ମହାରାଷ୍ଟ୍ରରେ ଆୟକର ବିଭାଗର ଚଢାଉ,ନଗଦ ୫୮ କୋଟି ଟଙ୍କା ଜବତ
ମୁମ୍ବାଇ:ପ୍ରବର୍ତ୍ତନ ନିର୍ଦ୍ଦେଶାଳୟ ପରେ ଏବେ ଆକ୍ସନ ମୋଡରେ ଆୟକର ବିଭାଗ । ପଶ୍ଚିମବଙ୍ଗ ପରେ ଏବେ ମହାରାଷ୍ଟ୍ରରେ ଆୟକର ବିଭାଗ ଚଢାଉ କରି ବିପୁଳ ପରିମାଣର ଟଙ୍କା ଜବତ କରିଛି । ଜଣେ ଷ୍ଟିଲ, କପଡା ବ୍ୟବସାୟୀଙ୍କ ଘରେ ଆଇଟି ବିଭାଗର ଚଢାଉ ପରେ ସମସ୍ତେ ତାଜୁବ । କୋଟିଏ କି ଦୁଇ କୋଟି ନୁହେଁ ଆୟକର ବିଭାଗକୁ ମିଳିଛି ନଗଦ ୫୮ କୋଟି ଟଙ୍କା ଏବଂ ୩୨ କେଜି ସୁନା ଗହଣା ।
ବ୍ୟବସାୟୀଙ୍କ ଘରୁ ପ୍ରାୟ ୩୯୦ କୋଟି ଟଙ୍କାର ବେନାମୀ ସମ୍ପତ୍ତି ଜବତ କରାଯାଇଛି । ଜବତ ଟଙ୍କା ଗଣିବା ପାଇଁ ଲାଗିଥିଲା ୧୩ ଘଣ୍ଟା । ସବୁଠାରୁ ବଡ କଥା ହେଉଛି ୨୬୦ଜଣ ଆୟକର ବିଭାଗ ଅଧିକାରୀ ଏବଂ କର୍ମଚାରୀ ଚଢାଉରେ ସାମିଲ ହୋଇଥିଲେ । ୨୬୦ ଜଣ ଆଇଟି କର୍ମଚାରୀ ମୋଟ ୫ଟି ଟିମ୍ରେ ଚଢାଉ କରିଥିଲେ । ଏଥିରେ ୧୨୦ଟିରୁ ଅଧିକ ଗାଡି ବ୍ୟବହାର କରାଯାଇଥିଲା ।
ଜବତ ଟଙ୍କା ଗଣିବା ପାଇଁ ମେସିନ୍ କମ ପଡିବାରୁ ସ୍ଥାନୀୟ ଏକ ବ୍ୟାଙ୍କକୁ ନିଆଯାଇ ସେଠାରେ ଟଙ୍କା ଗଣାଯାଇଥିଲା । ବୁଧବାର ଦିନ ୧୧ଟାରୁ ଟଙ୍କା ଗଣା ଆରମ୍ଭ ହୋଇଥିଲା ଯାହାକି ରାତି ପ୍ରାୟ ଗୋଟାଏ ଯାଏଁ ଚାଲିଥିଲା । ଆୟକର ବିଭାଗକୁ ସୂଚନା ମିଳିଥିଲା ଯେ, ଷ୍ଟିଲ୍ କମ୍ପାନୀରେ ଅନିୟମିତତା ଚାଲିଛି ଏବଂ ବେଆଇନ ଭାବେ ବ୍ୟବସାୟୀ ଜଣକ କୋଟି କୋଟି ଟଙ୍କା ସ୍ବାହା କରିଦେଇଛନ୍ତି । ଏହା ପରେ ଆକ୍ସନକୁ ଆସିଥିଲା ଆୟକର ବିଭାଗ । ଟିମ୍ ପକ୍ଷରୁ ସଂପୃକ୍ତ ବ୍ୟବସାୟୀ ଏବଂ ବାସଭବନ ଏବଂ କାରଖାନାରେ ଚଢାଉ କରାଯାଇଥିଲା । ଅବଶ୍ୟ ଘରୁ କିଛି ମିଳିନଥିଲା କିନ୍ତୁ ସହର ବାହାରେ ଥିବା ବାବୁଙ୍କ ଫାର୍ମ ହାଉସରୁ ପୁଳାପୁଳା ଟଙ୍କା ଏବଂ ସୁନା ଗହଣା ଜବତ କରାଯାଇଥିଲା । ତେବେ ଅନୁମାନ କରାଯାଉଛି ସଂପୃକ୍ତ ବ୍ୟବସାୟୀଙ୍କ ଆହୁରି ମଧ୍ୟ ବେନାମୀ ସମ୍ପତ୍ତି ରହିଛି । ଆଉ କିଛି ସ୍ଥାନରେ ଚଢାଉ କରିବା ପାଇଁ ପ୍ରସ୍ତୁତ ହେଉଛି ଆୟକର ବିଭାଗ ।
Powered by Froala Editor