ନୂଆ ଆଶା । ନୂଆ ନିଯୁକ୍ତି । ଏଣିକି ମାଓବାଦୀଙ୍କ ସହ ଲଢ଼ିବାକୁ ୯ ଜଣ କିନ୍ନରଙ୍କୁ ଦିଆଯିବ ଟ୍ରେନ୍‌ିଂ । କାରଣ ଏମାନେ ଛତିଶଗଡ଼ ପୋଲିସର ସ୍ୱତନ୍ତ୍ର ୟୁନିଟ୍ ବସ୍ତର ଫାଇଟର୍ସଙ୍କ ଭିତରେ ଚୟନ ହୋଇଛନ୍ତି । ପ୍ରଥମ ଥର ପାଇଁ ପୋଲିସ ବିଭାଗ ପକ୍ଷରୁ ମାଓବାଦୀ ପ୍ରବଣ ବସ୍ତର ରେଞ୍ଜରେ କିନ୍ନରଙ୍କୁ ନିଯୁକ୍ତ କରାଯାଇଛି।

ବସ୍ତର ଫାଇଟର୍ସରେ ନିଯୁକ୍ତି ପାଇଥିବା କିନ୍ନରମାନେ ହେଉଛନ୍ତି ଦିବ୍ୟା ନିଶାଦ, ଦାମିନୀ, ସନ୍ଧ୍ୟା, ସାନୁ, ରାନୀ ହିମାଂଶୀ, ରିୟା, ସୀମା ଏବଂ ବରଖା । ବସ୍ତର ରେଞ୍ଚ୍‌ ଆଇଜି ସୁନ୍ଦରରାଜ ପି କହିଛନ୍ତି ଯେ ଚୟନ ହୋଇଥିବା ୯ ଜଣ କିନ୍ନରଙ୍କ ମଧ୍ୟରୁ ୮ ଜଣ କାଙ୍କେରର ଏବଂ ଜଣେ ବସ୍ତର ଜିଲାର। ବସ୍ତର ଫାଇଟର୍ସ ହେବା ପାଇଁ ସେମାନେ କଠିନ ପରିଶ୍ରମ ଏବଂ ନିଷ୍ଠା ସହିତ ପୋଲିସର ବୌଦ୍ଧିକ ଏବଂ ଶାରୀରିକ ପରୀକ୍ଷା ଦେଇଛନ୍ତି। ବସ୍ତର ଫାଇଟର୍ସ ପରୀକ୍ଷାର ଅନ୍ତିମ ଫଳାଫଳରେ ସେମାନେ ଯୋଗ୍ୟ ବିବେଚିତ ହୋଇଛନ୍ତି।

କିନ୍ନର ଅଧିକାର କର୍ମୀ ବିଦ୍ୟା ରାଜପୁତ ସୂଚନା ଦେଇଛନ୍ତି ଯେ ବସ୍ତର ଡିଭିଜନ, ବସ୍ତର, କାନକର, ଦନ୍ତେ ୱାଡା, ସୁକମା, ବିଜାପୁର, ନାରାୟଣପୁର ଏବଂ କୋଣ୍ଡାଗାଓଁର ୭ ଟି ଜିଲାରେ ବସ୍ତର ଫାଇଟର୍ସ ହେବା ପାଇଁ ୩୦୦ ଲେଖାଏଁ ପଦବୀକୁ ଅନୁମୋଦନ କରାଯାଇଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ୨୧୦୦ ପଦବୀ ମଧ୍ୟରୁ ନଅଟି କିନ୍ନରଙ୍କ ପାଇଁ ସଂରକ୍ଷିତ ଥିଲା। କିନ୍ନରମାନେ ନିଯୁକ୍ତି ପରୀକ୍ଷାରେ ସଫଳ ହୋଇଥିଲେ, ତେଣୁ ସାମାଜିକ କଲ୍ୟାଣ ଏବଂ ପୋଲିସ ବିଭାଗ ମଧ୍ୟ ସେମାନଙ୍କୁ ତାଲିମ ପ୍ରଦାନ କରିଥିଲେ।

ପୋଲିସ ନିଯୁକ୍ତି ନେଇ କିନ୍ନରମାନେ ଏକ ବାର୍ତ୍ତା ଦେଇଛନ୍ତି ଯେ ଯଦି ସେମାନେ ସେମାନଙ୍କର ଦକ୍ଷତା ପ୍ରଦର୍ଶନ କରିବାର ସୁଯୋଗ ପାଆନ୍ତି, ତେବେ ପୁରୁଷ ଏବଂ ମହିଳାଙ୍କ ସହ କାନ୍ଧ କାନ୍ଧରେ ମିଳାଇ ଚାଲିପାରିବେ।

Powered by Froala Editor