ପାସେଞ୍ଜର ଭାବି ଏକ୍ସପ୍ରେସରେ ଚଢିଯାଇଥିଲେ : ଦୁଇ ଛୁଆଙ୍କୁ ଧରି ଟ୍ରେନ୍ରୁ ଡେଇଁ ପଡିଲେ ମହିଳା
ବଲାଙ୍ଗୀର ଜିଲ୍ଲା ସଇଁତଲା ଥାନା ଅନ୍ତର୍ଗତ ବଡ଼ମାଳ ରେଳଷ୍ଟେସନରେ ଅଭାବନୀୟ ଘଟଣା ଘଟିଛି। ଦେଓଗାଁ ଥାନା ଜରାସିଂହା ଗାଁ ରଜନୀ ମହାନନ୍ଦ(୪୦) ଏକ ପାସେଞ୍ଜର ଟ୍ରେନ୍ରେ ଘରକୁ ଯିବା ବଦଳରେ ସେ ଏକ୍ସପ୍ରେସ୍ ଟ୍ରେନ୍ରେ ଚଢ଼ି ଯାଇଥିଲେ। ତାଙ୍କର ଗନ୍ତବ୍ୟସ୍ଥଳରେ ଏକ୍ସପ୍ରେସ୍ ଟ୍ରେନ୍ ନଅଟକିବାରୁ ବ୍ୟସ୍ତ ହୋଇ ପଡ଼ିଥିଲେ। ସେ ଚଳନ୍ତା ଏକ୍ସପ୍ରେସ୍ ଟ୍ରେନ୍ରୁ ଡେଇଁପଡ଼ିଥିଲେ। ଫଳରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଯାଇଥିଲା।
ତେବେ ଦୁର୍ଘଟଣାରୁ ବର୍ତ୍ତି ଯାଇଛନ୍ତି ଦୁଇ ଜଣ ଶିଶୁକନ୍ୟା। ଟ୍ରେନ୍ର ଅନ୍ୟ ଯାତ୍ରୀମାନେ ଘଟଣା ସଂପର୍କରେ ଅବଗତ ହେଲା ପରେ ୨ ଶିଶୁଙ୍କୁ ବଡ଼ମାଳ ଷ୍ଟେସନରେ ଓହ୍ଲାଇ ଜିଆରପିକୁ ହସ୍ତାନ୍ତର କରିଥିଲେ। ଅନ୍ୟପଟରେ ରଜନୀଙ୍କ ସ୍ବାମୀ ବିରଞ୍ଚି ମହାନନ୍ଦ ଦେଓଗାଁ ରେଳଷ୍ଟେସନରେ ସ୍ତ୍ରୀ ଓ ଦୁଇ ଝିଅଙ୍କୁ ନେବା ପାଇଁ ଅପେକ୍ଷା କରିଥିଲେ। ଏନେଇ ଟିଟିଲାଗଡ଼ ଜିଆରପି ପୁଲିସ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ କରୁଥିବା ସୂଚନା ମିଳିଛି।
ରଜନୀ ମହାନନ୍ଦ କୌଣସି କାମରେ ନିଜର ଦୁଇ ଓ ତିନି ବର୍ଷର ଶିଶୁକନ୍ୟାଙ୍କୁ ଧରି ବଲାଙ୍ଗିର ଯାଇଥିଲେ। କାମ ସାରିବା ପରେ ବଲାଙ୍ଗିର ରେଳ ଷ୍ଟେସନକୁ ଆସିଥିଲେ। ଘରକୁ ଘେରିବା ପାଇଁ ଦୀର୍ଘ ସମୟ ଧରି ପାସେଞ୍ଜର ଟ୍ରେନ୍କୁ ଅପେକ୍ଷା କରିଥିଲେ। ଷ୍ଟେସନ୍ରେ କିଛି ସମୟ ବସିବା ପରେ ଦୀନଦୟାଲ୍ ଉପାଧ୍ୟାୟ ବିଶାଖାପାଟଣା ସୁପରଫାଷ୍ଟ ଟ୍ରେନ୍ ଆସିଥିଲା।
ପାସେଞ୍ଜର ଟ୍ରେନ୍ ଭାବି ସେହିଥିରେ ଦୁଇ ଝିଅଙ୍କୁ ଧରି ଚଢ଼ି ଯାଇଥିଲେ। କିଛି ବାଟ ଗଲା ପରେ ସେ ଜାଣିବାକୁ ପାଇଥିଲେ ପାସେଞ୍ଜର ନୁହେଁ, ଏକ୍ସପ୍ରେସ୍ରେ ଚଢ଼ିଛନ୍ତି ବୋଲି। ଏହା ପରେ କଣ କରିବେ କିଛି ଭାବି ପାରୁନଥିଲେ। ତେବେ ବଡ଼ମାଳ ରେଳ ଷ୍ଟେସନ୍ ଅତିକ୍ରମ କରିବା ବେଳେ ଟ୍ରେନ୍ର ବେଗ ସାମାନ୍ୟ ଧିର ହୋଇଯାଇଥିଲା। ସେହି ସମୟରେ ଦୁଇ ଛୁଆଙ୍କୁ ଆଗେ ପ୍ଲାଟ୍ଫର୍ମକୁ ଠେଲି ଦେଇଥିଲେ। ତା’ପରେ ନିଜେ ଟ୍ରେନ୍ରୁ ଡେଇଁ ପଡ଼ିଥିଲେ। ଦୁର୍ଭାଗ୍ୟକୁ ସେ ପ୍ଲାଟ୍ଫର୍ମରେ ପିଟି ହୋଇଯାଇଥିଲେ। ଘଟଣା ସ୍ଥଳରେ ତାଙ୍କର ମୃତ୍ୟୁ ଘଟିଥିଲା।
Powered by Froala Editor
