ମଣିପୁର ହିଂସା ଘଟଣାର ତଦନ୍ତ ପାଇଁ ସର୍ବୋଚ୍ଚ ଅଦାଲତ ହାଇକୋର୍ଟର ୩ ଜଣ ପୂର୍ବତନ ମହିଳା ବିଚାରପତିଙ୍କୁ ନେଇ ଗୋଟିଏ କମିଟି ଗଠନ କରିଛନ୍ତି। ତଦନ୍ତ ବ୍ୟତୀତ ଏହି କମିଟି ମଣିପୁରରେ ଆଦିବାସୀ ଓ ଅଣଆଦିବାସୀଙ୍କ ସଂଘର୍ଷ ଯୋଗୁ ବିସ୍ଥାପିତ ଲୋକଙ୍କ ଦୁର୍ଦ୍ଦଶା ଓ ଥଇଥାନ କଥା ମଧ୍ୟ ଦେଖିବ। ହିଂସାର ତଦନ୍ତ ବ୍ୟତୀତ କମିଟିର କ୍ଷମତା ଆହୁରି ଅଧିକ ବୋଲି ସୁପ୍ରିମକୋର୍ଟ କହିଛନ୍ତି।

ଜାମ୍ମୁ କାଶ୍ମୀର ହାଇକୋର୍ଟର ପୂର୍ବତନ ମୁଖ୍ୟ ବିଚାରପତି ଜଷ୍ଟିସ ଗୀତା ମିତ୍ତଲଙ୍କ ନେତୃତ୍ୱରେ ଗଠିତ କମିଟିରେ ବମ୍ବେ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ଶାଲିନୀ ଯୋଶୀ ଏବଂ ଦିଲ୍ଲୀ ହାଇକୋର୍ଟର ପୂର୍ବତନ ବିଚାରପତି ଜଷ୍ଟିସ ଆଶା ମେନନ ରହିବେ । ରାଜ୍ୟରେ ଆଇନଶୃଙ୍ଖଳା ରକ୍ଷା ସହ ମଣିପୁରବାସୀଙ୍କ ଭରସା ଜିତିବା ସୁପ୍ରିମକୋର୍ଟଙ୍କ ପ୍ରୟାସ ବୋଲି ଶୁଣାଣି ବେଳେ ଖଣ୍ଡପୀଠ କହିଛନ୍ତି ।

ସର୍ବୋଚ୍ଚ ଅଦାଲତ କହିଛନ୍ତି, “ଆଇନ ଉପରେ ବିଶ୍ୱାସକୁ ପୁଣି ଫେରାଇ ଆଣିବାକୁ ଆମେ ଚେଷ୍ଟା କରୁଛୁ। ଆମେ ହାଇକୋର୍ଟର ୩ ଜଣିଆ ବିଚାରପତିଙ୍କୁ ନେଇ କମିଟି ଗଠନ କରୁଛୁ। ଏହି କମିଟି ତଦନ୍ତ ବ୍ୟତୀତ ରିଲିଫ, ଥଇଥାନ ଓ ସହାୟତା ଇତ୍ୟାଦି ପ୍ରସଙ୍ଗ ଉପରେ ନଜର ରଖିବ।”

ରାଜ୍ୟରେ ମହିଳା ବିରୋଧୀ ହିଂସା ମାମଲାର ଯାଞ୍ଚ ସିବିଆଇ କରିବ । ସ୍ବତନ୍ତ୍ର ଓ ନିରପେକ୍ଷ ଯାଞ୍ଚ ପାଇଁ ସିବିଆଇ ଟିମରେ ଅନ୍ୟ ରାଜ୍ୟର ଡପୁଟି ଏସପି ରାଙ୍କର ୫ଜଣ ଲେଖାଏଁ ଅଫିସର ରହିବେ । ସିବିଆଇ ତଦନ୍ତର ସମୀକ୍ଷା ପାଇଁ ପୂର୍ବତନ ଆଇପିଏସ ଅଫିସ ଦତ୍ତାତ୍ରୟ ପଦସାଲଗିକରଙ୍କୁ ଦାୟିତ୍ବ ଦିଆଯାଇଛି । ଅନ୍ୟ ମାମଲାର ଯାଞ୍ଚ ପାଇଁ ୪୨ଟି ଏସଆଇଟି ଗଠନ କରାଯିବ । ଏସପି ରାଙ୍କର ଅଧିକାରୀ SIT ଟିମର ନେତୃତ୍ବ ନେବେ । ଡିଆଇଜି ରାଙ୍କର ଅଫିସର ୬ଟି ଏସଆଇଟି ତଦନ୍ତର ସମୀକ୍ଷା କରିବେ । ହାଇକୋର୍ଟ ବିଚାରପତିଙ୍କ କମିଟି ଓ ସିବିଆଇ ଯାଞ୍ଚର ସମୀକ୍ଷା କରୁଥିବା ଆଇପିଏସ ଅଫିସର ସମୟ ସମୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଛି । 

Powered by Froala Editor