ଭାରତର ୧୪ଶ ଉପରାଷ୍ଟ୍ରପତି ଭାବେ ପଶ୍ଚିମବଙ୍ଗର ପୂର୍ବତନ ରାଜ୍ୟପାଳ ତଥା ‘ଏନ୍‌ଡିଏ’ ପ୍ରାର୍ଥୀ ଜଗଦୀପ ଧନଖଡ଼ ଶପଥ ଗ୍ରହଣ କରିଛନ୍ତି। ରାଷ୍ଟ୍ରପତି ଦ୍ରୌପଦୀ ମୁର୍ମୁ ତାଙ୍କୁ ଆଜି ପଦ ଓ ଗୋପନୀୟତାର ଶପଥ ପାଠ କରାଯାଇଛି।

ଧନଖଡ଼ଙ୍କ ଶପଥପାଠ ଉତ୍ସବ ପାଇଁ ଆଜି ରାଷ୍ଟ୍ରପତି ଭବନରେ ସ୍ୱତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଠାରୁ ଆରମ୍ଭ କରି ଅନେକ କେନ୍ଦ୍ରମନ୍ତ୍ରୀ ଓ ବିରୋଧୀ ଦଳର ନେତାମାନେ ଶପଥପାଠ କାର୍ଯ୍ୟକ୍ରମରେ ସାମିଲ ହୋଇଥିଲେ। ସେହପରି ବିଦାୟୀ ଉପ ରାଷ୍ଟ୍ରପତି ଭେଙ୍କୟା ନାଇଡୁ, ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦ ଓ ଲୋକସଭା ବାଚସ୍ପତି ଓମ ବିର୍ଲା ମଧ୍ୟ ଉପସ୍ଥିତ ରହିଥିଲେ।

ରାଷ୍ଟ୍ରପତି ଭବନକୁ ଆସି ଶପଥ ଗ୍ରହଣ କରିବା ପୂର୍ବରୁ ଧନଖଡ଼ ଦିଲ୍ଲୀସ୍ଥିତ ରାଜଘାଟକୁ ଯାଇ ମହାତ୍ମା ଗାନ୍ଧୀଙ୍କ ସମାଧିରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ପୂଜ୍ୟ ବାପୁଙ୍କ ପ୍ରତି ଶ୍ରଦ୍ଧାଞ୍ଜଳି ଅର୍ପଣ ସମୟର ଫଟୋ ଟୁଇଟ୍‌ କରି ଧନଖଡ଼ ଲେଖିଥିଲେ: ଶାନ୍ତ ସୌନ୍ଦର୍ଯ୍ୟଭରା ରାଜଘାଟରେ ପୂଜ୍ୟ ବାପୁଙ୍କ ପ୍ରତି ସମ୍ମାନ ପ୍ରଦର୍ଶନ କରିବା ବେଳେ ଆଶିଷ ଲାଭ କରିବା ସହ ଭାରତର ସେବା କରିବା ନିମନ୍ତେ ପ୍ରେରଣା ଓ ଉତ୍ସାହ ପାଇଲି।

ସୂଚନାଯୋଗ୍ୟ, ବିରୋଧୀ ପ୍ରାର୍ଥିନୀ ମାର୍ଗାରେଟ୍‌ ଆଲ୍‌ଭାଙ୍କୁ ପରାଜିତ କରି ଅଗଷ୍ଟ ୬ ତାରିଖରେ ‘ଏନ୍‌ଡିଏ’ ପ୍ରାର୍ଥୀ ଜଗଦୀପ ଧନଖଡ଼ ଦେଶର ଉପରାଷ୍ଟ୍ରପତି ଭାବେ ନିର୍ବାଚିତ ହୋଇଥିଲେ। ଧନଖଡ଼ଙ୍କୁ ୫୨୮ଖଣ୍ଡ ଭୋଟ୍‌ ମିଳିଲା। ଆଲ୍‌ଭାଙ୍କୁ ମିଳିଥିଲା ୧୮୨ଖଣ୍ଡ ଭୋଟ୍‌। ସମୁଦାୟ ଭୋଟ୍‌ରୁ ୧୫ ଖଣ୍ଡ ଭୋଟ୍‌ ନାକଚ ହୋଇଯାଇଥିଲା।

Powered by Froala Editor