ବ୍ରହ୍ମପୁର: ମାଛ ଧରିବାକୁ ଯାଇଥିବା ବେଳେ ସମୁଦ୍ର ମଝିରେ ଘଟିଲା ଅଘଟଣ। ମାଛ ଧରା ବୋଟ୍‌ରେ ଲାଗିଥିବା ମୋଟର ଫ୍ୟାନ୍‌ ଭାଙ୍ଗି ଯିବାରୁ ଓଲଟିପଡିଲା ଡଙ୍ଗା। ତେବେ ଏହି ଦୁର୍ଘଟଣା ଜଣେ ଧୀବରଙ୍କ ମୃତ୍ୟୁ ଘଟିଥିବା ବେଳେ ଦୁଇ ଜଣ ଧୀବର କୌଣସି ମତେ ବର୍ତ୍ତିଯାଇଥିଲେ। ତାଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସାଥି ଧୀବରଙ୍କ ମୃତ୍ୟୁ ଖବର ଶୁଣି ଉଭୟ ଫେରାର ହୋଇଯାଇଥିବା ସୂଚନା ମିଳିଛି। ତେବେ ତାଙ୍କ ଆଚରଣକୁ ନେଇ ସନ୍ଦେହ ସୃଷ୍ଟି ହୋଇଛି।

ସୂଚନା ମୁତାବକ, ସୋମବାର ବିଳମ୍ବିତ ସନ୍ଧ୍ୟାରେ ଗଞ୍ଜାମ ଜିଲ୍ଲା ଛତ୍ରପୁର ବ୍ଲକ୍ ଅନ୍ତର୍ଗତ ସାନଆର୍ୟ୍ୟପଲ୍ଲୀ ଗ୍ରାମ ନିକଟ ବଙ୍ଗୋପସାଗରରେ ଏହି ଘଟଣା ଘଟିଛି। ମୃତକ ହେଲେ ସେହି ଗ୍ରାମର କୁନା ପାଢ଼ୀ। ତିନି ଜଣ ମାଛ ଧରିବାକୁ ସମୁଦ୍ର ମଧ୍ୟକୁ ଯାଇଥିବା ବେଳେ କୌଣସି ମତେ ଡଙ୍ଗାରେ ଲାଗିଥିବା ମୋଟର ଫ୍ୟାନ୍ ଭାଙ୍ଗି ଯାଇଥିଲା। ଫଳରେ ଡଙ୍ଗାଟି ଭାରସାମ୍ୟ ହରାଇ ଓଲଟି ପଡ଼ିଥିଲା। କୁନାଙ୍କୁ ରକ୍ତାକ୍ତ ଅବସ୍ଥାରେ ଉଦ୍ଧାର କରି ତାଙ୍କ ସହ ଥିବା ଅନ୍ୟ ଦୁଇ ମତ୍ସ୍ୟଜୀବୀ ଛତ୍ରପୁର ଡାକ୍ତରଖାନାରେ ଭର୍ତ୍ତି କରିଥିଲେ। ଡାକ୍ତର ସେଠାରେ ମୃତ ଘୋଷଣା କରିଥିଲେ। ତେବେ ଘଟଣା ପରେ ଉକ୍ତ ଦୁଇ ମତ୍ସ୍ୟଜୀବୀ ଡାକ୍ତରଖାନାରୁ ଚମ୍ପଟ ମାରିଥିବାରୁ ସନ୍ଦେହ କରାଯାଉଛି। ପୁଲିସ ଡାକ୍ତରଖାନାରେ ପହଞ୍ଚି ତଦନ୍ତ ଆରମ୍ଭ କରିଛି।

Powered by Froala Editor