ଦିଲ୍ଲୀ ମଦ ଦୁର୍ନୀତି ମାମଲାରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କ କନ୍ୟା କଲ୍‌ୱାକୁନ୍ତଳା କବିତାଙ୍କୁ ଜେରା କରିବ ସିବିଆଇ। ତେବେ ‘ସିବିଆଇ’ ଜେରା କରିବାର ଗୋଟିଏ ଦିନ ଆଗରୁ ହାଇଦ୍ରାବାଦରେ ‘ଯୋଦ୍ଧାର କନ୍ୟା ଭୟଭୀତ ହେବେନାହିଁ’, ‘ଆମେ କବିତାଙ୍କ ପାଖେ ପାଖେ ଅଛୁ’ ଆଦି ଲେଖାଯାଇଥିବା ପୋଷ୍ଟର୍‌ ସବୁ ଦେଖିବାକୁ ମିଳିଥିଲା। ପଚରାଉଚରା କରିବାର କିଛି ଘଣ୍ଟା ପୂର୍ବରୁ କବିତାଙ୍କ ବାସଭବନ ନିକଟରେ ସୁରକ୍ଷା କଡାକଡି କରାଯାଇଛି। ପୁଲିସ ପକ୍ଷରୁ ତାଙ୍କ ଘର ଆଗରେ ବ୍ୟାରିକେଡ୍ ଲଗାଯାଇଛି।

ହାଇଦ୍ରାବାଦର ବଞ୍ଜାରା ଠାରେ ଥିବା କବିତାଙ୍କ ବାସଭବନରେ ତାଙ୍କୁ ସିବିଆଇ ଜେରା କରିବ ବୋଲି ଜଣାପଡିଛି। କବିତା ଏହା ପୂର୍ବରୁ ସେ ଏହି ମାମଲାରେ ସିବିଆଇକୁ ସହଯୋଗ କରିବେ ବୋଲି କହିଥିଲେ।

‘ଏଏନ୍‌ଆଇ’ ରି‌ପୋର୍ଟ ଅନୁସାରେ, କେ. କବିତାଙ୍କ ବାସଭବନ ବାହାରେ ନିରାପତ୍ତା ବ୍ୟବସ୍ଥା କଠୋର କରାଯିବା ସହିତ ବାସଭବନ ନିକଟକୁ କାହାକୁ ନ ଛାଡ଼ିବା ଲାଗି ବାରିକେଡ୍‌ ବସାଯାଇଛି। ଡିସେମ୍ବର ୬ରେ ଜେରା କରାଯିବ ବ‌ୋଲି ପ୍ରଥମେ କେ. କବିତାଙ୍କୁ କୁହାଯାଇଥିଲା। କିନ୍ତୁ, ‘ସିବିଆଇ’କୁ ସେ କହିଥିଲେ ଯେ, ତଦନ୍ତରେ ସହାୟତା କରିବା ଲାଗି ସେ ଡିସେମ୍ବର ୧୧, ୧୨, ୧୪ ଏବଂ ୧୫ ତାରିଖରେ ନିଜ ବାସଭବନରେ ଥିବେ। ଦଳସୂତ୍ରରୁ ପ୍ରକାଶ, ବାସଭବନ ସମ୍ମୁଖରେ ଏକତ୍ର ନ ହେବା ଲାଗି ନିଜାମାବାଦର ପୂର୍ବତନ ସାଂସଦ କେ. କବିତା ଦଳର ନେତା ଓ ସମର୍ଥକମାନଙ୍କୁ ଅନୁରୋଧ କରିଛନ୍ତି।

Powered by Froala Editor