ଗୁଜରାଟର ସୁରଟ ଅଞ୍ଚଳରୁ ଅତ୍ୟନ୍ତ ବିଚଳିତ କରିବା ଭଳି ଖବର ଆସିଛି । ଋଣ ଭାରରେ ପରିବାରର ତିନି ଶିଶୁ ସମେତ ସାତ ଜଣ ଆତ୍ମହତ୍ୟା କରିଛନ୍ତି । ଜଣେ ବ୍ୟକ୍ତି ପ୍ରଥମେ ନିଜ ବାପା, ମା’, ପତ୍ନୀ ଓ ୩ ପିଲାଙ୍କୁ ବିଷ ପିଆଇ ଦେଇଥିଲେ। ଏହାପରେ ନିଜେ ମଧ୍ୟ ବେକରେ ଦୌଡ଼ି ବାନ୍ଧି ଝୁଲି ପଡ଼ିଛନ୍ତି। ଗୋଟିଏ ଘର ଭିତରୁ ୭ ଜଣଙ୍କ ମୃତଦେହ ମିଳିବା ପରେ ପୂରା ଅଞ୍ଚଳରେ ହଇଚଇ ସୃଷ୍ଟି ହୋଇଛି।

ପୋଲିସ ସୂଚନା ଅନୁଯାୟୀ ୩୭ ବର୍ଷୀୟ ମନୀଷ ସୋଲାଙ୍କୀ ପ୍ରଥମେ ତାଙ୍କ ବାପା, ମା’, ପତ୍ନୀ ଓ ୩ ପିଲାଙ୍କୁ ବିଷ ପିଆଇ ଦେଇଥିଲେ। ଏହାପରେ ସେ ନିଜେ ବେକରେ ରଶି ଲଗାଇ ଜୀବନ ହାରିଛନ୍ତି। ଖବର ପାଇ ପୁଲିସ୍‌ ତୁରନ୍ତ ଘଟଣା ସ୍ଥଳରେ ପହଞ୍ଚିବା ସହ କବାଟ ଭାଙ୍ଗି ମୃତଦେହ ଗୁଡ଼ିକ ଜବତ କରିଥିଲା।

ପୁଲିସର କହିବା କଥା ଯେ ମନୀଷଙ୍କର ବଡ଼ଧରଣର ଫର୍ଣ୍ଣିଚର ବ୍ୟବସାୟ ରହିଥିଲା। କିନ୍ତୁ ବ୍ୟବସାୟ ଠିକ ଭାବେ ହେଉ ନଥିବାରୁ ବେଶ କିଛି ମାସ ହେଲା ମନୀଷ ଆର୍ଥିକ ସଙ୍କଟ ଦେଇ ଗତି କରୁଥିଲେ। ତାଙ୍କ ପାଖରେ ୩୫ ଜଣ କାଠ ମିସ୍ତ୍ରୀ ଓ ଶ୍ରମିକମାନେ ମଧ୍ୟ କାମ କରୁଥିଲେ। କିଛି ବଡ଼ ଡିଲ ମନୀଷଙ୍କ ହାତରେ ଲାଗିଥିଲେ ମଧ୍ୟ ସେ ଆର୍ଥିକ ସଙ୍କଟ ଯୋଗୁ ସେଗୁଡ଼ିକ ପୂରଣ କରି ପାରୁ ନଥିବା ଜଣାପଡ଼ିଛି।

ସମ୍ଭବତଃ ଏହାକୁ ନେଇ ମାନସିକ ଚାପରେ ଥିବା ମନୀଷ ଓ ତାଙ୍କ ପରିବାରର ସଦସ୍ୟମାନେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି। ମନୀଷଙ୍କ ବ୍ୟତୀତ ତାଙ୍କ ବାପା କାନୁ ଭାଇ ସୋଲାଙ୍କି, ମା’ ଶୋଭା, ପତ୍ନୀ ରିତା ଓ ୩ ପିଲା ଦିଶା, କାବ୍ୟା ଓ କୁଶଲଙ୍କ ମୃତଦେହକୁ ଉଦ୍ଧାର କରାଯାଇଛି। ଦୁଇ ଝିଅଙ୍କ ବୟସ ଯଥାକ୍ରମେ ୧୦ ଓ ୧୩ ହୋଇଥିବା ବେଳେ ପୁଅର ବୟସ ମଧ୍ୟ ୬ ବର୍ଷ ଥିଲା ବୋଲି ପୁଲିସ୍‌ କହିଛି। 

Powered by Froala Editor