ଡାଇରେକ୍ଟ ମାର୍କେଟିଙ୍ଗ କମ୍ପାନୀ ଆମୱେ ଇଣ୍ଡିଆର ୭୫୭ କୋଟିରୁ ଅଧିକ ଟଙ୍କାର ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଜବତ କରିଛି । ଏନେଇ ସୋମବାର ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ ସୂଚନା ଦିଆଯାଇଛି। ଉକ୍ତ କମ୍ପାନୀ ଏକାଧିକ ମାର୍କେଟିଂ ସ୍କାମରେ ସମ୍ପୃକ୍ତ ଥିବା ତଦନ୍ତକାରୀ ସଂସ୍ଥା ଇଡି ପକ୍ଷରୁ ସୂଚନା ଦିଆଯାଇଛି। ଜବତ ସମ୍ପତ୍ତି ମଧ୍ୟରେ ଜମି, ଫ୍ୟାକ୍ଟୋରୀ ବିଲଡିଂ, ପ୍ଲାଣ୍ଟ, ମେସିନାରୀ, ଯାନବାହନ, ବ୍ୟାଙ୍କ ଆକାଉଣ୍ଟସ୍‌ ଏବଂ ଫିକ୍ସଡ୍‌ ଡିପୋଜିଟ୍‌ ଆଦି ରହିଛି।

ମନି ଲଣ୍ଡ୍ରିଙ୍ଗ ଆକ୍ଟ ଅଧୀନରେ ଆମୱେର ମୋଟ ୭୫୭.୭୭ କୋଟି ଟଙ୍କାର ସମ୍ପତି ଜବତ କରାଯାଇଛି। ସେଥିରେ ୪୧୧.୮୩ କୋଟି ଟଙ୍କାର ସ୍ଥାବର ଓ ଅସ୍ଥାବର ସମ୍ପତ୍ତି ଓ ଆମୱେ ସମ୍ବନ୍ଧିତ ୩୬ଟି ବ୍ୟାଙ୍କ ଖାତାରେ ୩୪୫.୯୪ କୋଟି ଟଙ୍କାର ଜମା ରାଶି ସାମିଲ ରହିଛି ।

ଫେଡେରାଲ ଏଜେନ୍ସି ଏହି କମ୍ପାନୀ ଉପରେ ମଲ୍ଟି ଲେବୁଲ ମାର୍କେଟିଙ୍ଗରେ ଘୋଟାଲା କରୁଥିବା ଅଭିଯୋଗ କରିଛି । ଯେଉଁଠି ଆମୱେ କମ୍ପାନୀ ଦ୍ୱାରା ଉପଲବ୍ଧ କରାଯାଉଥିବା ଅଧିକାଂଶ ଉତ୍ପାଦର ଦାମ୍‌ ଖୋଲା ବଜାରରେ ମିଳୁଥିବା ସମାନ ଉତ୍ପାଦର ଦାମ୍‌ ଠାରୁ ବହୁତ ଅଧିକ ବୋଲି ଜଣା ପଡ଼ିଛି। ଜଣେ ସଦସ୍ୟଙ୍କ ଦ୍ୱାରା ଅନ୍ୟ ଜଣେ ସଦସ୍ୟ କେମିତି ଲାଭ ପାଇବ ତାହା ଉପରେ କମ୍ପାନୀ ଫୋକସ କରିଥିବା ବେଳେ ଏହା ପଛରେ ବ୍ୟାପକ ଅନିୟମିତତା ହୋଇଥିବା ଇଡି ପକ୍ଷରୁ କୁହାଯାଇଛି।

Powered by Froala Editor