ଜ୍ଞାନବାପି ମସଜିଦରେ ସର୍ଭେ କାର୍ଯ୍ୟ ଆରମ୍ଭ କରିବ ପ୍ରତ୍ନତାତ୍ତ୍ୱିକ ସର୍ବେକ୍ଷଣ ସଂସ୍ଥା । ଏକ ମନ୍ଦିର ଉପରେ ମସଜିଦ ନିର୍ମିତ ହୋଇଛି କି ନାହିଁ ତାହା ଉପରେ ସର୍ଭେ କରିବ ଏଏସଆଇ । ଏନେଇ ଶୁଣାଣି କରି ସର୍ବୋଚ୍ଚ ନ୍ୟାୟାଳୟ କହିଛନ୍ତି, ମନ୍ଦିର ଉପରେ ମସଜିଦ ନିର୍ମାଣ ହୋଇଛି କି ନାହିଁ ସ୍ପଷ୍ଟୀକରଣ ପାଇଁ ଏଏସଆଇ ବୈଜ୍ଞାନିକ ସର୍ଭେ କରିବା ଉଚିତ୍। 

ସର୍ଭେ ବେଳେ ଜ୍ଞାନବାପି ମସଜିଦ ପରିସରରେ କୌଣସି କ୍ଷୟକ୍ଷତି ଯେପରି ନହୁଏ, ତା’ଉପରେ ଧାନ ରଖିବାକୁ ପ୍ରତ୍ନତତ୍ତ୍ବ ବିଭାଗ ଟିମକୁ ନିର୍ଦ୍ଦେଶ ଦିଆଯାଇଛି । ସୁପ୍ରିମକୋର୍ଟ କହିଛନ୍ତି ଯେ, ଏଏସଆଇର ସମ୍ପୂର୍ଣ୍ଣ କାର୍ଯ୍ୟ “ପ୍ରଭାବ ବିହୀନ ପଦ୍ଧତି” ମାଧ୍ୟମରେ କରାଯିବ। ଉକ୍ତ ସ୍ଥାନରେ କୌଣସି ଖନନ କରାଯିବ ନାହିଁ। ପ୍ରଧାନ ବିଚାରପତି ଡି.ୱାଇ ଚନ୍ଦ୍ରଚୂଡ ଏବଂ ଜଷ୍ଟିସ ଜେ.ବି ପରଦୀୱାଲା ଏବଂ ମନୋଜ ମିଶ୍ରାଙ୍କୁ ନେଇ ଗଠିତ ଏକ ବେଞ୍ଚ ଏହି ଆବେଦନର ଶୁଣାଣି କରିଛନ୍ତି। ଏହି ପର୍ଯ୍ୟାୟରେ କୋର୍ଟ କାହିଁକି ହସ୍ତକ୍ଷେପ କରିବା ଉଚିତ ବୋଲି ଶୁଣାଣି ସମୟରେ ପ୍ରଶ୍ନ କରିଛନ୍ତି କୋର୍ଟ।

ବାରାଣସୀର କାଶୀ ବିଶ୍ୱନାଥ ମନ୍ଦିର ନିକଟରେ ଜ୍ଞାନବାପି ମସଜିଦ ଅବସ୍ଥିତ ଥିବାବେଳେ ଏହାକୁ ନେଇ ବିବାଦ ଦେଖାଯାଇଥିଲା । ମସଜିଦ ପରିସରରେ ପୂଜାର୍ଚ୍ଚନା କରିବା ଲାଗି ଅନୁମତି ଦେବା ସକାଶେ ଏକ ନିମ୍ନକୋର୍ଟରେ କିଛି ମହିଳା ଆବେଦନ କରିବା ପରେ ଏହି ବିବାଦ ଜାତୀୟ ସ୍ତରରେ ଚର୍ଚ୍ଚାର ପରିସରକୁ ଆସିଥିଲା । ଗତବର୍ଷ ମସଜିଦ ପରିସରରେ ଏକ ଭିଡିଓ ସର୍ଭେ ଲାଗି କୋର୍ଟ ଆଦେଶ ଦେଇଥିଲେ । ସର୍ଭେ ବେଳେ ମସଜିଦ ପରିସରରେ ଏକ ଶିବଲିଙ୍ଗ ପରି ଏକ ଜିନିଷ ଥିବା କୁହାଯାଇଥିଲା ।

Powered by Froala Editor