ମାଛ ଫ୍ୟାକ୍ଟ୍ରିରେ ବିଷାକ୍ତ ଗ୍ୟାସ୍ ଲିକ୍ ହୋଇ ୫ ଶ୍ରମିକଙ୍କ ମୃତ୍ୟୁ
କର୍ଣ୍ଣାଟକ ମାଙ୍ଗାଲୁରୁ ସ୍ଥିତ ବାଜପେ ଅଞ୍ଚଳରେ ଥିବା ଏକ ମତ୍ସ୍ୟ ଫ୍ୟାକ୍ଟ୍ରିରେ ଦୁର୍ଘଟଣା ଘଟିଛି । ବିଷାକ୍ତ ଗ୍ୟାସ୍ ଲିକ୍ ହୋଇ ୫ ଶ୍ରମିକଙ୍କ ମୃତ୍ୟୁ ହୋଇଛି । ରବିବାର ସନ୍ଧ୍ୟା ସମୟରେ ଫ୍ୟାକ୍ଟ୍ରିର ବର୍ଜ୍ୟବସ୍ତୁ ସଂଗ୍ରହକାରୀ ଟାଙ୍କି ସଫା ବେଳେ ଏହି ଦୁର୍ଘଟଣା ଘଟିଛି । ମାଙ୍ଗାଲୁରୁ ପୁଲିସ କମିଶନର ଏନ ଶଶି କୁମାର ଏହି ସୂଚନା ଦେଇଛନ୍ତି।
ସୂଚନା ଅନୁସାରେ, ଏହି ଟାଙ୍କି ୨୦ଫୁଟ ଗଭୀର ହୋଇଥିବା ବେଳେ ସେଥିରେ ମାଛମାନଙ୍କର ବର୍ଜ୍ୟବସ୍ତୁ ଜମା ହୋଇଥାଏ । ପୁଲିସ କମିଶନର କହିଛନ୍ତି, ପଶ୍ଚିମବଙ୍ଗର ଏହି ଶ୍ରମିକମାନଙ୍କ ମଧ୍ୟରୁ ଜଣେ ବର୍ଜ୍ୟବସ୍ତୁ ସଂଗ୍ରହ ଟାଙ୍କି ଭିତରେ ପଡ଼ିଯାଇଥିଲେ ଏବଂ ଭିତରେ ଚେତାଶୂନ୍ୟ ହୋଇଯାଇଥିଲେ। ଅନ୍ୟ ୭ଜଣ ଶ୍ରମିକ ତାଙ୍କୁ ବଞ୍ଚାଇବା ପାଇଁ ଟାଙ୍କିରେ ପ୍ରବେଶ କରିଥିଲେ ଏବଂ ଟାଙ୍କି ଭିତରେ ବିଷାକ୍ତ ଗ୍ୟାସ୍ ଲିକ୍ ଯୋଗୁଁ ଶ୍ରମିକମାନେ ଶ୍ବାସରୁଦ୍ଧ ହୋଇଯାଇଥିଲେ । ସେମାନେ ମଧ୍ୟ ଚେତାଶୂନ୍ୟ ହୋଇ ପଡ଼ିଥିଲେ। ସେମାନଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ୩ଜଣଙ୍କ ମୃତ୍ୟୁ ରବିବାର ହୋଇଯାଇଥିବା ବେଳେ ଅନ୍ୟ ୨ ଜଣଙ୍କର ସୋମବାର ସକାଳେ ମୃତ୍ୟୁ ହୋଇଛି । ବର୍ତ୍ତମାନ ୩ ଜଣଙ୍କ ଚିକିତ୍ସା ଚାଲିଛି ।
Powered by Froala Editor
