ନାବାଳିକାକୁ ୨୨ଥର ଛୁରୀ ଭୁସିବା ପରେ ପଥରରେ ଛେଚି ହତ୍ୟା
ନୂଆଦିଲ୍ଲୀ : ଦିଲ୍ଲୀରେ ରବିବାର ସନ୍ଧ୍ୟାରେ ଏକ ଅତ୍ୟନ୍ତ ଅମାନୁଷିକ ଏବଂ ବର୍ବର ହତ୍ୟାକାଣ୍ଡ ହୋଇଛି। ସାକ୍ଷୀ ନାମ୍ନୀ ଜଣେ ୧୬ ବର୍ଷୀୟା ନାବାଳିକାକୁ ତା’ର ପ୍ରେମିକ ୨୨ଥର ଛୁରୀ ଭୁସିବା ପରେ ମୁଣ୍ଡକୁ ବାରମ୍ବାର ପଥରରେ ଛେଚି ହତ୍ୟା କରିଛି। ନାବାଳିକା ଜଣକ ରକ୍ତ ଜୁଡ଼ୁବୁଡ଼ୁ ହୋଇ ମୃତ ଅବସ୍ଥାରେ ପଡ଼ିଥିଲେ ବି ଅଭିଯୁକ୍ତ ଲଗାତାର ପଥରରେ ଛେଚି ଚାଲିଥିଲା। ଅଭିଯୁକ୍ତ ପଥରରେ ଏଭଳି ଛେଚିଛି ଯେ ପ୍ରେମିକାର ମୁଣ୍ଡ ଖଣ୍ଡ ଖଣ୍ଡ ହୋଇଯାଇଛି। ଉତ୍ତର ଦିଲ୍ଲୀର ରୋହିଣୀ ସ୍ଥିତ ଶାହବାଦ ଡେରି ଅଞ୍ଚଳରେ ଗତକାଲି ସର୍ବସମ୍ମୁଖରେ ଏହି ହତ୍ୟାକାଣ୍ଡ ହୋଇଛି।
ଲୋକମାନେ ସେହି ଅଞ୍ଚଳ ଦେଇ ଯିବା ଆସିବା କରୁଥିଲେ ସୁଦ୍ଧା ନାବାଳିକାକୁ କେହି ବଞ୍ଚାଇବାକୁ ଚେଷ୍ଟା କରିନଥିଲେ। ପୂରା ହତ୍ୟାକାଣ୍ଡ ସିସିଟିଭି କ୍ୟାମେରାରେ କଏଦ ହୋଇଛି। ଅଭିଯୁକ୍ତର ସାହିଲକୁ ୨୦ ବର୍ଷ। ମୃତ ନାବାଳିକାଙ୍କ ସହ ତାର ପ୍ରେମ ସମ୍ପର୍କ ଥିଲା। ତେବେ ହତ୍ୟାକାଣ୍ଡ ପୂର୍ବଦିନ ସେମାନଙ୍କ ମଧ୍ୟରେ ପ୍ରବଳ ବଚସା ହୋଇଥିଲା। ରବିବାର ସନ୍ଧ୍ୟାରେ ନାବାଳିକା ତାର ଜଣେ ବନ୍ଧୁଙ୍କ ପୁଅର ଜନ୍ମଦିନ ପାର୍ଟିକୁ ଯାଉଥିବା ବେଳେ ବାଟରେ ଅଭିଯୁକ୍ତ ସାହିଲ ଆକ୍ରମଣ କରିଥିଲା। ହତ୍ୟାକାଣ୍ଡ ପରେ ସାହିଲ ସ୍ଥାନ ଛାଡ଼ି ପଳାଇଥିଲା। ପୁଲିସ ତାକୁ ଉତ୍ତରପ୍ରଦେଶର ବୁଲନ୍ଦସହରରୁ ଗିରଫ କରିଛି। ନାବାଳିକାଙ୍କ ବାପା ଏବଂ ମା’ ଦୋଷୀକୁ କଠୋରରୁ ଅତି କଠୋର ଦଣ୍ଡ ଦେବାପାଇଁ ଦାବି କରିଛନ୍ତି। ନାବାଳିକାର ମା’ କହିଛନ୍ତି, ସାହିଲକୁ ଆମେ କେବେ ଦେଖିନୁ। ଆମେ ଆମ ଝିଅ ପାଇଁ ନ୍ୟାୟ ଦାବି କରୁଛୁ। ନାବାଳିକାର ବାପା କହିଛନ୍ତି, ମୋ ଝିଅର ହତ୍ୟାକାରୀକୁ କଠୋର ଦଣ୍ଡ ମିଳୁ। ଦିଲ୍ଲୀ ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ କେଜ୍ରିୱାଲ ଏଭଳି ଏକ ବର୍ବର ହତ୍ୟାକାଣ୍ଡ ଘଟଣାରେ କଡ଼ା ପ୍ରତିକ୍ରିୟା ରଖିଛନ୍ତି।
କେଜ୍ରିୱାଲ ଏକ ଟ୍ବିଟ୍ କରି କହିଛନ୍ତି, ‘ ଦିଲ୍ଲୀରେ ଜଣେ ନାବାଳିକାକୁ ସର୍ବସମ୍ମୁଖରେ ଅତି ନିର୍ମମ ଭାବେ ହତ୍ୟା କରାଯାଇଛି। ଏହା ଅତ୍ୟନ୍ତ ଦୁଃଖଦାୟକ ଏବଂ ଦୁର୍ଭାଗ୍ୟଜନକ। ଅପରାଧୀମାନେ ନିର୍ଭୟରେ ବୁଲୁଛନ୍ତି। ପୁଲିସର କୌଣସି ଭୟ ନାହିଁ। କେଜ୍ରିୱାଲ କହିଛନ୍ତି, ଏଲ୍ଜି ସାର୍ ଆଇନ ଶୃଙ୍ଖଳା ଦାୟିତ୍ବ ଆପଣଙ୍କର। ତେଣୁ ଆପଣ କିଛି କରନ୍ତୁ। ଦିଲ୍ଲୀ ବାସିନ୍ଦାଙ୍କ ସୁରକ୍ଷା ସବୁଠାରୁ ଗୁରୁତ୍ବପୂର୍ଣ୍ଣ। ଡିସିଡବ୍ଲ୍ୟୁ (ଦିଲ୍ଲୀ ମହିଳା କମିସନ୍) ମୁଖ୍ୟ ସ୍ବାତୀ ମଲିୱାଲ କହିଛନ୍ତି, ଜାତୀୟ ରାଜଧାନୀ ଦିଲ୍ଲୀ ମହିଳାଙ୍କ ପାଇଁ ଅତି ଅସୁରକ୍ଷିତ ହୋଇଯାଇଛି। ୧୬ ବର୍ଷୀୟା ନାବାଳିକାକୁ ଅତି ନିର୍ମମ ଭାବେ ହତ୍ୟା କରାଯାଇଛି। କେନ୍ଦ୍ର ସରକାରଙ୍କୁ ମୁଁ ଅନୁରୋଧ କରୁଛି ଯେ ଉକ୍ତ ପ୍ରସଙ୍ଗରେ କେନ୍ଦ୍ର ଗୃହ ମନ୍ତ୍ରୀ, ଦିଲ୍ଲୀ ଉପରାଜ୍ୟପାଳ, ଡିସିଡବ୍ଲ୍ୟୁ ମୁଖ୍ୟ ଏବଂ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ସହ ଏକ ଉଚ୍ଚସ୍ତରୀୟ ବୈଠକ କରାଯାଉ।
Powered by Froala Editor
