ବରଗଡ଼ : ବରଗଡ଼ ଜିଲ୍ଲା ପଦ୍ମପୁର ଉପନିର୍ବାଚନ ପାଇଁ ସୋମବାର ମତଦାନ ଚାଲିଛି। ନିର୍ବାଚନ ମଣ୍ଡଳୀର ସମସ୍ତ ୩୧୯ ବୁଥରେ ଭୋଟ ଗ୍ରହଣ ଚାଲିଛି। ଦିନ ୧୧ଟା ସୁଦ୍ଧା ୨୯.୭୩ ପ୍ରତିଶତ ମତଦାନ ହୋଇଛି। ଏନେଇ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ କଲ୍ୟାଣୀ ଦାଶ ସୂଚନା ଦେଇଛନ୍ତି। ନିର୍ବାଚନ ମଣ୍ଡଳୀରେ ୨ଲକ୍ଷ ୫୭ହଜାର ୪୭୪ ଭୋଟର ଆଜି ୧୦ ଜଣ ପ୍ରାର୍ଥୀଙ୍କ ଭାଗ୍ୟ ନିରୂପଣ କରୁଛନ୍ତି।ତେବେ  ସକାଳ ୯ଟା ସୁଦ୍ଧା ୮.୫ ପ୍ରତିଶତ ମତଦାନ ହୋଇଥିଲା ।  ଏନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନୀ ସୂଚନା ଦେଇଥିଲେ । 

ପୋଲିସ ସୂତ୍ରରୁ ପ୍ରକାଶ ଯେ, ବର୍ତ୍ତମାନ ସୁଦ୍ଧା ନିର୍ବାଚନ ମଣ୍ଡଳୀର କୌଣସି ସ୍ଥାନରେ ନିର୍ବାଚନୀ ହିଂସା ହୋଇନାହିଁ। ସବୁ ଅଞ୍ଚଳରେ ଶାନ୍ତିପୂର୍ଣ୍ଣ ଭାବରେ ମତଦାନ ଚାଲିଛି। ଭୋଟିଂ ପ୍ରତିଶତକୁ ଲକ୍ଷ୍ୟ କଲେ ସହରାଞ୍ଚଳ ଅପେକ୍ଷା ଗ୍ରାମାଞ୍ଚଳରେ ଭୋଟିଂ ହାର ବେଶୀ ରହିଛି।

ପ୍ରକାଶ ଥାଉକି, ପଦ୍ମପୁର ଉପନିର୍ବାଚନ ପାଇଁ ୩୧୯ ବୁଥ୍ କରାଯାଇଛି। ଏଥି ମଧ୍ୟରୁ ୬ ଟି ପିଙ୍କ ବୁଥ୍ ଥିବାବେଳେ, ୧୫ ଟି ମଡେଲ ବୁଥ୍, ୭୪ ଟି ମାଓ ପ୍ରଭାବିତ ବୁଥ୍, ୭୮ ଟି ସମ୍ବେଦନଶୀଳ ବୁଥ ରହିଛି। ଏହା ମଧ୍ୟରୁ ୧୧୪ ଟି ବୁଥ୍‌ରେ ୱେବ୍ କାଷ୍ଟିଙ୍ଗ ହେଉଥିବା ବେଳେ ୫୫ ଜଣ ମାଇକ୍ରୋ ଅବଜରଭର ରହିଛନ୍ତି। ୪୪ ଜଣ ସେକ୍ଟର ଅଧିକାରୀ, ୧୧୫ ବୁଥରେ ସିଏପିଏଫ, ଏସଓଜି, ବିଏସଏଫ୍ ଜୱାନ ମୁତୟନ ହୋଇଛନ୍ତି। ଅନ୍ୟପକ୍ଷରେ ପୋଲିସ ବିଭାଗ ପକ୍ଷରୁ ବରଗଡ ଏସପି ସ୍ମିଥ ପରମାରଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ଦୁଇ ଅତିରିକ୍ତ ଏସପି, ଦୁଇ ଏସଡିପିଓ, ୩୮ ଜଣ ସବ ଇନସ୍ପେକ୍ଟର ଓ ଆସିଷ୍ଟାଣ୍ଟ ସବ ଇନସ୍ପେକ୍ଟର, ୩୧୯ କନେଷ୍ଟବଳ, ୧୨୩ଜଣ ଗ୍ରକ୍ଷମରକ୍ଷୀ, ୩୪ ପ୍ଲାଟୁନ ସିଏପିଏଫ୍ ମୁତୟନ ଅଛନ୍ତି।

Powered by Froala Editor