ଅଦା ଶର୍ମା ସୁଶାନ୍ତ ସିଂହ ରାଜପୁତଙ୍କ ଘରକୁ ସିଫ୍ଟ ହୋଇ ସାରିଛନ୍ତି। ହେଲେ ସେ ଅନେକ ଦିନ ଯାଏ ଏ କଥାକୁ ଲୋକଙ୍କ ସାମନାକୁ ଆସିବାକୁ ଦେଇ ନଥିଲେ। ଏବେ ଖବର ମିଳିଛି ଯେ ଅଦା ଚାରି ମାସ ପୂର୍ବରୁ ସୁଶାନ୍ତଙ୍କ ଫ୍ଲାଟରେ ରହିବା ଆରମ୍ଭ କଲେଣି। ଅଦା ନିଜେ ଏହି ଖବରକୁ ନିଶ୍ଚିତ କରିଛନ୍ତି। ସୁଶାନ୍ତଙ୍କ ନିଧନ ଯେଉଁ ଆପାର୍ଟମେଣ୍ଟରେ ହୋଇଥିଲା, ତାହା ଦୀର୍ଘ ଦିନ ଧରି ଖାଲି ଥିଲା। ଲୋକେ ଅନେକ ପ୍ରକାରର ଅନ୍ଧବିଶ୍ୱାସ ପ୍ରଚାର କରୁଥିଲେ, ହେଲେ ଅଦା କହିଛନ୍ତି କି ତାଙ୍କୁ ସେଠାକୁ ଯାଇ ପଜିଟିଭ୍ ଫିଲ୍ ହେଲା।

ତେବେ ଏହା ମଧ୍ୟ ସୂଚନା ମିଳିଛି ଯେ, ୩ବର୍ଷ ପାଇଁ ସେ ଏହି ଘରକୁ ଲିଜରେ ନେଇଛନ୍ତି।
ଜାତୀୟ ଗଣମାଧ୍ୟମ ବମ୍ବେ ଟାଇମ୍ସକୁ ଦେଇଥିବା ଏକ ସାକ୍ଷାତକାରରେ ଅଦା ତାଙ୍କ ନିଷ୍ପତ୍ତି ବିଷୟରେ କହିଛନ୍ତି। ସେ କହିଛନ୍ତି ଯେ, “ମୁଁ ଚାରିମାସ ପୂର୍ବରୁ ଫ୍ଲାଟରେ ରହିବା ଆରମ୍ଭ କଲାଣି। କିନ୍ତୁ ମୁଁ ବସ୍ତର ଏବଂ ଦି କେରଳ ଷ୍ଟୋରୀର ଓଟିଟି ରିଲିଜ୍ ଏବଂ ମୋର ଅନେକ ପ୍ରୋଜେକ୍ଟର ପ୍ରଚାରରେ ବ୍ୟସ୍ତ ଥିବାରୁ ଜଣାଇ ପାରିନଥିଲି। ଫିଲ୍ମର ପ୍ରଚାର ପରେ ମୁଁ ମଥୁରାର ହାତୀ ଅଭୟାରଣ୍ୟରେ କିଛି ସମୟ ବିତାଇଥିଲି। ଏବେ ମୁଁ କିଛି ସମୟ ନିଜ ପାଇଁ କାଢ଼ି ଫ୍ଲାଟକୁ ଆସିଛି।”

ଅଦା କହିଛନ୍ତି କି ସେ ନୂଆ ଘରକୁ ମେକଓଭର କରାଇଛନ୍ତି। ସେ ନିଜର ପୂରା ଘରକୁ ଧଳା ରଙ୍ଗରେ ପେଣ୍ଟ କରାଇଛନ୍ତି ଏବଂ ପ୍ରଥମ ଫ୍ଲୋରରେ ମନ୍ଦିର ତିଆରି କରିଛନ୍ତି। ଟପ୍ ଫ୍ଲୋରର ଏକ ରୁମ୍କୁ ମ୍ୟୁଜିକ୍ ରୁମ୍ରେ ପରିବର୍ତ୍ତନ କରିଛନ୍ତି। ରୁମ୍ ଏକ କୋଠରୀକୁ ଡ୍ୟାନ୍ସ ଷ୍ଟୁଡ଼ିଓ ମଧ୍ୟ କରିଛନ୍ତି। ଟେରେସକୁ ଗାର୍ଡେନରେ ପରିଣତ କରିଛନ୍ତି , ଯେଉଁଥିରେ ସେ ନିଜର ପୁରୁଣା ଘରର ସବୁ ପ୍ଲାଣ୍ଟସକୁ ବି ନେଇ ଆସିଛନ୍ତି।

ସେ ଆହୁରି କହିଛନ୍ତି ଯେ, ‘ମୁଁ ସାରା ଜୀବନ ପାଲି ହିଲରେ ଗୋଟିଏ ଘରେ ରହିଆସିଛି। ପ୍ରଥମ ଥର ପାଇଁ ମୁଁ ସେଠାରୁ ବାହାରି ଅନ୍ୟ ଏକ ଘରେ ରହିବାକୁ ଆସିଛି। ଏହି ଘର ମୋତେ ସକରାତ୍ମକ ଅନୁଭବ ଦେଇଥିବାରୁ ମୁଁ ଏଠାକୁ ରହିବାକୁ ଆସିଲି। ମୋ ସହିତ ମୋ ମା' ଓ ଜେଜେ ମା' ରହୁଛନ୍ତି।’

Powered by Froala Editor