀ ଏବେ ବ୍ୟାଙ୍କ ଋଣ ଧାର କେମିତି କିପରି ସୁଝିବ ଚିନ୍ତାରେ ପଡିଛନ୍ତି ।

ପୂର୍ବରୁ ବିଲାତିର ଦର ଆକାଶ ଛୁଆଁ ରହିଥିବାବେଳେ ଏବେ ବିଲାତିକୁ କେହି ପଚାରୁ ନାହାନ୍ତି । ପୂର୍ବ ବର୍ଷ ମାନଙ୍କରେ ମଧ୍ୟ ସମାନ ପରିସ୍ଥିତି ହୋଇଥିଲା । ଏଥିପ୍ରତି ଆମ ସରକାର ଦୃଷ୍ଟି ଦେଇ ରାଜ୍ୟ ବାହାରକୁ ବିଲାତି ପଠାଇବା ବ୍ୟବସ୍ଥା କଲେ ଚାଷୀ ମାନେ ଉଚିତ ମୂଲ୍ୟରେ ବିଲାତି ବିକ୍ରି କରିପାରନ୍ତେ । ଏଥିସହିତ ସବୁଠୁ ଗୁରୁତ୍ୱପୂର୍ଣ୍ଣ କେନ୍ଦୁଝର ଜିଲ୍ଲାର ବିଭିନ୍ନ ବ୍ଲକରେ ଶୀତଳଭଣ୍ଡାର ଖୋଲା ଗଲେ ଅମଳ ବିଲାତିକୁ ସୁରକ୍ଷିତ ରଖି ପରେ ବିକ୍ରି କରିପାରନ୍ତେ ବୋଲି ଚାଷୀମାନେ ପ୍ରକାଶ କରିଛନ୍ତି ।

Powered by Froala Editor