ପୂର୍ବତନ ବ୍ୟବସାୟୀ ବିଜୟ ମାଲ୍ୟାଙ୍କ ସୁପୁତ୍ର ସିଦ୍ଧାର୍ଥ ମାଲ୍ୟା ନିଜ ଲଙ୍ଗ୍ ଟାଇମ୍ ଗର୍ଲଫ୍ରେଣ୍ଡ୍ ଜସ୍ମିନଙ୍କ ସହ ବିବାହ କରିଛନ୍ତି । ଏହି ଖାସ୍ ଦିନରେ ବିଜୟ ମାଲ୍ୟା ନିଜ ପୁଅ ଏବଂ ବୋହୂଙ୍କ ସହ କିଛି ସୁଖଦ ମୁହୂର୍ତ୍ତର ଫୋଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ବିବାହର କିଛି ଫଟୋକୁ କନ୍ୟା ଜସ୍ମିନ୍ ନିଜର ଇନ୍ଷ୍ଟାଗ୍ରାମ ଆକାଉଣ୍ଟରେ ଅପଲୋଡ୍ କରିଛନ୍ତି । ସେଥିମଧ୍ୟରୁ ଗୋଟିଏ ଫଟୋରେ ତାଙ୍କୁ ଏକ ଧଳା ରଙ୍ଗର ଗାଉନ୍ରେ ଦେଖିବାକୁ ମିଳୁଛି । ସେ ସିଦ୍ଧାର୍ଥଙ୍କ ନିକଟରେ ଛିଡ଼ା ହୋଇ ହସୁଛନ୍ତି ।

ଅନ୍ୟ ଏକ ଫଟୋରେ ଦମ୍ପତି ପରସ୍ପରର ହାତ ଧରିଥିବାବେଳେ ଜସ୍ମିନ୍ଙ୍କ ହାତର ହୀରା ମୁଦି ମଧ୍ୟ ନଜର ଆସୁଛି । କ୍ୟାପସନ୍ ରେ ସେ ସାରା ଜୀବନର ବନ୍ଧନ ବୋଲି ଲେଖିଛନ୍ତି । ପୂର୍ବରୁ ସିଦ୍ଧାର୍ଥ ଚଳିତ ସପ୍ତାହରେ ନିଜର ଇନ୍ଷ୍ଟାଗ୍ରାମ ଆକାଉଣ୍ଟରେ ବିବାହ ସଂପର୍କରେ ସୂଚନା ଦେଇଥିଲେ । ସେତେବେଳେ ସେ ପୋଷ୍ଟ କରିଥିବା ଫଟୋରେ ତାଙ୍କ ସହିତ ଜସ୍ମିନ୍ଙ୍କୁ ବି ଦେଖିବାକୁ ମିଳିଥିଲା । କିଛି ଦିନ ଧରି ପରସ୍ପରକୁ ଡେଟ୍ କରିବା ପରେ ଗତବର୍ଷ ଏହି ଦମ୍ପତି ସେମାନଙ୍କର ନିର୍ବନ୍ଧ ସଂପର୍କରେ ଘୋଷଣା କରିଥିଲେ । 

ଲଣ୍ଡନରେ ସୀମିତ ପରିବାର ଲୋକ ଏବଂ ବନ୍ଧୁବାନ୍ଧବଙ୍କ ଗହଣରେ ସିର୍ଦ୍ଧାର୍ଥ ଏବଂ ଜସ୍ମିନଙ୍କ ବିବାହ ଉଭୟ ଖ୍ରୀଷ୍ଟିଆନ୍ ଏବଂ ହିନ୍ଦୁ ରୀତିନୀତି ଅନୁଯାୟୀ ସମ୍ପନ୍ନ ହୋଇଥିଲା । ସିଦ୍ଧାର୍ଥ ମାଲ୍ୟାଙ୍କ ଜନ୍ମ ଲସ୍ ଏଞ୍ଜେଲ୍ସର କାଲିଫର୍ଣ୍ଣିଆରେ ହୋଇଥିବାବେଳେ ଲଣ୍ଡନ ଏବଂ ୟୁଏଇରେ ଲାଳନ ପାଳନ ହୋଇଥିଲା । ସେ ୱେଲିଙ୍ଗଟନ୍ କଲେଜ ଏବଂ କ୍ୱୀନ୍ ମେରୀ ବିଶ୍ୱବିଦ୍ୟାଳୟ ଲଣ୍ଡନରୁ ଅଧ୍ୟୟନ ଶେଷ କରିଥିଲେ । ଏହା ପରେ ସେ ରୟାଲ ସେଣ୍ଟ୍ରାଲ ସ୍କୁଲ ଅଫ୍ ସ୍ପୀଚ୍ ଆଣ୍ଡ୍ ଡ୍ରାମାରେ ଅଡମିଶନ୍ କରିଥିଲେ । ଏହା ପରେ ଜଣେ ମଡେଲ ଏବଂ ଅଭିନେତା ଭାବରେ କ୍ୟାରିୟର ଆରମ୍ଭ କରିଥିଲେ । 

ତେବେ କନ୍ୟା ଜସ୍ମିନ୍ଙ୍କ ସଂପର୍କରେ ଅଧିକ କିଛି ସୂଚନା ମିଳିନାହିଁ । ସେ ଆମେରିକାରେ ରହୁଥିବା ତାଙ୍କର ଇନ୍ଷ୍ଟାଗ୍ରାମ ପ୍ରୋଫାଇଲ୍ରୁ ଜଣାପଡ଼ିଛି । ସେହିପରି ଜସ୍ମିନ ହେଉଛନ୍ତି ହ୍ୟାରି ପର୍ଟରଙ୍କ ଜଣେ ବଡ଼ ଫ୍ୟାନ୍ । ତାଙ୍କୁ ଖାଇବା ଏବଂ ଭ୍ରମଣର ସଉକ ଅଛି ।

Powered by Froala Editor