୯୫ ବର୍ଷରେ ବରିଷ୍ଠ ଆଇନଜୀବୀ ପଦ୍ମ ବିଭୂଷଣ ଫଲି ଏସ୍ ନରିମନଙ୍କ ପରଲୋକ
ପ୍ରସିଦ୍ଧ ଆଇନଜୀବୀ ତଥା କିମ୍ବଦନ୍ତୀ ସାମ୍ବିଧାନିକ ବିଶେଷଜ୍ଞ ଫଲି ଏସ. ନରିମାନ ଶେଷ ନିଶ୍ୱାସ ତ୍ୟାଗ କରିଛନ୍ତି । ନୂଆଦିଲ୍ଲୀରେ ୯୫ ବର୍ଷ ବୟସରେ ଆଖି ବୁଜିଛନ୍ତି ନରିମାନ । ସେ ନଭେମ୍ବର ୧୯୫୦ରେ ବମ୍ବେ ହାଇକୋର୍ଟରେ ଆଇନଜୀବୀ ଭାବେ କ୍ୟାରିଅର ଆରମ୍ଭ କରିଥିଲେ । ଦୀର୍ଘ ୭୦ ବର୍ଷରୁ ଅଧିକ ଦିନ ଧରି ସେ ଆଇନ ସେବା କରିଆସିଥିଲେ । ଆଇନ ଜଗତରେ ବେଶ୍ ସୁନାମ କରି ପାରିଥିବା ନରିମନ ପଦ୍ମ ଭୂଷଣ ଓ ପଦ୍ମ ବିଭୂଷଣ ପରି ସମ୍ମାନରେ ସମ୍ମାନିତ ହୋଇଥିଲେ।
ଫଲି ଦୀର୍ଘ ୭୦ ବର୍ଷ କାଳ ସୁପ୍ରିମକୋର୍ଟ ଓ ହାଇକୋର୍ଟରେ ଓକିଲାତି କରିଥିଲେ। ସେ ବମ୍ବେ ହାଇକୋର୍ଟରୁ ଆରମ୍ଭ କରି ସୁପ୍ରିମକୋର୍ଟ ଯାଏ କାର୍ଯ୍ୟ କରି ଅନେକ ସଫଳତା ଲାଭ କରିଥିଲେ । ୧୯୭୨ରେ ସେ ସୁପ୍ରିମକୋର୍ଟରେ ଯୋଗ ଦେଇଥିଲେ । ମେ ୧୯୭୨ରେ ସେ ଅତିରିକ୍ତ ସଲିସିଟର ଜେନେରାଲ ଭାବେ ଦାୟିତ୍ବ ନେଇଥିଲେ । ୧୯୯୧ଜାନୁଆରୀରେ ନରିମାନ ପଦ୍ମଭୂଷଣ ଓ ୨୦୦୭ରେ ପଦ୍ମବିଭୂଷଣ ସମ୍ମାନରେ ବିଭୂଷିତ ହୋଇଥିଲେ ।
୧୯୯୧ ରୁ ୨୦୧୦ଯାଏ ସେ ବାର୍ କାଉନସିଲ ଅଫ ଇଣ୍ଡିଆର ସଭାପତି ଥିଲେ । ଏହା ସହ ୧୯୮୯ ରୁ ୨୦୦୫ ଯାଏ ଆନ୍ତର୍ଜାତିକ ଚାମ୍ବର ଅଫ କମର୍ସର ଇଣ୍ଟରନ୍ୟାସନାଲ କୋର୍ଟ ଅଫ ଆର୍ବିଟ୍ରେସନର ଉପାଧ୍ୟକ୍ଷ ଥିଲେ । ଏହା ସହ ୧୯୯୫ରୁ ୧୯୯୭ ଇଣ୍ଟରନ୍ୟାସନାଲ କମିଶନ ଅଫ ଜୁରିଷ୍ଟସ କାର୍ଯ୍ୟନିର୍ବାହୀ କମିଟିର ଅଧ୍ଯକ୍ଷ ଥିଲେ ।
Powered by Froala Editor
