ତ୍ରିପୁରା, ନାଗାଲାଣ୍ଡରେ ପୁଣି ବିଜେପି
ଉତ୍ତର-ପୂର୍ବର ୩ଟି ରାଜ୍ୟ ତ୍ରିପୁରା, ନାଗାଲାଣ୍ଡ ଓ ମେଘାଳୟରେ ବିଧାନସଭା ନିର୍ବାଚନ ସରିଛି । ମେଘାଳୟ ଓ ନାଗାଲାଣ୍ଡ ଉଭୟ ରାଜ୍ୟରେ ୬୦ଟି ଲେଖାଏଁ ବିଧାନସଭା ଆସନ ଥିବା ବେଳେ ଉଭୟ ରାଜ୍ୟର ୫୯ରୁ ୫୯ଟି ଆସନରେ ମତଦାନ ହୋଇଛି। ଲୋକମାନେ ମତଦାନରେ ଭାଗ ନେଇଥିଲେ। ଅପରାହ୍ନ ୫ଟା ସୁଦ୍ଧା ନାଗାଲାଣ୍ଡ ଓ ମେଘାଳୟରେ ଯଥାକ୍ରମେ ୮୧.୯୪% ଓ ୭୪.୩୨% ମତଦାନ ହୋଇଥିବା ନିର୍ବାଚନ କମିଶନଙ୍କ ତଥ୍ୟରୁ ଜଣାପଡ଼ିଛି ।
ତ୍ରିପୁରାରେ ଗତ ୧୬ ତାରିଖରେ ଭୋଟ ପଡିଥିବାବେଳେ ଆଜି ମେଘାଳୟ ଓ ନାଗାଲାଣ୍ଡରେ ଭୋଟ ପଡିଛି । ଭୋଟ ଗଣତି ମାର୍ଚ୍ଚ ୨ ତାରିଖରେ ହେବ । ଏହାପୂର୍ବର୍ରୁ ଆଜି ୩ ରାଜ୍ୟର ଏକଜିଟ ପୋଲ ପ୍ରକାଶ ପାଇଛି । ତ୍ରିପୁରାରେ ଲଗାତାର ଦ୍ୱିତୀୟ ଥର ଲାଗି ବିଜେପି କ୍ଷମତାସୀନ ହେବ ବୋଲି ଏକ୍ସଜିଟ ପୋଲରେ ଅନୁମାନ କରାଯାଇଛି ।
ଇଣ୍ଡିଆ ଟୁଡେ-ଆକ୍ସିସ ମାଇ ଇଣ୍ଡିଆର ଏକଜିଟ ପୋଲ ଅନୁସାରେ, ତ୍ରିପୁରାରେ ବିଜେପି ଦ୍ୱିତୀୟ ଥର ପାଇଁ କ୍ଷମତାସୀନ ହେବାକୁ ଯାଉଛି । ମୋଟ ୬୦ ଆସନ ମଧ୍ୟରୁ ବିଜେପିକୁ ୩୬ରୁ ୪୫ ଆସନ ମିଳିବା ଅନୁମାନ କରାଯାଉଛି । ସେହିଭଳି ବାମଦଳ-କଂଗ୍ରେସ ମେଣ୍ଟକୁ ୬ରୁ ୧୧ ଆସନ ମିଳିବା ଅନୁମାନ କରାଯାଉଛି । ରାଜ୍ୟରେ ନୂଆ ଦଳ ଟିପ୍ରା ମୋଥା ପାର୍ଟି, ଟିଏମପିକୁ ୯ରୁ ୧୬ ଆସନ ମିଳିବା ଅନୁମାନ କରିଛି ଇଣ୍ଡିଆ ଟୁଡେ-ଆକ୍ସିସ ମାୟ ଇଣ୍ଡିଆ ।
ସେହିପରି ନାଗାଲାଣ୍ଡରେ ବି କ୍ଷମତାକୁ ଫେରିବ ବିଜେପି ମେଣ୍ଟ । ଇଣ୍ଡିଆ ଟୁଡେ-ଆକସିସ ମାଇଁ ଇଣ୍ଡିଆର ପୂର୍ବାନୁମାନ ଅନୁସାରେ ନାଗାଲାଣ୍ଡରେ ମୋଟ ୬୦ ଆସନରୁ ବିଜେପି ୩୮ରୁ ୪୮ଟି ଆସନ ଜିତି ପୁଣି ସରକାର ଗଢିବ ।ଏନପିଏଫ ୩-୮ଟି ଆସନ ଜିତିବ । ଟାଇମ୍ସ ନାଓ-ଇଟିଜି ରିସର୍ଚର ରିପୋର୍ଟ ଅନୁସାରେ ବିଜେପି ୩୯ରୁ ୪୯ଟି ଆସନ ଜିତିବ ଓ ଏନପିଏଫ ୪ରୁ ୮ଟି ଆସନ ଜିତିବ ।
ଅନ୍ୟପକ୍ଷରେ ମେଘାଳୟରେ ଝୁଲା ବିଧାନସଭା ହେବାର ସମ୍ଭାବନା ରହିଛି । ଟାଇମ୍ସ ନାଓ-ଇଟିଜି ରିସର୍ଚର ରିପୋର୍ଟ ଅନୁସାରେ ମୋଟ ୬୦ ଆସନରୁ ବିଜେପି ୩ରୁ ୬ଟି ଆସନ ଜିତିବ, କଂଗ୍ରେସ ୨ରୁ ୫ଟି ଓ ଏନପିପି ୧୮ରୁ ୨୬ଟି ଆସନ ଜିତିବ ।
Powered by Froala Editor