ଧାରାବାହିକ  ‘ମହାଭାରତ’ରେ ଶକୁନି ଭୂମିକାରେ ଅଭିନୟ କରିଥିବା ଅଭିନେତା ଗୁଫି ପେଣ୍ଟଲ (ସରବଜିତ ସିଂହ ପେଣ୍ଟଲ)ଙ୍କର ଆଜି ପରଲୋକ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୭୯ ବର୍ଷ ହୋଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିବା ପୁତୁରା ହିତେନ ପେଣ୍ଟଲ ସୂଚନା ଦେଇଛନ୍ତି। ତାଙ୍କ ମୃତ୍ୟୁ ପରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି। 

ଗୁଫୀଙ୍କ ପୁଅ, ବୋହୂ ଏବଂ ନାତି ଅଛନ୍ତି। କିଛି ଦିନ ହେଲା ସେ ବାର୍ଦ୍ଧକ୍ୟଜନିତ ସ୍ବାସ୍ଥ୍ୟ ସମସ୍ୟା ନେଇ ହସ୍ପିଟାଲରେ ଚିକିତ୍ସିତ ହେଉଥିଲେ। ବାର୍ଦ୍ଧକ୍ୟଜନିତ ବିଭିନ୍ନ ସ୍ୱାସ୍ଥ୍ୟ ସମସ୍ୟା ହେତୁ ତାଙ୍କୁ କିଛି ଦିନ ତଳେ ମୁମ୍ବାଇର ଏକ ଘରୋଇ ହସ୍‌ପିଟାଲରେ ଭର୍ତ୍ତି କରାଯାଇଥିଲା। ଆଉ ଆଜି ସକାଳ ପ୍ରାୟ ୯ଟା ବେଳେ ସେଠାରେ ସେ ଶେଷ ନିଃଶ୍ୱାସ ତ୍ୟାଗ କରିଥିଲେ।

ଅଶି ଦଶକରେ ଗୁଫି ପ୍ରଥମେ ଫିଲ୍ମରେ କ୍ୟାରିୟର ଆରମ୍ଭ କରିଥିଲେ। ୧୯୭୫ରେ ରିଲିଜ ହୋଇଥିବା ଫିଲ୍ମ ‘ରଫୁ ଚକ୍କର’ରେ ସେ ପ୍ରଥମେ ଅଭିନୟ କରିଥିଲେ। ତା’ପରେ ଦିଲ୍‌ଲଗି (୧୯୭୮), ଦେଶ ପରଦେଶ (୧୯୭୮) ଓ ସୁହାଗ (୧୯୯୪) ଆଦି ଫିଲ୍ମରେ ଅଭିନୟ କରିଥିଲେ। ତେବେ ଗୁଫି ୧୯୮୮ରୁ ୧୯୯୦ ପର୍ଯ୍ୟନ୍ତ ଡିଡି ନ୍ୟାସନାଲରେ ପ୍ରସାରିତ ହୋଇଥିବା ବି.ଆର ଚୋପ୍ରାଙ୍କ ଧାରାବାହିକ ‘ମହାଭାରତ’ ମାଧ୍ୟମରେ ସାରା ଦେଶରେ ଜଣାଶୁଣା ହୋଇଥିଲେ ।

‘ମହାଭାରତ’ରେ ସେ ଶକୁନି ଭୂମିକାରେ ଅଭିନୟ କରିଥିଲେ। ଆଉ ଏହି ଚରିତ୍ରରେ ତାଙ୍କର ନିଖୁଣ ଅଭିନୟ ସମସ୍ତଙ୍କୁ ଭଲ ଲାଗିଥିଲା। ‘ମହାଭାରତ’ ପରେ ସେ ‘କାନୁନ’, ‘ସୌଦା’, ‘ଓଁ ନମଃ ଶିବାୟ’, ‘ଆକବର ବୀରବଲ’, ’କର୍ମଫଳ ଦାତା ଶନି’, ‘ଦ୍ୱାରିକାଧୀଶ ଭଗବାନ ଶ୍ରୀକୃଷ୍ଣ’ ଓ ‘କର୍ଣ୍ଣସଂଗୀନି’ ଆଦି ଅନେକ ସିରିଏଲରେ ଅଭିନୟ କରିଥିଲେ।

Powered by Froala Editor