ଅନେକଙ୍କୁ ଏନ୍କାଉଣ୍ଟର କରିଥିଲେ, ଏବେ ସେ ଜେଲ୍ରେ, ଜାଣନ୍ତୁ କିଏ ଓ କାହିଁକି ଗିରଫ ହେଲେ...
ମୁମ୍ବାଇ: ଦିନେ ତାଙ୍କୁ ଦେଖିବା ମାତ୍ରେ ଅପରାଧୀମାନେ ଥରହର ହେଉଥିଲେ । ଛାତିରେ ଛନକା ପଶି ଯାଉଥିଲା । କେତେ ବଡ଼ ବଡ଼ ଦୁର୍ବୃତ୍ତଙ୍କୁ ସେ ଏନ୍କାଉଣ୍ଟର କରିଥିଲେ । ହେଲେ ଏବେ ସେ ଜେଲ୍ର ଚାରି କାନ୍ଥ ଭିତରେ । ଏହି ବ୍ୟକ୍ତି ଜଣଙ୍କ ହେଲେ ପୂର୍ବତନ ଏନ୍କାଉଣ୍ଟ ସ୍ପେଶାଲିଷ୍ଟ ପ୍ରଦୀପ ଶର୍ମା ।
ଶିଳ୍ପପତି ମୁକେଶ ଅମ୍ବାନୀଙ୍କ ଆଣ୍ଟିଲିଆ ବାସଭବନ ନିକଟରୁ ବିସ୍ଫୋରକ ଠାବ ହେବା ଓ ବ୍ୟବସାୟୀ ମନସୁଖ ହିରାନୀଙ୍କ ହତ୍ୟା ମାମଲାରେ ଜାତୀୟ ତଦନ୍ତକାରୀ ଏଜେନ୍ସି (ଏନଆଇଏ) ତାଙ୍କୁ ଗିରଫ କରିଛି । ପୂର୍ବରୁ ଏହି ମାମଲାରେ ଗିରଫ ହୋଇଥିବା ଅନ୍ୟ ଅଭିଯୁକ୍ତଙ୍କ ବୟାନ ଓ ତଦନ୍ତ ବେଳେ ମିଳିଥିବା ତଥ୍ୟକୁ ଆଧାର କରି ଏନଆଇଏ ପ୍ରଦୀପଙ୍କୁ ଗିରଫ କରିଥିବା ଜଣାପଡ଼ିଛି ।
ମୁକେଶ ଅମ୍ବାନୀଙ୍କ ଆଣ୍ଟିଲିଆ ବାସଭବନ ନିକଟରୁ ଫେବୃଆରୀ ମାସରେ ବିସ୍ଫୋରକ ଭର୍ତ୍ତି ଗାଡ଼ି ମିଳିବା ଘଟଣାରେ ଏନଆଇଏ ପ୍ରଦୀପଙ୍କୁ ଦୁଇ ଥର ଜେରା କରିସାରିଥିଲା । ଏହି ଘଟଣାରେ ପୂର୍ବରୁ ଗିରଫ ହୋଇଥିବା ସଚିନ ବାଜେଙ୍କ ଘନିଷ୍ଠ ସହଯୋଗୀ ହେଉଛନ୍ତି ପ୍ରଦୀପ । ତେଣୁ ତାଙ୍କର ମଧ୍ୟ ବିସ୍ଫୋରକ ଠାବ ଓ ମନସୁଖଙ୍କ ହତ୍ୟା ମାମଲାରେ ହାତ ଥିବା ପ୍ରଥମ ଦିନରୁ ଏନଆଇଏ ସନ୍ଦେହ କରିଥିଲା । ସବୁ ପ୍ରମାଣ ଯୋଗାଡ଼ କରି ପ୍ରଦୀପଙ୍କୁ ଶେଷରେ ଗିରଫ କରାଯାଇଛି ।
୧୯୮୩ରେ ପ୍ରଦୀପ ସବ ଇନସପେକ୍ଟର ଭାବେ ମୁମ୍ବାଇ ପୁଲିସ୍ରେ ଯୋଗଦେଇଥିଲେ । ସେ ପ୍ରାୟ ୧୧୩ଟି ଏନକାଉଣ୍ଟରରେ ସାମିଲ ହୋଇଥିଲେ । ୨୦୧୯ରେ ସେ ସ୍ୱେଚ୍ଛାକୃତ ଅବସର ନେଇଥିଲେ । ଏହାପରେ ସେ ରାଜନୀତିରେ ପାଦ ଥାପିଥିଲେ । ଯୋଗ ଦେଇଥିଲେ ଶିବସେନାରେ । ଶିବସେନାରୁ ଟିକେଟ୍ ନେଇ ସେ ନାଲା ସୁପାରା ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ । ହେଲେ ନିର୍ବାଚନରେ ପରାସ୍ତ ହୋଇଥିଲେ ।
Powered by Froala Editor
