ନୂଆଦିଲ୍ଲୀ : ଭାରତରେ କରୋନା ଲଢେ଼ଇ ଲାଗି ଅର୍ଥ ଯୋଗାଡ଼ କରୁଥିବା ଏକ ପ୍ରକଳ୍ପକୁ ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି ଏବଂ ତାଙ୍କ ଅଭିନେତ୍ରୀ ପନôୀ ଅନୁଷ୍କା ଶର୍ମା ୨ କୋଟି ଟଙ୍କା ଦାନ କରିଛନ୍ତି । ଉଭୟ କେଟୋ ନାମରେ ହୋଇଥିବା ଏହି ପ୍ରକଳ୍ପ ମାଧ୍ୟମରେ ୭ କୋଟି ଟଙ୍କା ଯୋଗାଡ଼ କରିବାକୁ ମଧ୍ୟ ଲକ୍ଷ୍ୟ ରଖିଛନ୍ତି । “ବିରାଟ କୋହଲି ଏବଂ ଅନୁଷ୍କା ଶର୍ମା ଭାରତରେ କୋଭିଡ ରିଲିଫ ପାଇଁ ୭ କୋଟି ଟଙ୍କା ଯୋଗାଡ଼ କରିବାକୁ ଲକ୍ଷ୍ୟ ରଖିଛନ୍ତି । ଏସିଟି ଗ୍ରାଣ୍ଟସ ସଂସ୍ଥା ଦ୍ୱାରା ହୋଇଥିବା ଅର୍ଥ ଯୋଗାଡ଼ ପ୍ଲାଟଫର୍ମ କେଟୋକୁ ସେମାନେ ୨ କୋଟି ଟଙ୍କା ପ୍ରଦାନ କରି ଏହି ପ୍ରକଳ୍ପର ଶୁଭାରମ୍ଭ କରିଛନ୍ତି” ବୋଲି ଏହି ସେଲିବ୍ରିଟ ଦମ୍ପତିଙ୍କ ଦ୍ୱାରା ଜାରି ବିଜ୍ଞପ୍ତିରେ ସୂଚନା ଦିଆଯାଇଛି । ଏହି ଅଭିଯାନ ୭ ଦିନ ଧରି କେଟୋରେ ଚାଲିବ । ଯୋଗାଡ଼ ହୋଇଥିବା ଅର୍ଥ ଏସିଟି ମାଧ୍ୟମରେ ଅମ୍ଳଜାନ, ଡାକ୍ତରୀ ସୁବିଧା, ଟିକାକରଣ ସଚେତନତା ଏବଂ ଟେଲି ମେଡିସିନ ସୁବିଧା ଯୋଗାଇବାରେ ଖର୍ଚ୍ଚ କରାଯିବ । “ଏହି ମାହାମାରୀ ଯୋଗୁଁ ଅସୁବିଧାରେ ପଡ଼ିଥିବା ଲୋକମାନଙ୍କୁ ଯଥା ସମ୍ଭବ ସାହାଯ୍ୟ କରିବାକୁ ଆମେ ସର୍ବଦା ଚେଷ୍ଟା କରିଅସିଛୁ । ଏହି ପ୍ରକଳ୍ପ ମାଧ୍ୟରେ ଅଧିକ ପାଣ୍ଠି ଯୋଗାଡ଼ କରି ଲୋକମାନଙ୍କୁ ସହଯୋଗ କରିବାକୁ ଲକ୍ଷ୍ୟ ରଖିଛୁ” ବୋଲି କୋହଲି କହିଛନ୍ତି । “ବିରାଟ ଓ ଅନୁଷ୍କାଙ୍କ ଭଳି ତାରକାଙ୍କ ଦୃଢ଼ ସ୍ୱର ଅଧିକ ଅର୍ଥ ଯୋଗାଡ଼ କରିବାରେ ଆମକୁ ସହଯୋଗ କରିବ” ବୋଲି ଏସିଟି ଗ୍ରାଣ୍ଟସର ପ୍ରବକ୍ତା ଗାୟତ୍ରୀ ଯାଦବ କହିଛନ୍ତି ।

Powered by Froala Editor