ନୂଆଦିଲ୍ଲୀ: ଉତ୍ତର ପ୍ରଦେଶ ବିଧାନସଭାକୁ ୨୦୨୨ରେ ୩୬ ଜଣ ମୁସଲିମ ପ୍ରାର୍ଥୀ ନିର୍ବାଚିତ ହୋଇଛନ୍ତି। ୨୦୧୭ରେ ଏହି ସଂଖ୍ୟା ୨୪ ଥିଲା। ଏହାର ଅର୍ଥ ଏଥର ଅଧିକ ସଂଖ୍ୟକ ମୁସଲିମଙ୍କୁ ଲୋକମାନେ ବିଧାନସଭାକୁ ପଠାଇଛନ୍ତ। ଏମାନଙ୍କ ମଧ୍ୟରେ ଅଛନ୍ତି ସମାଜବାଦୀ ପାର୍ଟିର ବରିଷ୍ଠ ନେତା ଆଜମ ଖାନ। ସେ ବିଭିନ୍ନ ମାମଲାରେ ଜେଲରେ ଥିଲେ ମଧ୍ୟ ତାଙ୍କୁ ଲୋକଙ୍କ ସମର୍ଥନ ମିଳିଛି।ଏହି ସମର୍ଥନ ବଳରେ ସେ ବିଧାନସଭାକୁ ନିର୍ବାଚିତ ହୋଇଛନ୍ତି। ତାଙ୍କ ପୁଅ ଅବଦୁଲ୍ଲା ଆଜମ ଖାନ ମଧ୍ୟ ସୌର ବିଧାନସଭାରୁ ଜିତିଛନ୍ତି। ଏହି ବାପପୁଅଙ୍କ ବ୍ୟତୀତ ନିର୍ବାଚିତ ହୋଇଥିବା ୩୬ ମୁସଲିମ ପ୍ରାର୍ଥୀଙ୍କ ମଧ୍ୟରେ ଜେଲରେ ଥିବା ଗ୍ୟାଙ୍ଗଷ୍ଟର ମୁକ୍ତାର ଅନସାରୀଙ୍କ ପୁଅ ଆବ୍ବାସ ଓ ପୁତୁରା ସୁହୈବ ମଧ୍ୟ ରହିଛନ୍ତି। ୪୦୩ ବିଧାନସଭା ଆସନ ମଧ୍ୟରୁ ମୁସଲିମ ବିଧାୟକଙ୍କ ସଂଖ୍ୟା ୮.୯୩%। ରାଜ୍ୟରେ ମୁସଲିମ ଲୋକଙ୍କ ସଂଖ୍ୟା ମୋଟ ଜନସଂଖ୍ୟାର ୧୯%।

ଆଜମ ଖାନ ରାମପୁର ଆସନରୁ ପ୍ରାର୍ଥୀ ହୋଇଥିଲେ। ଏଠାରେ ସେ ୧,୨୧,୭୫୫ ଖଣ୍ଡ ଭୋଟ ପାଇଛନ୍ତି। ତାଙ୍କ ବିପକ୍ଷରେ ପ୍ରାର୍ଥୀ ହୋଇଥିବା ବିଜେପିର ଆକାଶ ସକସେନା ମାତ୍ର ୫୬,୩୬୮ ଖଣ୍ଡ ଭୋଟ ପାଇବାକୁ ସକ୍ଷମ ହୋଇଛନ୍ତି। ସୌରାରେ ଅବଦୁଲ୍ଲା ବିପୁଳ ଭୋଟ ବ୍ୟବଧାନରେ ବିଜୟ ହାସଲ କରିଛନ୍ତି। ସେ ୧,୨୬,୧୬୨ ଭୋଟ ପାଇଥିଲା ବେଳେ ତାଙ୍କ ବିପକ୍ଷରେ ପ୍ରାର୍ଥୀ ହୋଇଥିବା ହାଇଦର ଅଲୀ ଖାନ ଓରଫ ହାମଜା ମିଆଁ ୬୫,୦୫୯ ଖଣ୍ଡ ଭୋଟ ହାତେଇଛନ୍ତି। ହାମଜାଙ୍କୁ ବିଜେପିର ସହଯୋଗୀ ଆପନା ଦଳ ଏଠାରୁ ଟିକେଟ ଦେଇଥିଲା।

Powered by Froala Editor